گونلر قارشیمیزدان کؤیرک سوغولور،
غضبلی تانری‌لا دردلشیریک هئی!
مفعول صفحه‌لرده آدیمیز دوغور،
مجهول آداملارلا چتلشیریک هئی!
گئجه داریخماسین یوکله‌ییر بیزه،
سانال دونیاسی‌لا پاپریز چَکیریک!
بیر دوققوز قورومساق لات خیالی‌لا
ایچی بوش واراغا اوره‌ک اکیریک!
قالما قال یارانیر، پارانتز گولور،
بیزیم ناغیللارا غم قولاق آسمیر!
شعریمیز یئنه ده قابیغدان چیخیر،
سؤزجوکلر آلتینا بارماغین باسمیر!
سیرناشیق بیر اولای چاغیریر بیزی،(۱)
اوخویور سطیرلر اؤز گله‌جه‌یین!
بیر قانجیق کلمه‌نین باغری چاتلاییر،
سیخیر سون نقطه‌ده«توفان»ین اَلین!
۱۴۰۲/۱۱/۲۹
(۱) سیرناشیق: سیمیج( سمج)
