یالین مئشه لر
مسعود آذر

مئشه لر ـ مئشه لر
قالین مئشه لر؛
شاختالی ـ قارلی
یالین مئشه لر.
قیروولو اللریمدن قوور آتیر،
دون وورموش اوره ییم
شعله چکیر،
آلوو تپیر.
دیزه چؤکورم
قارشیسیندا تورپاغین؛
کیریمیش اللریم له
ائشیرم قاری ،
دئشیرم تورپاعی.
دوداق قویوب
دون وورموش قارا،
تورپاغین اوزوندن اؤپورم.
چاتلی دوداقلاریمین حرارتی ایله
جانلانیر حیات ،
جانلانیر کائینات.
قارا تورپاغین چاتلاریندان
باهار قوخوسو گلیر.
نارین ـ نارین یاشیل یارپاقلی ،
ساری خاللی ،
قیزیل چیچکلر دیرچه لیر،
باهار قوخوسو گلیر.