۱- گؤرونتو
دنیز دالغالاری‌لا
آغاج یارپاقلاری‌لا دانیشیر
من
دیلیمی آغزیمین بوشلوغونا سرمیشم
دینجلسین
یالان بازارینا قیز بوراخمیرام
بو آن قوم دیلینده
بارماقلاریملا دانیشیرام
باخ
اووجومدان سوزولن قومدا سنین آدین وار.
۲- سنین گؤزلرین
قاپی‌لار آچیلاجاق
قاپی‌لار آچیلاجاق
قاپی باشی بیر مندیل آچیلاجاق گونشدن
اومودو اومسونانلارلا
سئوگینی سئونلرله بؤلوشه‌جه‌ییک
زوغال آغاج‌لاری قیپ قیرمیزی
گیله‌نارلار یئتگین
یوسون قوخوسو
آراز
دوم دورو
و اوچان بوتون قوش‌لارین قانادیندا
سنین آدین
سؤیله
هانسی دنیزده یویونموش سنین گؤزلرین
بونجا یاشیل؟!
