کؤنلوم
آلاتورانلیقدا سؤکولن دان یئری،
گولوش‌لرین
گؤی قورشاغی،
پاریل-پاریل پاریلدایان سحر شفق‌لری؛
سپیلیر کؤنلومه
گونش ذره‌سی کیمی،
هوپور روحوما
دوداغی چرتیمیش تورپاق کیمی،
سو کیمی.
کرپیچ –کرپیچ «سن» عطیرلی‌دیر
ائویم- ائشیگیم؛
مخمل باخیشلارین سئوگی بولاغیم،
کؤنول گئنیشلیگیم.
هردن
سیلکه‌نیرم خاطیره‌لری؛
سالخیم- سالخیم تؤکولور عؤمرونون بوز بولودلاری،
ائرکن سولموش باهاری.
اوزونون جادار- جادار جیزگیسی
گنجلیگینین تالانمیش خریطه‌سی‌دیر،
چیلغین احتراص‌لارین «سوس!» سسی‌دیر؛
آمما
سن اوزاق‌لارا باخدین
و سولوخ دویغولاردان یاز یاغیشی یاغدین؛
حالا یوخسان
اوشویور قاپیم، پنجره‌م.
سنسیز
بنؤوشه دویغولاری ساهمانلاماق مومکونسوز؛
یوخسان،
گون باتان چاغی‌یام
گونش اوزه‌رینه توکولن قان کیمی،
اوفوق قیزاران کیمی.
۴۰۲/۰۴/۲۰
