دؤزه‌رم
اوره‌ک آغریسینا، باش آغریسینا
بو آغری‌لارا دؤزمه‌یه نه وارکی!
سوفره‌م اللریمدن کوسسون
دؤزه‌رم،
ایل‌لریم طالعیمدن کوسسون
دؤزه‌رم،
سویوق گولوش‌لره
قاخینجلی باخیش‌لارا
دؤزه بیلمه‌رم .
دویغوم ، دوشونجه‌م آغری‌ییر
بئینیم آغری‌ییر
فیکیرلر… فیکیرلر… فیکیرلر
دیدیب، دئشیر بئینیمی،
بوم – بوش توختاقلیقدان
ساختا دوستلوقدان
قورو آشنالیقدان
بئزمیشم.
گل!
آغریلی دوشونجه‌لری جانیمدان سیل!
گل!
تیکانلی دویغولاری کؤنلومدن چیخارت!
گل!
اوره‌یینی – اوره‌ییمه ساری!
گل!
بئینینی ،بئینیمه جالا!
دوشک سونو گؤرونمز یول‌لارا!
۱۳۸۰
