بو پاییز باشقا بیر پاییز:
سسینده قور وار
جانیندا قیزدیرمالار.
بو پاییز باشقا بیر پاییز:
ده‌ییشیب وردیشینی طبیعت؛
زیتون آغاجلاری زیتون دئییل
آدام موچورلاییر،
آدام گتیریر یارپاق- یارپاق:
بارماقلاریندان قان سوزه- سوزه
سینه‌سینده قیزیل گوللر آچمیش،
گولله‌لر ناخیشلامیش.

زیتون آغاجلاری پاییزدا موچورلاماز ذاتن
آمبولانس‌لارسا آدام داشیماز.
بو پاییز
آمبولانس‌لار اؤلو دئییل
آدام داشیییر قوپپالی، پاقونلو، قورخولو
اؤلوم قوخولو؛
روحو جیرماقلاییر اوغونتولاری
بئیینلره دوشور سیگنال هیجانلاری.

تورپاق،
ساغ اولسون تورپاق
سؤکولور جانی شیریم- شیریم، جادار- جادار؛
دیلینده آغی، اوخشاما
گؤزونده یاش داملا- داملا
قوینوندا یئر وئریر
سینه‌سی قیزیللانان گول‌لرینی،
آمبولانس تؤحفه‌لرینی.
۱۴۰۱/۱۰/۱۲