باخیرام یوللارین سون گئدیشینه،
قاییتماز ایزلرین آهین گؤرورم.
آخیرام چایلارین دَرین یئرینه،
چاققال قویروغوندان ایلان دَریرم.

زینقروسو ایتن بو ائرکک شعری
آسیرام بیر سوبای آصلان بوینونا.
اولدوزلار نفسین داریخدیقجا من
گیریرم عقربلی شه‌هر قوینونا.

داریخیر بو شَهرین جولو بارماغی،
سیخیلیر منده‌کی خیاوانلارا.
قانونلار قان ایچیر، یاساقلار باخیر،
اعدام آذان وئریر کَل اوغلانلارا.

آتیلا اولساندا آخیری یوخدور،
دونیانین قیلینجی قانین تؤکه‌جک.
اصفهان قارنیندا قندهار دوغسان
توپراق تیمور یئییب، داش کؤکه‌له‌جک.

«توفان»! سینان توبه بیتیشمییه‌جک،
اینانما  آینالار  یالان دئییرلر!
بو شهرین باشماغین داروغه‌سی‌له
آدامسیز کوچه‌لر  باشا گئییرلر.
۱۴۰۲/۱۱/۱۸ تبریز