شافتالیلار جالاندی،
ملان منیم بالامدی.
هاممی قویوب گئدندی،
ملان منه قالاندی.
– ائله بیل، «کئفلی ایبیش» گلیر!
– هه، اوزودور. چوسسوزلارا گیرندن محلهنی آلیر باشینا، سسی بیر آغاجدان گلیر.
– قوی گلسین، بیرآز ایپ باغلییب گئدیب یاتاریق.
– نه ایپ باغلاماسی، اونو الله ویریب دا، سن نییه ساتاشیرسان؟
– جوما آخشامی گئجه یاریسینا قدهر آییق قالمیشیق نهیه؟
– آییق قالمیسان ایبیشه بند اولاسان؟
– هن بابا، ایپیمیزی ائشیبدیر. هر گئجه کنسرتی واردی. بیزیم ائو ده کی یول اوستوندهدیر، بو ماهنینی هر گئجه ائشیدیریق.
– یاخشی دا، موفته کنسرته قوناقسیز.
– بابا نه کنسرتی! ائله بو بندی باشاریر. ائله بیلیرم کی پاساژدان چیخاندان ائوینه تپیلینجاق بو تیکهنی اوخویور. ایکینجی بندیندن خبر یوخدور.
– ائله او دا غنیمتدیر.
– هله هاراسین گورموسن! ایندی عسگرباققال چیخاجاق معرکه قورسون.
– او نییه؟
– دایان گوررسن.
ایبیش آشا – آشا گلیر. کوچهنین ائنینده گئدیر، بویوندا. خرزی باغینا یئتیشر، عسگر باققال تومان اینینده بودور چیخیر ائششیه.
– گئده بس سنین شرفین یوخدور؟ سنین ننهن- باجین یوخدو؟ گئده بس سن نهواخت آدام اولاجاقسان؟ من سنه نئچه یول دئییم بوردا اوخوما، بونو اوخوما؟
– آخی عسگر عمواوغلوووو … بس هاردا اوخویوم، بس نمهنه اوخویوم؟
– هر نه اوخویورسان اوخو دا،. بونو اوخوما.
– عسگر عمواوغلوووو … آخی من باشقا بیرزاد باشارمیرام کی.
– او … دا آتشپاره بونو اوخوماسئیدی گؤرهن گؤی یئره گلردی، سن ده هر گئجه یاریسی گلیب منیم قاپیمدا اوخویاسان؟
– عسگر عمواوغلووو … انصاف ائلهمیرسن. باشینا دولانیم اونون. سس دئییل کی، بهشت نغمهسیدیر.
– اولار بو بهشت نغمهسین ائویزده اوخویاسان.
– عسگر عمواوغلووو … آخی سنه نه ضرری وار؟
– آی یاریماز، منیم ائوده قیزیم وار، اونا سؤز ائلیرلر. ملان دئمه، آیری آد دئه دا. آیری ماهنی اوخو دا. اصلاً نه لازیمدی، اوخوما دا. او زهری ماری ایچیبسن، آدام بالاسی کیمین گئت ائوینده باشیوی قوی یات دا.
بو حالدا سوچو بابانین اوغلو رحمان تومانپاچا، یوخولو یوخولو ائشییه چیخیر.
– آی بالا گینه نه خبردی؟ گئجه یاریسی بو نه فیلیمدی؟ ایبیش، الله سنه لعنت ائلهسین. هر گئجه بو نمایشیوی گرهک وئرهسن؟ بابا بیزده آدامیق، سحر ایشه گئدهجاغیق. آی عسگر عمواوغلو سنین ده ایشین قورتاریب، هر گئجه بونونلا باش باشا قوشورسان. بابا قوی چیخسین گئتسین دا؟
– آی رحمان، آخی بو بئنامیسا دیین یوخدو گئجه یاریسی بو نه اوخوماغیدی؟
– بابا، اوخوماق اوخوماقدی دا، نه فرق ائلیر، بونو اوخوماسین اونو اوخوسون.
– یوخ، چوخ فرق ائلیر. آیری بیرزاد اوخوسون. یا دا اوخوماسین. منیم ائوده قیزیم وار. نییه اونون آدین گتیریر؟ صاباح ائل ایچینده منه مشکل اولاجاق.
– آی قردش! سن ده غریبه آدامسان ها. سنین قیزوین سکگیز یاشی وار. نه خبردی؟ گؤرنده دییر بسکی ارریق قیزدی. گئد ایچری پیسدی. اوزووه سؤز دوزلتمه. کئچ ایچری اوتان، یاخشی.
– یوخ، منه دییینجاق، بونا دییین بیرآز اوتانسین.
یاخشی، پیسدی، یئکه آدامسان. کئچ ایچری. دییریق آیری بیرزاد اوخویار. آی ایبیش قارداش سنین ده قاشینمان وار؟ آیریسین اوخو دا!
– رحمان قارداش، جانیو ایچون آیری بیرزاد باشارمیرام کی.
بو حالدا رحمان بیزه باخیب دئییر:
– سیز گئجه یاریسی بوردا نئیلیرسیز؟ ائویز یوخدو؟ گئدین باشیزی قویون یاتین دا؟ سحر ایشه گئتمییهجاقسیز؟
– آغا رحمان، صاباح جومادیر. کرخانالار باغلیدیلار. نه ایشی؟ بی هفته ایلمه دؤشهمهدن جیریغیمیز چیخیب. بیرآز الله قویسا استراحته چیخمیشیق.
– استراحته چیخیبسیز گئدین یاتین دا، گورورسیز کی فیلیم ده قورتاردی.
بو حالدا ایبیش یولون توتوب گئدیر، گئده -گئده اوخویور:
شافتالیلار جالاندی،
ملان منیم بالامدی.
هاممی قویوب گئدندی،
ملان منه قالاندی.
– گورورسن؟ گئدهنین هئچ شرفی یوخدو. ایندی بیر قران سؤز دئدوخ ها.
– یاخشی، گئت یات، سحر توکان آچاجاقسان. یوبانارسان یورقان باسار، قهبه رضا ساتار، سن قالارسان. سیز ده بالامسیز، گئدین یاتین.
رحمان گئدیر ائوینه، عسگر باققال دا دئیینه- دئیینه قاپینی چیرپیب ایچری گئدیر. هله ده ایچریدن سسی گلیر.
رسول دئدی:
– گل گئداخ گوراخ هارا گئدیر، قاییداریق.
– بسدی دا.
– بابا بو سوچو بابانین اوغلو قویمادی کی گوراخ نئیلیروخ. گل گئداخ، قاییداریق.
ایبیش اوخویا- اوخویا گئتدی حاج حمید باغینا ساری. بیرآن گؤزو ساتاشدی گؤردی جمشید قفهسی آچیقدیر. گیردی ایچری. بیزده اون آردینجا.
– سالام
– سالام، سالام
– علیکالسلام
جمشید قفهچی اؤنجه اوز توتوب ایبیشه دئدی:
– هه ایبیش، بالا تکمیل دئییلسن؟ گئت ائویوه دا، او یازیق آروات بو واختاجان سنی گؤزلیر آخی؟ اونون دا سندن باشقا بیر کیمسهسی یوخ کی باشین اونونلا قاتسین.
– یوخ جمشید عمواوغلووو …، هله تکمیل دئییلم. ایکی چای وئرسن … دای تکمیل اولارام.
جمشید قفه چی اوز توتوب بیزه دئدی:
– خئیر اولا بالا؟ سیز نه عجب؟ بو گئجه یاریسی هاردان گلیرسیز؟
– ایکی چای دا بیزه وئرسن زحمتی کم ائلهروخ.
– هر گئجه بو واخت ائویزده چای ایچردیز… بالا؟
رسول دئدی:
– یوخ، بو گئجه یوخوموز قاچمیشدی دئدیک بیر فیرلاناق. گؤردوک قفه آچیقدیر. دئدوخ بیز ده ایبیشین قوللوغوندا بیر چای ایچاخ.
ایبیش اوز توتوب جمشید قفهچییه دئدی:
– جمشید عمواوغلووو … اؤزونو ناراحت ائلهمه جاواندیلار، جاهیلدیلار.
بو حالدا جمشید قفهچی ایکی چای گتیریب قویدو ایبیشین قاباغینا، بیزه ده دئدی:
– سیز ده صاباح گلرسیز تازا دم چای وئرهرم.
بیز ده بیر- بیریمیزه باخیب گولوشدوک. آلتدان- آلتدان ایبیشه باخیب گولوردوک کی جمشید قفهچی گؤروب دئدی:
– هن اوغول، گولرسیز. گولرسیز. جاوانلیقدی دا. آللاها دا بندهلیک ائلهمیرسیز.
من دئدیم:
– یوخ، جمشید عمواوغلو، هئچ نه یوخدور، عسگر باققال بیرآز ایبیشه دالاشدی. دئدوخ ناراحات اولار ییخیلار ائلر. دالیسینجا گئداخ گیرسین ائوینه، قاییداریق. او دا گلدی بورا. دئدوخ ایندی کی بئله گلیب، اوتوراق بیر چای ایچاق، گؤرهک نه اولور. سن ده کی بوش یولا سالدین.
جمشید قفهچی بیر باخیب بیزه گولومسندی. بوش ایستکانلاری ایبیشین قاباغیندان گؤتورهرک سوروشدو:
– ایبیش، تکمیلسن؟
– هه، جمشید عمواوغلووو …، دای تکمیل اولدوم. گئددد …یم ائوه. دای ب…سدی. جمشید عمواوغلووو … منیم بورجوم نئچه اولدو؟
– هئچ نه، سن منه قوناقسان. صاباح گل بیرآز دا شوشه ییغمیشام وئریم آپار پول ائله. بوردا قالسا سیناجاق. گئجهن خئیرینن.
– گئجهن خئیرینن، دای گئدیرم ائوه. جمشید عمواوغلووو … گئددد … یم ائوه. بالام روحی دای ائوهجاق اوخومویاجاغام. قوی عسگر عمواوغلووو … راضی اولسون. آخی او بیلمیر کی منیم ده ملانیم وار ایدی. قوی او راضی اولسون!
جمشید قفهچی گؤزلرین سیخا- سیخا اوز توتوب بیزه، بوغونتو سسی ایله دئدی:
– دورون بالامسیز، سیز ده گئدین ائویزه، من ده باغلییرام. گؤرورسیز هرهنین ده اؤزونه گؤره بیر دردی وار کی فقط اؤزو چکه بیلر. سیزین ده گئجهنیز خئیرینن.
گئجهنیز خئیرینن دئییب ائشیگه چیخدیق. رسولون بوغازی شیشمیشدی، دانیشانمیردی. باشیایله خداحافظلشیب قاچدی من گؤز یاشلارینی گؤرمییم.
۷ شهریور ۱۳۹۵
