بئش سانتی‌مئتیر دیک دابان آیاق قابلاریندا
سیغیناجاق ائویم
یئردن اوزاق
پارازین جوراب‌ بویاسیندا توزاقلیغین بوغور اینسانلاریمیزی
قورتولان، جینایت دفترلرینده
سئوگی تابولارینی آشیر.

شهریمی دیک دابان اوسته گزدیرن قادین
سحر-سحر گؤزلریمی ایشیقلاندیراجاق
ساچلارینین آرخاسیندان اوزونو گؤستر
بو ائوین پنجره‌سیز گونیشی بیتسین
و آزادلیق بارماقلارینین اوجوندان
تئللرینی آچارکن اووجوما دوشسون

منی خاطیرلایاجاقسان می بو ائوین میعماری؟
من خاطیرلایاجسان می دووارلارینی سؤکوب
دؤشلرینله تاختالانمیش قاپیمدان ایچری گیرن
هانسی ائو بئله گؤزلدیر؟
هانسی ائو بئله سن‌سیز؟
کول اؤلور قلبیمده بو ائو
اودلانیر ایشیقسیز انرژی‌سی توکنمیش
کاغاذین اوزرینده
اومیدینی باغیران یازیچی.

آه ایسته‌دیگیم قوناق منی باغیشلا
سنی چوخ گؤزله‌دیم
بو حبس خانادان چیخیشیم
دوشوندوکرینله بیتمه‌دی.
منی باغیشلا
بئش سانتی مئتیر دیک دابان آیاق قابلاریندا
قاچماغی باجارامادیم
سن چؤللری گزرکن
من آغاج اوسته آستاجا یئرین ایپک قوردو اولموشدوم
یاپراقلار اوسته شکیل سنی یانسیلاتدی
سنی بیرآغاج دلن قوش ساندی راجیلاریمیز
تله‌سیک پیچیلداماغا دوشدو
یاپراقلار یئره دوشرکن دونیانی سئیر ائتدی
سنی پاییزین آرخاسیندا گیزلتدی بو توپراق
دوشوندوم کی خزان خیشیلتی‌لاری ایلا گلیرسن
باراما توخومادان یورغون دوشموش
قانادلاریمی آچدیم کپنک اولماغا…