نئچه گوندوزدی
کامیل قهرمان‌اوغلو
نئچه دوزدی گون…
نئچه گونلی دوزدی
نئچه گوندوزدی:
اللریم کومادادیر اللرینین اؤپوشمه‌سینه
ایچیرم بو آغینی ۵۹۸ عهدنامه‌سی کیمی
نئچه گوندوزدی
(«ماهناز» باجیمین کؤچو قاییتدی او گون آیناسی قوجالدی اللرینده)
آیاق ایزلرینده لئیلی لااله اله اللاه لاری
چیسگین قامیشلیقلار
کئچی بوینوزلاری،
مجنون یارپاقلار چلنگی
گؤزلری پیغمبر معراجیدی…
ساچلاری،
یکشنبه غوبارلارینی هؤروکلرینه ساوورور___بئله-سی
نئچه گوندوزدی:
چینارلار کیشی ایدیلر اوشاقلیقلاریندا
اوشاقلیقیندا
کیشی ایدیلر
چینارلار…
هر آن بیریسی یوکسه‌لیر مندن
آ
ز
ا
ی
لا
ن
ی
ر
آزارلاییر_آزالیر بیریندن نئچه‌سی مندن
اون بیری، ۱۳۹۵ینجی ایللر
اون ایکینی، ۱۳۳۲نین مارت آیلاری
اون اوچو، مین اوچیوز اللی اوچون جوزا داریخمالاری
بئله دوشور مندن آلمالانمیش یارالار
بو آلتی اؤزونو ۶۳ بیلیر بعضن
اؤزونو ۱۳ بیلیر
کوچوک بیلیر اؤزونو پرانتئز کؤلگه‌سی
پئنتاگون نوقطه‌سینده
نئچه شوپنهاوئر
نئچه مایاکوفسکی
نئچه دونالد ترامپ
و نئچه نئجه سانیر نوطفه‌سینده هابئله…
کفن توتوب بو وطنی گؤزلریندن
(اؤلومدن اؤنجه ایکی کیرالین سون اؤپوجویودور، بوووو…)___اؤلوم ساغلیقیندا
باروک شعیریمده
گئجه‌نین ۴۰ قاتیندان کئچیرم شبحلریمی
گئجه‌نین ۴۰ ایللیک قاریشقالاری صوپانه‌مدی
بیریسی بوردا یوخو قوخولودی
بیزیم اداره نین پیشیکلری دووشاندی بئله
فیل قارنیندا دئییرم
گؤزلریمین چولاسی امام مزارلیقی
پاییز قونداقلیقینی قویو قازیر کؤهنه اؤلولر
و آریخدی بارماقلاریم سنسیز سئودا لالالی اصلیجم آهئییی…!
نئچه گونوزدی رویالاریمی توهم گئدیر قاپیسیندان
نئچه ونلافاکسئن قاچیریر هذیانلاریمی
و من توم شعیرلریمین باشینی باغلامیشام آندیندا
ملل خالقینین قطنامه‌سینده
ایچیرم بو آغینی ۵۹۸ عهدنامه‌سی کیمی
بو نئچه گوندوزدی…
سئرچه لرین یوواسیزلیقینی اوچور یئرلر
مزارلار دانیشیر سنسیزلییمی آفئیی…
لاچینسیز قوشجیغازلارا
نئچه گوندوزدی بو:
۲ روکعت آرخادا قالمیش کولکلرین قاسیرغالی نامازی…
۳ روکعت دنیزلمیش دوه بالیقلارینین شورانلیقلاری
۴ روکعت اشهد ان آنام دستمازینین قانلی یئلجیکلری
۵ روکعت آتامین جایناقلاریندان قیشقیران الله اکبرلر
۶ روکعت آلواتان زیندانیدا دؤشلریندن آسیلمیش مریم‌لر
و ۷ روکعت شیطان تعظیملریدیر منبرلرده
نئچه گوندوزی قالیب، دالالیب قالمیشام کلمه‌لره !
هاچان اوغورلادیلار آنام بیلرزیکلرینی ائومیزدن!
هاچان کسدیلر گیلاسیمیزین باشینی!
یوخوسونو قاچیریبلار آنامین مزاردا
دویورام آنا کدرینی اوردا…
دلی یوللارین یولسوز درینلیگینین دلیلیگینده
غرورمو آپارمیشلار سانکی آنا!
نئچه دوزون گونودی
نئچه گونون دوزودی
نئچه گوندوزدی… ای آنا… اوفففف…
شاعیرسیز شعیر کیمی تعطیلم بو گونلر…
۱۳۹۹/۳/۲۹
