چئویرن: محمد احمدی‌زاده
ترجمه: محمد احمدی‌زاده
محمد احمدی‌زاده
00:00
00:00

ساعت قاباغیندا قوروموشام،
حسرتلی گؤزلریمی تیکمیشم
جاماکی دالسینداکی آکاردیونون قارا توشلارینا؛
باخیرام توکانین ایچینده کی سلمانی‌نین
آغارمیش ساچلارینا.

ساعاتین سسینه بیردن اویانیرام،
ایسلانیرام یاغیش آلتیندا یاشلانا – یاشلانا
باخیرام بینایی تیکن آلمانلی‌لارا
و ساعات قاباغیندا حرکت ائدن
آذربایجان دموکرات فیرقه اوردوسونا؛
بیرلیکده گئدیریک … گئدیریک
تربیت آغزینی گئچیریک،
دیلیمیزدن ایستیقلالیمیزدان واز گئچیریک
یئتیشیریک یان یانا ایکی پخله‌چی‌لر توکانینا،
ایچری گیریب دؤشه‌ییریک پخله‌یه؛
گؤزوموزو تیکمیشیک گله‌جک پخله سویونا.

گئدیرم یاغیش آلتیندا ایسلانا – ایسلانا،
فیردوسی آغزیندا دورورام
آلمان قوشونوندان قالان سون بیر عسگر کیمی
خییاوان قیراغیندا سیقار ساتان فیردوسییه
وئریرم آنادیلیمی،
بیر ده اوزون عؤمرومو
قارشیلیغیندا بیر پاکئت قیسا بهمن آلیرام،
«آلمان چئزدی» دئییب قاچیرام.

گؤروشه گئج قالمیشام،
قاچیرام یاشلانا – یاشلانا
یاغیش آلتیندا ایسلانا – ایسلانا.

آنادیلیم قاچیر فیردوسی آغزیندا،
آذربایجان دموکرات فیرقه اوردوسو اوتوروب
هله ده پخله‌نین سویونو گؤزله‌ییر
پخله‌چی توکانیندا.

تاکسی شوفئری سسله‌ییر:
ساعات قاباغی! … ساعات قاباغی!

اطلس پاساژی‌نین اوست قاتیندان
آکاردیون سسی گلیر.

تاکسی دولور،
هیفده شهریوردن اوزاقلاشیر.
من قالیرام
گؤروش رینگی قالیر
بیر ده
سویا دوشموش خیاللاریمین
دوداقلاری آراسیندا
قیسا بیر بهمن سیقاری.

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

ساعات قاباغی

محمد احمدی‌زاده
www.ishiq.net

آذربایجان ادبیات و اینجه‌صنعت سایتی

ساعات قاباغی

محمد احمدی‌زاده
www.ishiq.net

آذربایجان ادبیات و اینجه‌صنعت سایتی

ساعات قاباغی

محمد احمدی‌زاده
www.ishiq.net

آذربایجان ادبیات و اینجه‌صنعت سایتی