سنسیزلیگی پوزا بیلن بیر سس آختاردیم
یالنیزلیغی پوزا بیلن بیر دوست آرادیم
دونیا
سس‌سیز ایدی
کندی قینیندا اویوموش.
و چؤل‌لرین اورتاسیندا
قبیر قازیردی‌لار
بیر- بیرینه اینسان‌لار.
آخ، تانریم
منیم کؤلگم
داغ‌لارا دوشر
دنیزلری اؤرتر،
میصرا‌لاریم اود پارچاسی
شعرلریمی گونشه یازار
و هر بیتمیش شعریم
دمیرچی کوره‌سیندن ایستی
قارا‌چی چؤره‌ییندن دادلی اولاردی
تاپاردیمسا
تاپاردیمسا آختاردیغیم اللری.
دونیا
یامان سس‌سیز،
ایتگی‌لر
ایتگین قالیر قارانلیغیندا حیاتین.
و ال‌لر
بوشونا گزیر بوشلوغوندا هاوانین.
کیمسه یوخ
کیمسه یوخ
سس‌سیزلیک ایچینده
بوغولور دونیا سس‌سیز و سس‌سیز
من
کیمسه‌سیزم،
دونیا
مندن کیمسه‌سیز.