هر سحر
دان یئرینه چیله‌نیر
قارا‌لارین، ساری‌لارین، آغ‌لارین، قیزیل‌لارین قانی؛
هر سحر
سپیلیر دان یئرینه
سئوه‌ن‌لرین، سئویلن‌لرین، گولر گؤزلرین گولوش‌لری؛
دوروشور، دؤیوشور انسان‌لار
سحردن – سحره ایشیقلانیر، گؤزه‌للشیر دان یئری؛
انسان‌لار کئچیر ساعات‌لارین، گونلرین اوستوندن
سعادت بزه‌کلی دونیادیر گؤروش یئرلری.
دونندن بو گونه گلن حیات یو‌للاری‌نین قیراغیندا
سیرالانمیش الی قیلینجلی‌لار، دار آغاج‌لاری، تانک‌لار، توپ‌لار.
یول‌‌لارین اوستونده
چتیر آچمیش شهیدلرین آرزو‌لاری،
گؤی قورشاغی‌نین آلتیندان کئچیر انسان‌لار
گئدیر گونشه ساری.
یئنه هر سحر
اوره‌ک‌لر دایانیر، سینه‌لر داغلانیر، گؤزلر کور اولور، سینه‌لر دئشیلیر،
بوغاز‌لار بوغولور دونیانین دؤرد بیر یانیندا.
یئنه هر سحر
نغمه‌لر دوغولور، گؤزلر آچیلیر، دومان‌لار آیدینلاشیر،
گؤزه‌للشیر انسان‌لار.
سحر – سحر ده‌ییشیر دونیا
یئنی سس، یئنی نفس آلیر،
تزه‌لنیر تزه نفس‌لر، تزه گؤزلر
تزه سؤزلر اویادیر، اوخشاییر، بزه‌ییر دونیانی.
یئنه هر سحر
تزه‌لنیر، گنجلشیر، گؤزه‌للشیر اولو دونیا.
۱۳۶۷
