بوردان بیر آتلی کئچدی / حبیب فرشباف
چئویرن: حبیب فرشباف
ترجمه: حبیب فرشباف
حبیب فرشباف
00:00
00:00

hebib
بوردان بیر آتلی کئچدی
حبیب فرشباف

صفرخان قهرمانی‌نین شرفلی خاطیره‌سینه

کوره‌‌یی زولاق – زولاق
اوره‌یی زولاق – زولاق
گئجه‌سی آه،
گوندوزو آه،
اربابلارین دونیاسیندا
رعییت‌لیک بؤیوک گوناه!…
اوجا داغ باشیندا
بیر آت کیشنه‌دی،
اسدی داغدان داغا بو سس؛
آخدی بولاقدان بولاغا
چاتدی قولاقدان قولاغا بو خبر:
– بوردان بیر آتلی کئچدی
آدی صفر!

توفنگی‌نین نعره‌سیندن

زاغ – زاغ اسدی سارایلار …

یاخالاندی …

آیری دوشدو سیلاحیندان، آتیندان

تک بئش آددیم بئله گئتدی

قاباق دووار!
تک اوچ آددیم‌دا بئله…
آزاد انسان،

بو دار قفس!
یَل هئیکلی یئر‌لشسه‌ده
سیغماز اولدو سئللول‌لارا،
اولو آرزولار چتینسه‌ده،
قهرمانجا اؤلوملردن،
قهرمانجا یاشاماق!
او یاشادی…
اونوتمادی ایلقارینی،
اؤلکه – اؤلکه قاناد آچدی
دایانیشی، شؤهرتی.
اؤز عؤمرونو تک اوتاقدا
او بیر دونیا یاشادی.

گؤیدن اوچ آلما دوشدو…
دیل‌لرده قالدی آدی،

هله بلکه آنالاردا

ائل اوغلونا بایاتی‌دا سؤیله‌دی:

“بوردان بیر آتلی کئچدی
آتین اویناتدی کئچدی
آی کیمی شفق ساچدی
گون کیمی باتدی کئچدی”
۲۰/۱۰/۸۲

اشتراک گذاری در print
چاپ
اوخوماق زامانی: < 1 دقیقه
اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email

بوردان بیر آتلی کئچدی / حبیب فرشباف

حبیب فرشباف
www.ishiq.net

آذربایجان ادبیات و اینجه‌صنعت سایتی