بوزقوش‌دان بیر تابلو
مسعود آذر
دیرسک‌له‌نیبب بیر آغاجین آلتیندا
چیمن آشاغی
ماوی گؤله
تیکیلیر گؤزلریم.
گوموش بویالی لپه‌لر والس اویناییر
قوم‌لاری ساییلان گؤلچه‌نین اوزه‌رینده.
اهمال – اهمال ساحیله جوموب،
گئری قاییدان لپه‌لر
اوره‌ییمی اوخشاییر اؤز نغمه‌سی‌ایله…
سوزولور گؤزلریم اوزو یوخاری
– بوزقوشون زیروه سیندن گؤیلره ساری-
اولدوزلاری بیر به بیر ساییلان سمادا
دؤوره‌له‌میش بئی‌سیز گلینی
سایسیز قیزجیغاز
سونسوز ایشیق.
