بیر دیقه ایچینده
ع.ن. چاپار

بیر دیقه گؤزومو آچاجاغام.
بیر دیقه باخاجاغام سنه.
بیر دیقه ایچینده دانیشاجاغیق.
سن دردلریندن دئیه جکسن
و من
قولاقلاریمدا آغلایاجاغام؛
گؤزلریم گؤره – گؤره…
نه الیم سنه چاتاجاق،
نه سؤزوم !.

بیر دیقه سوندا،
سن یورقون – یورقون،
باشینی یئره دیکه‌جکسن.
داها دانیشمایاجاغیق.
هئیکلین سوکوت ایچینده قیشقیراجاق.
محیطیمیز دیکسینه‌جک،
و من
سنین درد هئیکلینی،
قولاقلاریمدا دینله یه – دینله یه
گؤزلریمده آغلایاجاغام!
نه الیم سنه چاتاجاق –
نه سؤزوم . . .