قادین ای قادین
حبیب فرشباف
(بو شعر 1392ینجی ایل، سایتیمیزدا ان چوخ اوخونان اثرلردندیر.)

گولر چیچکلی یاز امل‌لرینله،
اولسا آل گونشه پاک اعتقادین.
بزه‌نر دونیامیز گول ال‌لرینله،
سن‌ده بیر باهارسان قادین ای قادین!

کیشی‌‌لر اولسادا توپراغا قدرت،
سنسن سفرلرده مین جوره نعمت،
مقدس انسانلار ائتدین تربیت،
نبی‌لر، بابک‌لر سنین ائولادین؛
دونیایا بزکدیر آدین ای قادین!

باخیرام تاریخه باغریم اولور قان،
نه قارا عصیرلر کئچیب باشیندان،
کهنه نظاملارین داش یادداشیندان،
باغلاندی ایللرله قولون، قانادین؛
دونیایا بزکدیر آدین ای قادین!

قیز اولدون چؤللره آتدیلار سنی،
قول دئییب بازاردا ساتدیلار سنی،
حرمسرالارا قاتدیلار سنی،
لاکن باش اگمه‌دین اؤنونده یادین؛
دونیایا بزکدیر آدین ای قادین!

گاهدان حجر آدلی سن قوچاق اولدون،
خانلارین باغرینا بیر پیچاق اولدون،
پاشالار الیندن سن قاچاق اولدون،
قیردین زندانلارین سولو پولادین؛
دونیایا بزکدیر آدین ای قادین!

گاهدان یولداش اولدون قوچاق سردارا،
مشروطه اوغروندا آلدین مین یارا،
دؤزدون ایشکنجه‌یه، چکیلدین دارا،
استبداد اؤنونده قالخدی فریادین؛
دونیایا بزکدیر آدین ای قادین!

بیلمیرم آناسان، قیزسان، گلینسن،
آنجاق بونو دویوب دوشونورم من،
بو گؤزل حیاتین زینتی‌سن سن،
سنسیز کیم آنلاردی حیاتین دادین،
دونیایا بزکدیر آدین ای قادین!

علمله، هنرله سن مغرور یاشا،
جان وئرسین قدرتین توپراغا، داشا،
وقارین تماشا، عؤمرون تماشا،
یاییلسین عالمه  شهرتین، آدین؛
دونیایا بزکدیر آدین ای قادین!

اؤزونه لایق‌ده بالالار بسله،
ائللری صلح ایچره حیاتا سسله،
کام آلسین دونیادان انسان هوسله،
گول آچسین طالعین، آرزون، مرادین؛
دونیایا بزکدیر آدین ای قادین!