غنچه تک اؤرتوک دالیندا زاره گلمیش من بیلن
او گول اوزلو اوز آچیب گولزاره گلمیش من بیلن
عشق بازارین خزف دؤورونده رونق‌سیز گؤروب
یوز متاع حسن ایلن بازاره گلمیش من بیلن
جانی جاناندان آییرماغی مروت بیلمه‌ییب
سئوگی سئوداسین سالیب جانلاره گلمیش من بیلن
سیندیران پیمان‌لاری نوش ائیله‌ین آل قان‌لاری
ایندی بیر آز عهدیلن ایلقاره گلمیش من بیلن
او اوزون ساچ کی اوزون سئودالره سالمیش بیزی
چون بیزیم تقدیریمیزدی قاره گلمیش من بیلن
مست عشقم نئیلیرم دنیا و عقبانین سؤزون
بئیله سؤزلر مردم هشیاره گلمیش من بیلن
ای «صمدلی» چکمز اولدو چیگنیمیز هیجران یوکون
یوک نه یوک اندازه‌سی خرواره گلمیش من بیلن