«سعید متین‌پور»ون آناسینا سونولموش

بوغازیمدا قیزیل گول
گؤزلری‌نین سونگوسو الیمده
سنی
یاشیییرام
سنی
پیشیک بالاسینی داشییان کیمی دیشیمده داشیییرام
سنی ائو ائو
سنی قاپی قاپی
سنی بوتون دوستاق‌لارین ایچینده باراما
بئجردیرم
سنی یاشیییرام ددم!
سنی قیریمیمین گؤزلری‌نین ایچینده باغیریرام
سنی دیلیمی قیسیتلایان‌لارین اوزونه توپورورم
سنی سئومه‌ین‌لریمه سؤیوش سؤیورم
سنی آچاریمدا چیخاردیرام
سنی قاپیمدا آچیرام
سنی اوتاغیمدا سویونورام
سنی سئوگیلیمله سئویشیرم ددم
سنی ایسته‌سه‌لر ده
سنی ایستمه‌سه‌لر ده
سنی ایسته‌ییب، ایستمه‌سه‌لر ده
سنی یاشیییرام ددم!