بوگون چهارشنبه 25 فروردین 1400 ساعات 17:24
ایشیق 1
آذربایجان معلم‌لری و تحصیل مساله‌سی
ایشیق 2

آذربایجان قفه‌خانالاری

ایشیق 3

آذربایجان و مهاجرت مساله‌سی

ایشیق 4
آذربایجان توی‌لاری


قادین اي قادين
حبيب فرشباف
(بو شعر 1392ینجی ایل، سایتیمیزدا ان چوخ اوخونان اثرلردندیر.)

گولر چيچکلي ياز امل‌لرينله،
اولسا آل گونشه پاک اعتقادين.
بزه‌نر دونياميز گول ال‌لرينله،
سن‌ده بير باهارسان قادين اي قادين!

کيشي‌‌لر اولسادا توپراغا قدرت،
سنسن سفرلرده مين جوره نعمت،
مقدس انسانلار ائتدين تربيت،
نبي‌لر، بابک‌لر سنين ائولادين؛
دونيايا بزکدير آدين اي قادين!

باخيرام تاريخه باغريم اولور قان،
نه قارا عصيرلر کئچيب باشيندان،
کهنه نظاملارين داش يادداشيندان،
باغلاندي ايللرله قولون، قانادين؛
دونيايا بزکدير آدين اي قادين!

قيز اولدون چؤللره آتديلار سني،
قول دئييب بازاردا ساتديلار سني،
حرمسرالارا قاتديلار سني،
لاکن باش اگمه‌دين اؤنونده يادين؛
دونيايا بزکدير آدين اي قادين!

گاهدان حجر آدلي سن قوچاق اولدون،
خانلارين باغرينا بير پيچاق اولدون،
پاشالار اليندن سن قاچاق اولدون،
قيردين زندانلارين سولو پولادين؛
دونيايا بزکدير آدين اي قادين!

گاهدان يولداش اولدون قوچاق سردارا،
مشروطه اوغروندا آلدين مين يارا،
دؤزدون ايشکنجه‌يه، چکيلدين دارا،
استبداد اؤنونده قالخدي فريادين؛
دونيايا بزکدير آدين اي قادين!

بيلميرم آناسان، قيزسان، گلينسن،
آنجاق بونو دويوب دوشونورم من،
بو گؤزل حياتين زينتي‌سن سن،
سنسيز کيم آنلاردي حياتين دادين،
دونيايا بزکدير آدين اي قادين!

علمله، هنرله سن مغرور ياشا،
جان وئرسين قدرتين توپراغا، داشا،
وقارين تماشا، عؤمرون تماشا،
ياييلسين عالمه  شهرتين، آدين؛
دونيايا بزکدير آدين اي قادين!

اؤزونه لايق‌ده بالالار بسله،
ائللري صلح ايچره حياتا سسله،
کام آلسين دونيادان انسان هوسله،
گول آچسين طالعين، آرزون، مرادين؛
دونيايا بزکدير آدين اي قادين!

5 پاسخ

  1. من سایین حبیب فرشباف”ین بو شعرینی (قادین إی قادین)بو ایکیمینجی دفعه دیر کی اوخویورام و قادینین تاریخ بویو باشینا گلن مصیبت لری چوخ گؤزل نظمه چکمیش و منده بو شعری فیسبوک صفحه مده یوزلرجه دوستلاریملا پایلاشدیم کی بلکیده بو گؤرکملی شاعیریمیزین بو دییرلی اثرینی دیگر دوستلارا و همشریلریمیزه ده تانیتتیرمیش اولابیلم.

  2. سلام عزیزدوست حبیب اقافرشباف ایلک بایرامینیزی موبارک اولسون دئییم قادین شعریندن چوخ خوشوم گلدی درین مضمونواولدوغوناگوره سیزه قلمینیزه ساقلیق ارزیلاییرام چوخداندی استارایاتشریف بویورموسوز حرمتلی خانیماو وقارقیزینیزاسلامیمی چاتدیرین یولونوزی گوزله ایرم.ساقولون..

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *