دورنالار اوچاندا
یالنیز کاپیتان قویدولار آدیمیزی
آغاران ساققالاریمیزی،
بوزاران ساچلاریمیزی،
و یولونو آزدیران قاییقچی‌نین کوره‌یینده
یازیلان اؤته‌لریمیزی دوزلا باسدیردیلار.
نوحوموزون گمی‌سی فیرتینالاردان قالخاجاق
ناققا قارنیندا اودولموش یونوسون آزادلیق دیلنمه‌سی‌ییک
سوسوز قالمیش قارا بالیقلارا یولو دوشموش سومویون بیچاغا دایانماسی‌دیر
دیشلرینی نیفرتدن قینجیلدایان سدلرین آرخاسیندا تاریخی‌نین دوردورولماسی‌دیر
وطن و گؤلون سوسوزلوغوندا شاعیر.
آغ یولون دولاشیغیندا یوواسینی کؤچورتوش قوشلار
سورگون اوچوشلاری گؤررکن،
الین نه زامان قاناد آچاجاق اینسان؟
ان آزی دیرناقلارینی،
ایشیقلارین یانقیسیندا یاللی اویناتماق ایچین اوزایین اؤنونه اوزات
سازینی کؤکلتمک ایسته‌ییر اولدوزلار
سوسوزلوغون مرثیه‌سی بوغازینی دلمه‌سین!
سزسیز دورمادان چالان،
قانادلار آلتیندا سوزولن ترین یاغیشی بیتمز،
کیپلیک‌لر یانغیسیندا اوزن چایین بالیغی بیتمز،
دوداقلار آچیشیندا دئییلن سؤزون آرخی بیتمز.
باخ سنی چاغیریرام سئوگیلیم
بیر او قدر قاییت دئدیم
سوسوزلوق اوتاندیرماغیمدان اریدی
سنی دوشونمکدن دنیزین دالغالاریندا گمیم باتیلدی
سنی گؤزله‌ییردیم،
دئدیلر سن ده دورنا اولوب گئدیرسن.
