نوبار ننه‌مین یومورتالاری
نریمان ناظیم
کئچن گئجه نوبار ننه‌م یئنه‌ده یوخوما گلمیشدی. همان گئییم- کئچیمده. همیشه اولدوغو کیمی. آغ آپباق چارقادین چکیب چنه‌سی‌نین آلتیندا سانجاقلامیشدی. گؤزو ایشیم- ایشیم ایشیلداییردی. سانکی یئنیجه گؤز یاشی‌نین گؤلونده یویونموشدو. آی شافاقلی اوزونده یانان یاناقلار یای آلماسینی یادا سالیردی. چارقاد آلتیندان قیزاران خینالی ساچی قیریشمیش آلنینا ایشیق ساچیردی. نوبار ننه همیشه‌کی کیمی‌ایدی.
نوبار ننه سینیق ائوین دیره‌گی‌ایدی. بیر آن آیاغی آلتینا گلمزدی. بیر لحظه سوپورگه الیندن دوشمزدی. تویوقلارینی آد با آد سسلردی. او، تویوقلارین‌دا دیلین بیلردی. اولارینان ائلجه دانیشاردی کی آدام دئیردی حتما تویوقلار دا نوبار ننه‌نین دیلینی باشا دوشورلر. گاهدان یومورتاسی کسیلن تویوقلاری دانلاییب، دانسایاردی: – “آی جانی یانمیش! یئییب یاتماق‌دا اولدو ایش؟! غیرتیوه نه گلدی؟ هانی به سنین یومورتان؟ هه؟”
نوبار ننه‌نین پای آلماغینی کیمسه گؤرمه‌میشدی. هامی اونون الینه باخاردی. یون جوراب، ناخیشلی الجک، چیل بئچه، پپیللی فریک… او هر شئی‌دن چوخ اوره‌ییندن پای وئرردی. بونلاریلا بئله نوبار ننه‌نین یومورتالاری‌نین آیری بیر حیکایه‌سی وار: هر هانسی یئرده ایشیم دویونه دوشنده، اونون یومورتاسی‌ایله آچیلاردی. میدادیم، دفتریم ایتنده، داواتیم سیناندا، جوهریم قورتاراندا، او زامان کی آنام “پول یوخدو، جانین چیخسین موغایات اول”- دئیه منه آجیقلاناردی، نوبار ننه اشاره‌ایله منی چاغیراردی: “آلا آپار وئر مولکعلی‌یه آل گتیر!”- دئیه یومورتانی اووجوما باساردی. نوبار ننه‌مین یومورتالاری منه هر شئی‌ایدی: ایگده، کیشمیش، بادام، لب‌لبی، کاغاذ، قلم، …..
کئچن گئجه نوبار ننه‌م یئنه‌ده یوخوما گلمیشدی. الینده بیر کاسا یومورتا گتیرمیشدی. سانکی نوبار ننه‌م بیلیرمیش کی منیم ایندیکی دویونوم بیر یومورتا‌ایله آچیلان دویون دئییل. او بوتون یومورتالارینی منه گتیرمیشدی. نوبار ننه هر شئیی بیلردی. هر شئیی دویاردی
قیش ۱۳۷۸
