عربی ماهنیسینا سیزلایاجام بیر سنی من
آدامین کور یاراسین دوزلایاجام بیر سنی من
زابولون گوشه‌لریندن آخاجام قانلیجاسی
تبریز اوغلانلارا اوبرازلایاجام بیر سنی من
سیخاجام چیلچیل ایلانلار نئیی‌نین شاهمارینا
جالانیب گؤیلره اولدوزلایاجام بیر سنی من
اوخویور منده بولاغ لیل توراخای‌لار سئگاهین
گولله ده‌یسه قانا یارپیزلایاجام بیر سنی من
ساز مینیب یئل‌لره قارشی چاپاجام شیرازیمی
سَسینن چیرپالاشیب توزلایاجام بیر سنی من
اینتحار شوشتریمین یاهولاریندان جان آلیب
نعشیم اوسته آیا سولدوزلایاجام بیر سنی من
یادیما توشدو پاییز، رنگی سارالمیش کَپنک
اودا تای یانغینا آوازلایاجام بیر سنی من
«توفان»ام باغری یارا سؤزلرینن سکگیزیمی
ایزن وئرسن اونا دوققوزلایاجام بیر سنی من
1400/۹/۲۱- تبریز
توفان قاراداغلی
چئویرن: توفان قاراداغلی
ترجمه: توفان قاراداغلی
سسلندیرن: توفان قاراداغلی
- شعر
- اوخوماق زامانی: < 1 دقیقه
- https://ishiq.net/?p=33615
چاپ
