بیر کؤهنه کاروانسارایام
یوز ایللیک توز قالیب منده.
گولله‌لنمیش، یانمیش قاپی
داغیلمیش کؤز قالیب منده.

بولاغام، دورنا ایتیرمیش،
دومان سالخیم قان گتیرمیش،
قانادیم قیلینج بیتیرمیش،
بیر یورقون ایز قالیب منده.

بولودام، کؤینه‌ییم قانلی،
گورشادام چوخ هیجانلی،
گؤزومده یاش‌لار سامانلی
چایلاغیم دوز* قالیب منده.

قاتار، قاتار دوه‌م یوخدی
گوندوزومه، گئجه‌م اوخ‌دی
قوجاغیم آخ، وای تولوخدی
گئجلیگیم، تئز قالیب منده.

کؤکو چاتلامیش تَمل‌ام
عَمل آلتیندا اؤلموشم،
قوللاری یوخ، ایکی اَل‌ام،
لئشیم، یالقیز قالیب منده.

«توفان»ام من، فیرتینایام،
سورودن قالمیش دورنایام،
قاسیرغا توتموش سونایام،
یئللر سس‌سیز قالیب منده.
1400/۲/۶
*”duz”