پاییز- پاییز اَله‌نیرم
یارپاق‌لارین سینه‌سیندن.
هارا گلیر دؤشه‌نیرم
توشورم یئل گیله‌سیندن.
قایا- قایا اوغولورام،
سینیرام داش اوره‌ک‌لردن.
گَدیک- گَدیک سوغرولورام
قیش کئچیرم کولک‌لردن.
تاخجا- تاخجا دوزولورم
اینسان‌لارین گؤزلرینده.
داباق- داباق جان وئریرم
حئیوانلارین ایزلرینده.
بیر کلیسا قوجاغیندا
هئیکلیمی داریخیرام.
بیر معبدین آیاغیندا
آدام- آدام قان آخیرام.
بیر گون سالام وئریلیرم-
یولدان کئچن چرچی‌لَره.
بیر گون علیک آلینیرام
آتیلیرام کوچه‌لره.
…و بیر آن یوخا چیخیرام،
هئچ اولورام، پوچ اولورام؛
ایچی بوش بیر کؤچ اولورام
«توفان»لاردان سوغولورام.
