یارپاق بوداغا باخمادی،
بوداق آغاجا.
یارپاق بوداقدان آیریلدی،
بوداق آغاجدان.
آغاج تک قالدی،
یاریلدی اودون کیمی! …
ایندی داها آغاج دئییل،
بیر یاناجاق‌دیر!

یارپاق،
بوداق،
آغاج-
آیریشدیلار؛
کؤک تک قالدی یالقیزجاسینا.
تورپاق قالاندی اوستونده،
داش سالیندی،
آسفالت چکیلدی؛
ایندی
باتـیر،
تاپدالانیر آیاقلارین آلتـیندا کؤک!

یارپاق،
بوداق،
آغاج
ناغیل اولوب دیلیمیزده!
اینانیریق سوندا
داها افسانه تک اونا
بیز ده! …