«کورونا» ایله باغلی ایکی شعر / ح. هریزلی
چئویرن: ایشیق
ترجمه: ایشیق
ایشیق
00:00
00:00

«کورونا» ایله باغلی ایکی شعر
ح. هریزلی

۱- ائوده قالاق!

سنینچون چوخ داریخمیشام،
یئنه ائوده قالاجاغام.
داریخسام دا سحر آخشام
یئنه ائوده قالاجاغام.

الیم الیندن آیریلیب،
هرکس ائلیندن آیریلیب،
کؤنلوم گولوندن آیریلیب،
یئنه ائوده قالاجاغام.

گولوم گل قیناما منی!
کورونا قورموش تله‌نی.
باغریما باسینجا سنی
یئنه ائوده قالاجاغام.

اوره‌ییم اسیر دوست اوچون،
عائله‌مه حسرت بوگون.
ساغ گؤروم هامیزی بوتون،
یئنه ائوده قالاجاغام.

قالمیشام هامیدان اوزاق،
قورونماقچون ائوده قالاق!
ایپیمی قیرسا داریخماق
یئنه ائوده قالاجاغام.

پرستار دینجله بیر آز،
حکیم‌لر اولماسین ناساز.
گلسه بایرام، یئتیشسه یاز
یئنه ائوده قالاجاغام.

۲- آغ قانادلی کپنک‌لر

اودون باشینا دولاندیز،
آغ قانادلی کپنک لر!
بعضیلریز اودا یاندیز،
آغ قانادلی کپنک لر!

نه دینجلدیز، نه یاتدینیز،
درمانا اومود قاتدینیز،
اویانلاری اویاتدینیز،
آغ قانادلی کپنک لر!

گئییمینیز صلح بایراغی،
اولدوز ائللرین دایاغی،
قارا گئجه‌لر چراغی-
آغ قانادلی کپنک لر!

سماعنیز داغ اولسون سیزین،
اوزونوز آغ اولسون سیزین،
جانینیز ساغ اولسون سیزین-
آغ قانادلی کپنک لر!

دوشمانسیز بیر موباریزه،
سیزی چؤکدورنمز دیزه.
«هریزلی» قورباندیر سیزه،
آغ قانادلی کپنک لر!

اشتراک گذاری در print
چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

اوخوماق زامانی: < 1 دقیقه
اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email

«کورونا» ایله باغلی ایکی شعر / ح. هریزلی

ایشیق
www.ishiq.net

آذربایجان ادبیات و اینجه‌صنعت سایتی

«کورونا» ایله باغلی ایکی شعر / ح. هریزلی

ایشیق
www.ishiq.net

آذربایجان ادبیات و اینجه‌صنعت سایتی