یازین گلیش چاغلاریندا
قیشین قالماغینا ایمان گتیردیم،
دومانلی تبریزین داغلاریندا
سنی تاپماق همن، ایتیردیم.
«هانی او تبریز؟»۱
خولیالارین، رؤیالارین اؤته‌سینده
دونیالارین
دونیالارین اؤته‌سینده…
بیر دسته سوسن چیچه‌یی الینده
آددیمینی سایا – سایا
خولیالارین، رؤیالارین اؤته‌سینه
دونیالارین اؤته‌سینه
یول آلدین.
سنی اؤزله‌ین‌لرین
سنی اؤزله‌یه‌جک‌لرین
قئیدینه بئله قالمادین…
یازین گلیش چاغلاریندا
نوروز گولولر
قار چیچه‌یی‌لر
باغیردی سنی.
هارا گئتدین بئله؟
یوخسا
«اننه»ن۲ چاغیردی سنی؟!
یاخشی
یاخشی
یاخشی…
آمان وئرمه‌یه‌جک آرتیق
گؤزومون یاشی
بوجور کی تئلله‌نیر قلبیمین باشی
یازین گلیش چاغلاریندا
یازین گلیش چاغلاریندا .
اورمو. ۲۶/۱۲/۱۴۰۱
۱ و ۲ : شاعرین اثرلری«هانی اوتبریز» و« اننم نن من»ه اشاره
