یئنی بیر بیلگی‌سایار ویروسو آدینی تانیماغا باشلادی
چیخان ایسماریشلارین اوزه‌رینده آدین یازیلدی
دیل و بوتون تکنیکالارین کودلاری‌یلا یوخلاندین
آدین ائلیکتیریک سیستم‌لرین دولاشیغیندا پلتک وورور
آدین آختاریجی اینسان‌لارین، آختاریش موتورلاریندا باییلماق‌دیر
دونیا بازاریندا آل ساتیشلارین قاپانماسی‌دیر.
ایپک یولونون یورغون کاروانسارالاریندا آرشیولریمی ایتیرمیشم
سنی خاطیرلاماق ایچین شوشه‌مین قیرپیمینی فریادلا دولدورموشام
یوخ افندی یادداشیم
تاریخ اوشاقلیغیندان بؤیویه‌نه قده‌ر بیر ارکک بؤیودو
بیز اوشاقکن آنامیزا وورولدوق
آنا آدینا آد تاپا بیلمه‌دن، قادین قویدوق سئوگیمیزین آدینی
ال یارادیلیشی دئییل کی اینسان، بئیین یارادیلیشی
بیر بئیین یارادیلیشیندا ایزیمی ایزیندن ایتیرمیشم قادین
آدینی سربست شعرده یازیرام
آدینی سسله‌مه‌یه قورخورلار
کیمینسه بوغازینا تلیس تورباسی تیکیرلر
ساچلاریندان آسیلماغا ایپ دوزلدیرلر،
قیسا ساچلیم سحر بوغازیمدان اؤپرمیسن؟
