هر آددیم باشی بیرپیشیک آسقیریر
مسعود اسلامی
هاردان گلدییینی بیلمه‌ییردیم
آنجاق گئجه یاریسی یولونو آزیب
ایذن‌سیز شعریمه گیرمیشدین
هاوادان سؤز آچیردین، لاپ هاوادان!
یاز هاواسیندان؛
یاشیل یاپراق‌لی آغاج‌لاردان، گول چیچک‌‌لی باغ باغچادان دانیشیردین
عاغیلا گلمز گؤزل‌لیک‌لری گؤی‌لردن یئره ائندیریر
آیری آیری بهشت‌لر یارادیردین
کندلرین گؤزلرینی سورمه‌له‌ییب
یئنی شهرلر سالدیریردین
شهَرلرده یئنی بینالار، یئنی انسان‌لار…
آنجاق شاعیرلرین چایینی دئییل،
قانینی سووودوردون!
ایسته‌دیکلرینی سئویردین
سئومه‌دیکلرینی نه یازیق…
سن اؤزونودون، من کلمه‌لریم
من یازیردیم، سن پوزوردون
اؤزومو ایتیررکن دایانیب گؤزآلتی سنه باخدیم
یئریمه‌دن یارپاقلار چیغیریشدی آیاقلاریمین آلتیندا
آنسیزین یاناقلاریمدا هئیوا یئتیشدی
بونو بیلمه‌ییردیم هئچ
بیرنفرین بئلینه اون نفر مینیر!
یولداش سنی کیم آپاردی؟
من گؤرمه‌دیم اویناییرلار!
هئچ گؤرمه‌دیییم بیریسی قولاغیما پیچیلداییب
دئدی
بو گئجه بوتون شهرلرده گونش پایلایاجاقلار
کیمسه نه قدر آپارا بیلدییینه سربست‌دیر
گلین
قابینیزین توتاجاغی قدر آپارین
***
بونودا بیلمه‌میشدیم هئچ
قوراقلیق ان اؤنجه‌دن باشلانیبدیر
تئز تئز هاوا توتولور یاغمادان گؤی گورولداییر
بولودلار گونشین باشینا چارشاب سالیرلار
باشلاییب باشلامادیقلارینا هر آددیم باشی بیر پیشیک آسقیریر
ایلدیریم آسقیرسا؛
شَهرلر بورنوندان قان پوسکوره‌جک!
کیلاسیک مزارلیق‌لار اؤده‌یه‌سی دئییل گونجل دوشونجه‌لری!
بودوروم‌دا،
غفیل بیر اؤلومه بنزه‌ییرسن
گئجه یاریسی یوخودان آییلدار
دور گئدک،
افندیم…
