سرین پاییز آخشامی‌دی. کؤچری قوش‌لار شمال اوکیانین اطرافیندا گئجه یوخوسونا حاضیرلاشیردیلار. بیردن آجی بیر کولک باشلادی. شمال قیشین خاطیرلادان بیر کولک. قوجا تجروبه‌لی دورنا سانکی یوخوداایمیش، اؤزونه گلدی. دسته‌سین باشینا توپلاییب دئدی:
– بو کولک، جنوبا دوغرو کؤچمک اعلانی‌دی. بیر- بیریزه سؤیکه‌نین؛ هم قیزینین، هم ده یاخشیجا یاتین، دینجه‌لین. سحر گونش دوغان کیمی اوچمالی‌ییق.
قوش‌لار دسته‌سینه بیر هیجان، های- کوی دوشدو. تزه پروازلانان بیر جوت دورنا بالاسی سئوینجک اویناییردیلار. آتا- آنالاری اونلاری گؤروب موبهم خیالا دالمیشدیلار. آنا دورنا دئدی:
– سنجه اوشاقلار بو اوزون سفره حاضیردیلار؟
آتا دورنا:
– هه.! آرخایین اول !. بو سون هفته‌لر چوخ دقت ائله‌میشم. ساغلام، جسارتلی هم ده چئویک گؤرونورلر.
آتا دورنا بو سؤزلری تمکینله دئسه ده، اورکدن آرخایین دگیلدی.
قوش‌لار جومالاشیب یاتدیلار. آنجاق آتا دورنا قوطبون شفقینه باخیب درین فیکره گئتمیشدی. آنا دورنا اؤزون اونا یئتیریب، هئچ نه دئمه‌دن یانیندا دوروب گؤزلرین شفقه زیلله‌دی. نئچه دیقه دینمه‌دن، بیر- بیرینه باخمادان اوزاقلارا گؤز تیکمیشدیلر. آنا دورنا دیله گلدی:
– سن ده من دوشوننی دوشونورسن؟
آتا دورنا:
– هه. سن اوشاقلارحاقدا سوروشاندا، یاز کؤچونده، اورمو گؤلونون سماسیندا دئدیگین سؤزلر یادیما دوشدو. اوندا من دئدیم: «گوزلنیلمز قادا- بالادان قورتارساق، جنوبا قاییدان باش، دؤرد- بئش دورنا اولاجییق. بو گؤزل گؤلون ساحیلینده هر ایل سایاغی سئیر ائدیب، دینجه‌لیب، بیر گون سورا کؤچه داوام وئره‌ریک. سن سمادان گؤله باخیب دوروخدون. دئدین: یامان قورخورام. بئله کی بو گؤل قورویور، پاییزا قالاسی دئییل.»
آنا دورنانین گؤزلری یاشاردی. دئدی:
– نئچه گوندو بو فیکیر باشیمدان چیخمیر. اوره‌ییمه دامیب کی قاییدان باش او گؤلدن بیر اثر قالمییاجاق. گؤل قوروسا نئجه اولاجاق؟ بیزلر تجروبه اوزره سونکی دوشرگه‌یه قده‌ر داوام گتیریب، بیر باشا اوچا بیلریک، آنجاق تزه پروازلانان قوش‌لار او اوزون مسافه‌نی اوچاماغا طاقت‌لری اولارمی؟
سحر ائرته‌دن دورنا قاطارلاری قی وورا- وورا جنوبا دوغرو کؤچه باشلادیلار. او گون کی آخشام چاغی اورمو گؤلونده قونمالی‌دیلار، گؤلده آنجاق دوزلو بوغاناق گؤرونوردو. یئنی یئتمه پروازلانان دورنالارین چوخو، هم ده بعضی طاقتی توکنمیش قوجا دورنالار، دسته‌دن اوزولوب اورمو گؤلوندهکی دوز فیرتیناسینا دوشوردولر. قانادیندا طاقتی قالان قوش‌لار اوچماغا داوام وئریردیلر. ابدی آیریلیقدان ایدی، هاواداکی دوزدان ایدی، بلکه ده گؤله یئنی حیات وئرمک اوچون، اوچان قوش‌لارین گؤز یاشیدا گؤله یاغیردی. اورمو گؤلو، قوش‌لار قبرینه چئوریلمیشدی .
کرج یای ۱۴۰۱