بو سئوگی…
حسین مصری
آغلایاندا دا منله‌دیر
گولنده ده منله
دوغما دئییل
آنجاق منیمله.
بو سئوگی منیم اینان
قارشیما چیخمادی
نه بولاق باشیندا
نه اؤترگی بیر باخیش آستاناسیندا.
بلکه ده نه بیلیم
مندن اؤنجه
دار آغاجی‌نین
ایپیندن آسلانیب
آغلارمیش دئمه.
بو سئوگی منیم
سول یؤنوم ده
آجییان -آغرییان
دونیا بویدا بیر نوقطه‌دیر.
یوخ! ..یوخ!
بو سئوگی منیم طالعیم‌ایمیش
من محکومام بو طالعه.
قنیم کسیلسه ده
بو طالع منه
خوشبخت سانارام اؤزومو من.
یاز- تبریز- ۹۷
