کسمه یولدان سنه بیر دیلیم
قوشخانا سئلابی گتیرمیشم؛
باخیشلایمیز قوجاقلاشاجاقلار یئنه
دولو بولودلار چارپیشاجاقالار
حسرتلی گؤزلریمیزده،
نئیسانلار بوشالاجاق
اورکلریمیزدن چای‌قیراغینا.
یئنه سئوینج یاشلاریمیز
آخاجاقلار سئودایا سوسامیش
گون‌اورتاسینین یاناقلاریندان؛
سئللر، سولار آخاجاقلار
قوروچایین یاتاغیندا،
چای‌کنارین لای‌لاسی تزه‌دن
قوناجاق اییده آغاجیندا
سولغون اومیدین یواسینا،
یئنه نغمه‌لر پیچیلداناجاق
اویویان چیچکلرین قولاقلارینا.
باهار قوخوسونون
کوره‌یینه مینه‌جه‌ییک بیرلیکده؛
رؤیالاریمیز یئنه ال-اله وئریب
هاوالاناجاقلار گوون سماسینا،
کپنک‌لر اویاناجاقلار
شیرین یوخوموزدان،
رنکلی آرزولاریمیز یئنه
اوچاجاقلار سحرچاغی
قاری‌کؤرپوسونه.
