بیلیرم
اوچسام گؤیلره
سیندیرار قانادلاریمی تانرینین ملئیکهلری.
و گیرسم تورپاق آلتینا
چئینهیر سوموکلریمی تورپاغین کور سیچانلاری.
من، سیزینله یاشاماغا مجبورام
هئی سیزینله…
قیزلارینیز گؤزلرینی قاماشدیریر گونشین
و چیلیسلیینیز آجیندان اؤلدورور قارداشلاریمی.
الیم الینیزی سیخمایاجاق یولداشیم دئیه
گؤزوم گؤزونوزه باخمایاجاق قارداشیم دئیه-
«قیلینج قینی کسمیرسه یئر قیتلیغینداندیر
و اوخ اوخلوغو دلمیرسه اؤیلهجه.»
بیلیردیم
اوچسام گؤیلره
سیندیرار قانادلاریمی تانرینین ملئیکهلری
و گیرسم تورپاق آلتینا
چئینهیر سوموکلریمی تورپاغین کور سیچانلاری
اوچدوم بیلهرک
گیردیم بیلهرک
لاپ تورپاغین اورهیینهدک.
