چیچک‌لری ماشینین اوستوندن قوپارداراق، اؤز سرنیویشتینی دوشونوردی کی اونو ن توی دویونی ایله ایلگیلی‌ایدی. بیر زامانلار اوره‌یی باشقا بیر هاوالاردا گزیردی و ائولی‌لیک‌له عشق‌دن قاچیردی. موسیقی اؤیره‌نمک اوچون باشقا بیر اؤلکه‌دن باش آچمیشدی و اؤزونو آزاد حیس ائدیردی. ایل‌لر چکدی کی ائده بیلدی موسیقینی عالی مکتب‌لرده بیتیرسین و اؤز آرزوسونا چاتسین. امما یالنیز ایدی. خزان وورموش بیر یاپراق کیمی. سورعتله کئچن عؤمرو دوشونوردی. یارادیجیلیق و هونر ساحه‌سینده چالیشماق، اونون حیاتینا رنگ سپسه‌ده قلبی یاپ یالنیز‌ایدی. سینما فیلم‌لرینده اولان عشق‌لره موزیک یازسادا، اؤزو عشقی هئچ تجروبه ائتمه‌میشدی.
کیمسه یوخ ایدی کی عشقی اونون یادینا سالا و صاباحلاری گؤزونده ایشیقلانا. صنعتچی بیری اولورسادا، عشقی تکجه موزیک ایدی و بیر قادینین ایسته‌دییی دویغولاردان اوزاق دوشموشدی. آنالیق دویغوسو و سئوگی دولو باخیشلار کی کؤنولدن قوپموش اولا، اونون حیاتی ایله غریبه ایدی. یاشلاندیقجا عشق داها بیله‌سینه چتین گلیردی و عاشیق اولماق اونا بیر رویا کیمی ایدی. نظرینه گلیردی کی عشق اوندان قاچاراق بختی ده خوشبختلیکدن قاچیری. حیس ائدیردی قوجالیری وبیرگون بو ایشلره چوخ گئج اولاجاقدی. تاکی بیرگون بیری اونون یاشامینا گیردی. سینمادا مونتاژ یاپیردی و ایشلری اوزره گاهدان بیر بیرلری ایله گؤروشوردولر. بو گؤروشلردن بیر عشق دوغولوردی و اینانیلماسی چتین اولسادا، او آیاغینی قاباغا قویوب بیله‌سینه ائلچی دوردی. آمما قادین دئدی:
– سن موسیقی‌یه عاشیق اولوبسان منه یوخ !
و اودا جوابدا دئدی:
– عشق بیر نور دی کی چیلیر ، و اوندا کی چیله‌دی ایشیقلیقی هر مرزی کئچیر. سن ایله موسیقینی بیر بیریزدن آییرماق اولماز. دنیز و آدا کیمی هممه‌شه یان- یاناسیز.
دئدی :
– بو عشق دن حذر قیل. بیرینین دالیجا گز کی فاصیله‌لر چوخ اوزاق دئیییل‌لر.
و او دئدی:
– زمانین فاصیله‌سین دولدورماق اولار، آمما قلب‌لرین فاصیله‌سین یوخ. اگر کؤنلون عاشیق‌دیر، فاصیله‌نی هئچ دوشونمه! من بؤیویم سن کیچیک دییه بیر شئی یوخ .”
اوره‌یی‌نین پیچیلتیلارینا قولاق آساراق ایستیردی کی ایلک دفعه اولورسا دا عشقه اینانا. حیاتی‌دا سینما کیمی سانمالی ایدی و گؤزله‌نیلمز ایشلره گره‌ک حیاتیندا یئر وئره‌ردی. بو اوزدن ایسه قلبی‌نین سسلرینه قولاغ آسیب عقد سوفراسیندا اوتورماغا قرار وئردی. ایللراونلاری بیر- بیریندن آییرمادی وآییرادا بیلمز. بیر عشق اودونان قلب‌لری دولودی کی یاشامی مشترک دوشونجه و دویغولارلا آلاولاندیریرلار.
گول- چیچک‌لری توی ماشینی‌نین اوستوندن قوپارداراق، حیاتی بیر سینما پرده‌سی کیمی گؤزونون قاباغیندان کئچیب دئدی:
– عسقه اینانماق آسان‌دیر. اصل اودورکی آدام، هردن گره‌ک فیلملره ده اینانا .
