من کؤهنه بیرکوره‌ایدیم!
مسعود اسلامی
من کؤهنه بیرکوره‌ایدیم!
عؤمور بؤیو جور به جور مئتال‌لار اریدیلیب منده
ایندیسه، شهرین اوجقاریندا قالابالیق بیر مال میدانی‌‌یام
هر زامان باخیرسان بئلیمده زنجیر قیریر پهلوان‌لار
زنجیرلر منی سیزلاییر، من مئتال‌لاری
نه منده گوناه وار نه پهلوان‌لاردا
قیریلمیش زنجیرلردن آخان قان،
یازیلمامیش شعیرلریمین سوچودور
گؤتورون منی
گؤتورون گونشین یئتیشن چاغ‌لارینا قده‌ر
بوردا، آلما یئتیشنده قیزارمادان سارالیر
بوردا، شاعیرلر گونش ایچمه‌دن چای ایچیرلر
گؤتورون منی شعیرسیزلییه قده‌ر
من شاعیر دئییلم،
ایندی!
