سوسما عزیز دوستوم!
حسین مصری

باخیشیم آسیلی قالدی گؤزومده
نه آغلایا بیلدیم، نه دینه بیلدیم.
یاپیشدیم الیندن، بیرآددیم پیلله
نه قالخابیلدیم من،نه ائنه بیلدیم.

باخیشلارین سویوق، اللرین ایستی،
هئچ اؤزلشمه‌میشم بوتضادلا من.
اوره‌ک سؤزلرینی اوخویا بیلدیم-
او قالماقالدا من، او احوالدا من.

گؤزلرین نیگران، گؤزلرین توتغون
قاییتماق ایستیرسن یوخسا دوننه؟!
اه! ساکیتجه‌سینه فیکیرلشیرسن
اؤلومله حیاتین سون سرحددینه.

سوکوتلا آنلاری اوخشاساندا سن
سایریشیر باخیشین ماوی سمادا.
سوسما عزیز دوستوم! آرزین، اینامین-
سونسوز بیر دنیزدیر، اؤزون بیر آدا.