حبيب ساهر: تورکجه يازان هر شاعره آلقيش اولسون، آلقيش اولسون!
میانالی علیرضا
خالقينا باغلي، تورپاغينا، وطنينه حيران اولان شخصيتلريني اونودان خالق گله‌جه‌ييني اوغورلي، ساغلام و کيفيتلي قورا بيلمز-دئميشلر. شوکورلر اولسون کي، ساوالاديغيم کيفيتلره مالک گله‌جه‌ييميز اولاجاق. نييه کي، گئج ده اولسا ياواش-ياواش ميلتيميز اؤز آدليم شخصيتلريني، وطنه، توپراقا باغلي انسانلاريني عزيزله‌مه‌يه، اونلارين صنعت‌لريني ده‌يرلندير‌مه‌يه باشلاميشدير. خالق آراسيندا جريان ائدن، قولاقدان-قولاغا دولاشان بؤيوک‌لريميزدن ائشيتديييم بئله بير سؤزده وار: ياخشی انسانلاردان دانيشاندا بير چوخ ديگر ياخشي‌لاردا يادا دوشور. سئويملي صنعتکاريميز، قوجامان شاعر مرحوم حبيب ساهرله باغلي دوشونجه‌لريم منی گؤره‌ک هارايا يا خود کيملري ياد ائتمه‌یه چه‌که‌جکدير.
شبهه سيز کي، ان باشدا اؤز ملتينين بؤيوک زحمتيني چکن، معاصر ادبياتيميزين انکشافي يولوندا اونودولماز خدمت‌لر گؤسترن ادبيات شناس عالم، شاعر، ژورناليست “استاد يحيي شيدا” بو کاروانين اؤن سيراسيندا گئدن‌لردن‌دير. اوزون ايللرين زحمتي حسابينا ايشيق اوزي گؤرن اونون بير اثري‌نين آدي بئله‌دير: ادبيات اوجاغي!
بو هامييا آيديندير کي، هر هانسي ملتين اؤز دولتي اولور، او دولتين حسابينا، او ملتين ملي ده‌يرلري‌نين بوتون ساحه‌لريني احاطه ائدن و ايشيقلانديران ائنسکلوپئديياسي ياراديلير. بيزيم اؤلکه‌يه اوخشار اؤلکه‌لرده حاکيم- محکوم ملت‌لر پرنسپي جريان ائتدي‌ييندن محکوم ملت‌لره خاص اولان ملي ده‌يرلرين نشري، تبليغي، انکشافي دايانديرلميش‌دير. دولت سويه‌لي بو نهنگ ايشين قارشيسي آلنيميش، ساغلام پراسئس اولماديغيندان انسانلارين شعوريندا، دوشونجه‌سينده، ياشاميندا، اجتماعي – سياسي مناسبتده تاثير گوجونه مالک ايزلر بوراخميشدير. دولتين ياد مناسبتينه باخماياراق ملي ده‌يرلريميزين انکشافي و تبليغي يولوندا ياراديجي انسانلاريمیزين امه‌يي آز اولماميشدير. ائله او باخیمدان استاد يحيي شيدا ملتيميزين ادبيات اوزره تام اولماسادا ائنسکلوپئديياسيني يارادان ياراديجي شخصيت لريميزدن اولموشدور.
استاد شيدانين “ادبيات اوجاغي” ني ادبياتيميزين اينسکلوپئديياسي آدلانديريرامسا، گؤره ک کؤورک دويغولارين ترنمچوسي, اونودولماز شاعريميز حبيب ساهر حاقيندا اوندا هانسي معلوماتا راست گلمک اولار؟ قئيد ائتمک يئرينه دوشرکي، آديني چکديييم کتابين بيرينجي جلدي 1364- جي ايلده تبريزين “نوبل” کتابخاناسي طرفيندن شفق مطبعه سينده 588 صحيفه ده چاپ اولموشدور. اونون ايکينجي جلدي، ايکي ايل سونرا 1366- جي ايلده همن نشريات طرفيندن 698 صحيفه ده چاپ اولموشدور. ادبيات اوجاغي‌نين ايکينجي جلدي نين 281- جي صحيفه سينده حبيب ساهر حاقيندا بئله بير معلوماتا راست گلمک اولور:
مير حبيب ساهر 1282- جي ايلده تبريزده آنادان اولدي. او ادبياتيميزدا رباعي شعرلري ايله واؤزونه مخصوص اسلوبي ايله بؤيوک مقام الده ائدي. ساهر ابتدائي و اؤرتا تحصيليني قورتارديقدان سونرا استانبولا گئتدي. جغرافي فاکولته سيندن ديپلم آلدي. معلم ليک ائتدي. زندانا دوشدي. سورگون اولدي. خلاصه باشينا دنيانين مصيبتي گلدي. لاکين، او قوجامان داغ کيمي داياندي. اؤز مخالف لرين قدرتدن سالدي. ساهير نظم ده، نثر ده فاناتيزم عليهينه وخالق دوشمن‌لرينين ضدينه قلم ووروب ديکتاتورلوغون ديش قيجيرتديغي ايللرده کي، هر کس اؤز کؤلگه سيندن قورخوردي يازيب-ياراتدي. ساهير آزاده ليک و حريت شاعري دير. اونون شعر و نثر قلمي بير فسونکار رسام فيرچاسي قدر طبيعتين و انسان روحونون اينجه ليکلريني و ياراشيقلاريني دوغرولتماقدا ساحر دير.
بو قيسا، کانکرئت و ده‌يرلي راي استاد شيدانين ادبيات اوجاغي کتابيندا معاصر شعريميزين بايراقداري حبيب ساهر حاقيندا يازيلان سؤزلردير. بونونلا دا همن کتابدا علاوه اولاراق حبيب ساهرين شعرلريندن 6- سيني‌دا اوخوماق، او شعرلردن فايدالانماق شرايطي ياراديلميشدير. او شعرلرين سونونجو سو “سورگونلر” آدلانير:
سحر واختي کؤوشن‌لري بزه‌ين
يئني- يئني آچان ساري گوللر دير.
آخشام چاغي ياپراقلاري ترپه دن
ساري داغدان آشيب گلن يئللردير.
ياي گئجه سي هاي- کوي سالان قافله
سورگون لردن دؤنوب گلن ائللردير.
خاطره‌لريميزي، يادداشيميزی شوملايان، اوزاق دئييل ياخين تاريخيميزي آنديران، شعرده گئدن سورگونلر شبهه‌سيز کي، 21 آذر حرکاتي نين مغلوبيتيندن سونرا سورگون اولان، ديدرگين دوشن انسانلاريميزدان دانيشير، سؤز آچير. بو آجي طالعی ياشايان سورگون لردن دؤنوب گلن ائللرين ايسته‌يي، آرزوسو، محکوم اولدوغو گوناهين اوزه‌رينده دايانماق، بلکه ده شعرينده اساس قايه سيني آچپقلايا بيلر!
1945- جي ايلده يارانان آذربايجانين ملي حکومتي خالقيميزين اجتماعي اقتصادي و سياسي حياتي‌نين بوتون ساحه‌لرينده اساسلي ده‌يييشکليک‌لر عمله گتيره بيلميشدير. او جمله‌دن يارديجي انسانلاريميزين معنوي و بديعي تفکر عالمينده يئني دؤور آچميشدیر. ادبيات و اينجه صنعتيميزه معنوي قايدا، يئني ايلهام بخش ائتميشدير. ادبياتيمزين ان قاباقجيل قوللاريندان اولان شعر صنعتيميزين ياراديجيلاري ملي حکومتدن ايلهام آلارق “صنعت، صنعت اوچون دئييل- صنعت خالق اوچون دور” شعاري ايله چيخيش ائتمه يه باشلاديلار.بو دؤورلرده و اوندان سونراکي ايللرده، صميمي حس‌لر شاعري حبيب ساهرين ياراديجيليغي هم ايدييا-مضمون، هم ده بديعي کيفيت باخيميندان داها دا يئتگينلشميشدي.
آذربايجان ملي حکومتي دؤوروندن باشلاياراق حبيب ساهر اؤز شعرلري ايله آرديجيل شکيلده حرکاتدا اشتراک ائتمه يه باشلاميشدير. فيلولوگيا علملر نامزدي وفا علي يئو “حريت فدائيسي” آدلي مونوگرافياسيندا يازير کي، شاعرين اثرلري ايستر ملي حکومت دؤورونه قدر و ايسترسه ده اوندان سونراکي دؤورلرده خالقين انقلایي مبارزه‌سينده مهم اهميت کسب ائتميشدير. او هميشه حقوق‌سيز خالقي‌نين آرزو و ايستک لريني ترنم ائدن قاباقجيل بير شاعر اولموشور.
1945- جي ايل يئني دؤورون آچيليشي ايله سئوينن شاعر” 1945- جي ايله” آدلي شعرينده يازيردي:
سؤندي قانلي شفق لرين 1945- جي ايل
صدف رنگلي فجر آچيلدي صحرا لار دا، دنيزده.
قان آغلايان دنيا گولدی، آچدي عمل گوللري
دنيا خالقي سئوينرکن گولومسه دي تبريز ده.
آزادليغين بايراغيني ارکين اوسته تاخديلار،
يئنه سؤنموش معبدلرده شعله لري ياخديلار.
وفا علي‌یئو علاوه ائديرکي، رئال حيات حادثه‌لريني بديعي تفکرون يوکسک ذيروه سينه قالديران حبيب ساهر اجتماعي قورولوشون دوغوردوغو حاقسيزليقلارا و دهشتلره قارشي اؤز عصيانکار سسيني اوجالديردي. ملي حکومتين اؤلکه نين اجتماعي حياتيندا ائتدي يي اونودولماز ده‌ييشيکليک لري گؤرن شاعر يازيردي:
اکينچي يه تورپاق وئردي.
چؤره ک وئردي، چيراق وئردي.
مکتب تيکدي، فابريک قوردي.
يوردون ده مير قاپي سيندا
کئشيک دوردي …
قيزيل گول له بزنديلر
اورميه، خوی، مرند، تبريز!
آنا ديلي اؤيرندي لر،
اوزاق، ياخين ائللريميز…
وفا علی‌یئو حبيب ساهره حصر ائدييي “حريت فدائيسي” آدلي مونوگرافياسيندا بو نتيجه‌يه گلير کي، حبيب ساهر يارديجيليغينا گوجلي بير رومانتيکا حاکم دير. او یازیر کی,.اونون ليريک شعرلرينده خيال نه قدر قوتلي اولور- اولسون، او جمعيت‌له، حيات‌لا بير او قدر دريندن باغلي‌دير. ايستک‌لري دوغما خالقيني آزاد و خوشبخت گؤرمکدير.
حبيب ساهرين شعرلري اجتماعي حياتدان، رئال وارليقدان کناردا قالماييب، اساسا دوغما وطنين آزاد گله‌جه‌يي‌نين ترنومونه حصر ائديلميشدير
آذربايجان ملي حکومتينين اصلاحات پروگراميندا بيرينجي سنگر آناديلي اولموشدي. ملي حکومتين باش ناظري سيد جعفر پيشه وري دئييردي: بيزيم نهضتيميزين ملي خاصيتيندن بيريسي ديل مسئله سي دير. او بو حاقدا بئله بير فيکير ايره لي سوروردي: بيز ايندي هر جور گذشت ائتسکده ديل مسئله سينده گذشته کئچمه‌ريک. بو فيکيرين ايضاحیندا ايسه او قئيد ائديردي: سياسي مبارزه ده دالي-قاباق گئتمک اولار، لاکين اساس سنگر الدن وئريلسه مغلوب اولماق اولار. بيزيم ده ديل مسئله ميز اساس بير مسئله دير.
شاعر حبيب ساهر ايسه دوغما آنا ديلينده يازيب ياردان قلم صاحب لريني اوره کدن آلقيشلاياراق يازيردي:
گؤروم کؤنول گولذارينا
سحرلردن ايشيق دولسون.
او وطنين باغچاسيندان
نه قوش اوچسون، نه گول سولسون.
تورکجه يازان هر شاعره
آلقيش اولسون، آلقيش اولسون.
او زامان حبيب ساهرين تورپاغا، يوردا، ائله، اوبايا جان-ديلدن وورغون اولدوغوني گؤرن بعضی سول دوشونجه‌یه منسوب اولانلار اونون بو داورانيشينا، فيکرينه منفي مناسبت بسله‌ييردي‌لر. تاسف لرکي، ادبياتيميزين انکشافي يولوندا اونودولماز زحمت‌لري اولان ادبيات شناس عالم جعفر خندان دا حبيب ساهر حاقيندا بير يازيسيندا منفي راي له چيخيش ائديردي.
وفا علي یئوین يازديغي کيمي دئسک، ادبيات شناس عالم جعفر خندان، حبيب ساهر ياراديجليغي نين بو دؤوروندن بحث ائدرکن شاعرين رومانيتيزمی اوزرينده خصوصي دايانير. او يازير: جنوبي آذربايجاندا ملي-آزادليق حرکاتي دؤورونده يارانان رئاليست ادبيات لا بير سيرادا مجرد رومانتيکايا دا راست گليريک کي، بونوندا گؤرکملي نماينده سي حبيب ساهردير. ائله جه ده علاوه ائديرکي، عموميت له، معاصر جنوبي آذربايجان يازيچي لاري نين ياراديجيليغي اوچون مجرد رومانتيکا سجييه‌وي دئيلدير. استانبولدا تحصيل آلان تک-تک ضيياليلار دا ايسه بيز بوني گؤروروک.
منجه بو سؤزلرين، فيکيرلرين هارادان باش آليب گلدي ييني حس ائتمک چوخدا چتين دئييل دير. ادبيات شناس عالم جعفر خندان، حبيب ساهر يارديجيليغيني دئييل، یالنیز فرقلي اولان باشقا دوشونجه سيستيميني بو يازيسيندا تنقيد ائدير. يوخسا بير آز اول تقديم ائتدي ييم شعرده هانسي مجرد رومانتيکادان سؤز آچماق اولار؟
گؤروم کؤنول گولذارينا
سحرلردن ايشيق دولسون.
او وطنين باغچاسيندان
نه قوش اوچسون، نه گول سولسون.
تورکجه يازان هر شاعره
آلقيش اولسون، آلقيش اولسون.
بو معنادا گؤزه‌ل صنععتکاريميز، صميمي حس لر شاعیري، تورپاغا، یوردا وورغون حبیب ساهرین اؤزونه ده آلقیش اولسون، دئمک تام يئرينه دوشر. نييه کي، بو شعرده مذاکره يه بوراخيلان موضوع وطنه، يوردا گره‌ک اولان ان تميز حس لردير، لکه سيز دويغولاردير. ملته ايسه اميد، روح يوکسکلييي و اينانج يئري دير. آدينا نه دئييلیرسه، بيزيم قايساق باغلايان ياراميزي ائشه‌له‌يندي. بيزي اؤزوموزه قايتاراندي. اؤز ملي وارليغيميزا تاپينديراندي. تورکجه يازان هر شاعره آلقيش اولسون مفکوره سي ايسه ملتيميزين ملت روحلي، وطن ايناملي، يوردعطيرلي آدي اونودولماز صنعتکاريميز حبيب ساهرين خير- دعاسي دير. آرزوسودور، اميدي دير، اينانجي دير
بير چوخ لارينين يازيلاريندا حبيب ساهر ياراديجيليغي حاقيندا آيريليقدان يازان، حزنیلي شاعر، نیسگيلدن دانيشان- حسرتلي شاعر کیمي ايفاده لر چوخ- چوخ سسلنديريلير. بو سبب دن اؤنجه قيد ائتدي ييم موضوع يا فيکريمي يئني دن قايتارماق ايسترديم. ياخشي انسانلاردان دانيشيلاندا، بير چوخ باشقا ياخشي لاردا يادا دوشور قيد ائتميشديم. ياديما معاصر آذربايجان شاعري گؤزه ل صنعتکاريميز رامیز روشن‌ين هاچانسا آذربايجان راديو وئرليشلري‌نين بيرینده شعر حاقيندا سؤيله‌دييي فيکيرلر دوشور. او بو وئريليش ده بئله بير فيکير ايره لي سورور: دئييرلر کي، فلان شاعر اوخوجي ايله چوخ صميمي دير. او در حال بو قناعته گلير کي، شاعر اوخوجو ايله دئييل باشدا اؤزي ايله صميمي اولمالي دير. بو معنا دا حبيب ساهر ياراديجيليغينی ايزلرکن، اونون اثرلريني تکرار- تکرار گؤزدن کئچيررکن، باشي آسمانا ديره‌نن داغلاريميزين دؤشوندن آخان زولال بولاقلايميزين سويو کيمي صاف، دوري و تميز اولان بو شعرلرين تکرارلانماسي، بو قايیديب يئنه اوخوماق شخصا من اوخوجوني يورمور. اونا گؤره يورمورکي، اونلارين هره سي اؤزلويونده اوريژينال بير صنعت اثري دير. هئچ بيری باشقا سيني تکرارلامير. باشقا سيني دئييل، اؤزوني تکرارلاسا بئله يئنه کؤنول اوخشايير. تکرار مراجعت يوخ، باشقاسيني تکرارلاماق يوروجودور.
هئچ بير اوريژينال اثر نه قدر تکرار اوخونسادا، مراجعت اولونسا دا گونده ليکدن دوشمور. سئويملي شاعريميز حبيب ساهر ياراديجيليغي کيمي. اونون خيال دنياسي‌نين رومانتيک اولماسي نين نه دني وار، سببي وار. اولو بير ملتين چوخ عصرلي ادبيات تاريخيني منيمسه‌ين بير يارديجي ائني-اوزوني، بويي و چکبسي تام آيدين، تام دقيق هانسي ده‌يردن تام اولاراق سؤز آچا بيلر؟
محتشم بو تاريخي ياد ائدن ياراديجي بير صنعتکار بو بويدا فاجعه ني حس ائده- ائده، محکوم ادبياتيني گؤره-گؤره مطلق حسرت بويالي، آيريليق ندالي، حزينلي و ليريک دوشونجه‌لي چيخيش ائتمه‌يه اوز توتاجاقدي. او صنعتکار ائله تام معناسي ايله سئويملي شاعريميز حبيب ساهر اولاجاقدي.
ايکينجي دنيا محاربه سي ايللرينده قيزيل اوردونون ايرانا داخيل اولماسي ايله قيزيل اوردو ترکيبينده تبليغ اوچون تبريزه گلن لر سيراسيندا جعفر خندان دا وار ايدي. ادبيات شناس عالم جعفر خندانين اؤز اينانجيندان اوزاق حبيب ساهر حاقيندا دئدیيي راي سونرا کي، ايللرده بيزيم دوشونجه‌ميزي تصديق ائتدي. سهو ائتميرمسه جعفر خندان‌دا سونراکي ايللرده سيبره سورگون اولان ضيالي‌لاريميزدان بيری اولدي. اودا ا. استالين حکومتين‌نين غضبينه توش گلدي.”آذربايجان”مجله سي‌نين 1946- جي ايل بير يئرده نشر اولان 11 و 12- جي ساييندا يازيچي مهدي حسين “حبيب ساهر” باشليقلي يازيسيني بئله آچير:
ايران آذربايجاني‌نين معاصر شاعرلري ايچه ريسينده حبيب ساهرين ده آدي حؤرمتله ياد ائديلمکده دير. شبهه يوخدورکي، او، سون درجه اوریژينال استعدادا مالک شاعر دير. اونون اثرلرينده اؤزونه مخصوص گؤزه ل خصوصيتلر آز دئيیل دير. ساهرده ان چوخ نظري جلب ائدن بير جهت حادثه‌لره اولدوقجا صميمي و هيجانلي مناسبت گؤسترمسي‌دير. اونون شعرلرينده ايفاده اولونان فيکيرلر، بديعي صورت لر و بديعي تصويرلر يولي ايله ایفاده اولونور. شاعر چاليشير کي، بدیعي لوحه لر اؤزي اونون آماليني اوخوجونون قلبينه ياخينلاشديرسین. اوندا هيجان اوياتسين. البته بو دوغري يولدور. قزئته چي ايله شاعرين ده فرقي بوندادير.
يازيچي مهدي حسين بو مقاله سينده نهايت جعفر خندان کيمي رايه گلسه ده ساهر ياراديجيليغيني اصل شاعر ياراديجيلیغی کيمی قبول ائتمه‌سيني‌ده اونوتمور، گیزلتمير. گؤرونور اودا جعفر خندان کيمي فيکري نه دئييرسه کؤنلو اونون تام عکسيني سؤيله يير، او يازير کي، عموميتله، ساهرين بديعي اثرلينده ليريک بير حقيقت‌ليک و صميمي‌ليک واردير.
شبهه سيز کي، بودا اصيل صنعت اثري نين ان لازيم و گره ک اولان حصه سي دير. قالان نه وارسا صنعت اثرينه ياماق‌دير، جالاقدير. بيزيم نظريميزجه قوزئي آذربايجاندا 1920- جي ايلدن سونرا سوسياليزم قوروجولوغوندا ملي-دئموکراتيک دوشونجه سيستمي‌نين قارشيسي نين آلينماسي 1945- جي ايلده گونئي آذربايجاندا ملي حکومتين يارانماسي ايله يئني‌دن حرکت ائتمه‌يه، داها دوغروسي يئني دن جوجرمه يه باشلاميشدير. بو آخين، بو روح ايسه اساسا او دؤوورده قيزيل اوردو ترکيبينده سوسياليزم قوروجولوغونون تبليغاتچي لاري کيمی باکي‌دان تبريزه گلن نماينده‌لر طرفيندن داشينميشدي. بو فاکت ايسه تبريزه گلن همن يازيچي- شاعرلرين 1945- جي ايلدن اؤنجه و سونراکي، ايللرده يازيلان اثرلري نين آرديجي آراشديرماسيني اصل منبع لردن بيري کيمي گؤسترمک اولار. بو مفکوره نين اوزه رينده دقيق سؤز دئمک باشقا بير يازي طلب ائدير. اميد کي، ياخين گله جکده اونادا نائيل اولاق. سونرا کي، دؤورلرده قوزئي آذربايجاندا ملي دئموکراتيک دوشونجه سيستمي نين سرعت گؤتورمه سي تکجه بيزيم ايره لي سوردويوموز مدعالار دئييل، بير سيرا باشقا عاملين اولماسي داهادا تا’ثير گوجونه مالک اولموشدور. او جمله دن ان باشليجا سبب ديلين اورادا آزاد اولماسي، تحصيل سيستمي نين آنا دیلینده يارانماسي، ملي مدنيتيميزين انکشافی، ملي ده‌يرلريميزدن اولان موسیقی میزین داها سرعتلی حرکت ائتمه سی بو يولی هامارلاميشدي و گونئی آذربايجانا دا سونراکي، دورغونلوق ايللرينده اؤز تاثيريني گؤسترميشدي. او جمله دن حبيب ساهر ياراديجيليغينا.
حبيب ساهریارادیجیلیغی حاقيندا قوزئي آذربايجانين ادبيات شناس نماينده لري ايله ياناشي گونئي آذربايجانين ادبيات نماينده‌لري‌ده ده‌يرلي فيکيرلر ايره‌لي سورموش. باشدا، همن سيرادان استاد يحيي شيدا نين فيکيرلريني مذاکره يه چيخارماغا اساسلانديق.
حبيب ساهر حاقيندا ادبياتيمیزين تانينميش آغ ساققاللاريندان استاد محمد علي فرزانه دؤنه-دؤنه فيکيرلر سؤيله ميش، اثرلري حاقيندا مثبت و ده‌يرلي راي‌لرله چيخیش ائتميشدير. خالقيميزين چاليشقان و ياراديجي اوغلانلاريندان حسين دوزگون- صديق، اؤز مطبوعات اورقانلاريندا تکرار- تکرار حبيب ساهر ياراديجيليغينا مراجعت ائتميش، شاعر حسن ايلديريم اونون حاقيند تدقيقات آپارميش و بير چوخي حبيب ساهر شخصيتي و ياراديجيليغينا شعرلر يازميشدير. مهندس عليرضا صرافي ايسه حقيقتا ساهر ياراديجيليغيني تبليغ ائدنلريميزدن بيری اولموشدور. حبيب ساهرين انقلاب ايللرينده چاپ اولان “ سحر ايشيقلانير” آدلي اثري مهندس عليرضا صرافي‌نين امه‌يي حسابينا ايشيق اوزو گؤرموشدي. اونونلا بيرليکده گؤزه‌ل شعرلر مولفي، فسونکار قلم صاحبي سحر خانيم اردبيلي نين حبيب ساهر شعرلريندن بيرگه حاضرلاديقلاري کاست ايندی ده منيم يادداشيدا دولاشیر. نه اينکي ساده جه يادداشيدا بلکه ان عزيز و کؤنول اوخشايان بير هديه کيمی واخت آشيری دينله دي ييم و ذوق آلدييم اولموشدي.
حبيب ساهرين ایزی ايندی بوتون گونئي آذربايجان شاعرلري نين اثرلينده اؤزوني آچيق گؤسترمه سه ده، معاصر آذربايجان شاعري بختيار نصرت بير نؤوع حبيب ساهر ياراديجيليغي نين داوامچيسي کيمي چيخيش ائتميشدير. اميد ائديريک کي، بو يول باشقا- باشقا چالارلارلا داها زنگينلشسین. وطنیمیزین ياراديجي اوغوللاري، قيزلاري او يولي سؤنمه يه قويماسين. او يول حبيب ساهر يولي ملي کيمليييميزه اساسلانان، ملت روحونا سؤيکه نن، معنوياتيميزدان کئچن، عادت-عنعنه ميزي ياشادان يولدي. او حقيقتا ادبياتيميزين، خصوصا شعريميزن يول گوستريجي لريندن اولموش، اومانيست روحلي، انسان خاصييتينه اينان ياراديجي صنعتکاريميزدير. اونون حاقيندا داها گئنيش يازماق اولار. اونون ياراديجيليغي نين ايلک دؤورلري حاقيندا و اونون رولي اطرافيندا گئنيش معلوماتلا چيخيش ائتمک اولار. 1945- جي ايل حرکاتيندان سونرا کي ايللري- او دورغونلوق ايللري خاطرلاماق اولار و يازماق اولار. ايران-اسلام انقلابي ايللر و حبيب ساهر ياراديجيليغي موضوع سوندان بحث ائتمک و گئنيش يازماق اولار. اونون آنا ديليميزده يازديغي کؤنول اوخشايان نثرلري حاقيندا گئنيش معلوماتا توخونماق اولار. اميد کي، گله‌جکده صادالانان بو اولايلار حاقيندا صحبت آچماق امکاني ياراناجاقدير.
یک پاسخ
علیرضاجان سلام دوست دارم ایمل ادرس شمارا داشته باشم.جاوید