یئتر به یئتر،
چکیلیب
چکیلیب
سون تورپاغیمیزدیر- دئیه
اووجلاریمیزا قیسیلدیغیمیز.
یئتر به یئتر
اووجلاریمیزدا
اوجاق قوردوغوموز
و چیلپاق اوشاقلاریمیزا
اوره‌کلریمیزین یاراسیندا یووا تیکدیگیمیز.
ائهئئئی…
سورگوندن سورگونه اوچان دورنالار!
اوسانمادینیزمی اؤلمکدن و دیریلمکدن
اوسانمادینیزمی وطنسیز یاشاماقدان؟
و سس‌سیزجسینه اوچدولار
قانادلاری بئش دورنالار.
آشدیلار
قارلی داغلاری
دومانلی آشیریملاری.
نه قوبوستان داشلاریندا دونموش ایلخی‌دان بیر آت کیشنرتیسی
نه چنلی‌بئل داغلاریندا
قیلینج‌لا قالخانین گؤروشمه سسی…
سس‌سیزلیک
سونونجو سس‌دیر بوردا،
و یوردون بوی ها بویونجا
اوزاندیقجا اوزون
یاییلدیقجا یایقین‌دیر
تورپاغی قوجموش مزار داشلاری.
