«بابک قفه‌خاناسی» و «قفه‌چی ذولفقار»
علی تقی‌زاده لاریجان
کلیبر ماحالیندا اؤز عظمتیله باش قالدیران «بابک قالاسی» بیر چوخلاری‌نین دقتینی چکن و اونون گؤروشونه گئتمک آرزوسوندا اولان انسانلاری ماراقلاندیران و مبارزه تاریخیمیزی اؤز غرور وئریجی عظمتینده عکس ائتدیرن تاریخی بینالارداندیر.
تخمینا” ۲۸ ایل قاباق «بابک قالاسی»نی گؤرمه‌میش بیر داغچی دوستوم‌لا اورا گئتمک قرارینا گلدیک. یای‌ین سون آیی، شهریور آیی‌ایدی. باهارین چوخدان کئچمه‌سینه باخمایاراق، ماحال هله ده گؤزل گؤرونوردو. کلیبر باغلاریندا «زغال» واقتی‌ایدی. بو ماحالین اوجا باش سلسله‌لی داغلاری و اؤزونه مخصوص آب هواسی بیر چوخ دردلره درمان اولان «زغال» میوه‌سی‌نین یئتیشمه‌سینده بؤیوک رول اویناییر. بئله کی «زغال»ی کلیبر ماحالی‌نین آدیندان و اونون کیملیگیندن آییرماق چتین اولوبدور و دئییلن‌لره گؤره هر ایل نئچه مین کیلو بو میوه‌دن کلیبر ماحالیندان اؤلکه‌نین مختلف یئرلرینه گؤندریلیر.
او زامان ایندیکی کیمی ماشین یولو یوخ‌ایدی. آخشام باشی کلیبردن پیادا یوللاندیق. گونون باتابات چاغی شجاع‌آبادا چاتدیق. بیر داش دیواردان تیکیلمیش قفه‌خانا واریدی، صاحبی‌نین آدی «ذولفقار». ذولفقار کیشی‌نین ۵۰ یاشی اولاردی. هم گونون باتماسیندان، هم ده یورغونلوغوموزو آلماق اوچون قفه‌خانایا کئچدیک. ذولفقار کیشی بیزه چای گتیردی. قفه‌نین دیواریندان آسیلمیش «بابک خرمی»نین یاغ بویالی رسمیندن گؤزومو چکه بیلمیردیم. الینده قیلینجی گؤرونن بو رسم سانکی بیر ملتین بوتون ایگیدلیگینی، غرورونو و عظمتینی اؤزونده جانلاندیرمیشدی. قفه‌خانانین آدین ائله «بابک» قویموشدولار؛ البتده اونا «داغچی‌لار قفه‌خاناسی»دا دئییردیلر.
ذولفقار کیشی بیزدن گئجه اوردا قالیب قالماماغیمیزدان سوروشدو. -«قالماق ایسته‌ییریک. بوردا یاتیب سحر صبحانه یئیندن سورا قالایا چیخاجاغیق» -دئدیک. او بیزیم اوردا گئجه قالماغیمیزی بیلندن سونرا نفتی یخچالی گؤستریب دئدی:
– «کتده توی وار. بو گئجه من گئتملی‌یم. اوردا پامادور، یومورتا، کره، پئندیر و بال وار. قند، چای، چؤرک‌ده کی اوداها. اؤزوز هر نه خوشلاساز بیشیرین، دوشورون. یاتماغیزا یورغان دؤشک ده وار. صبح گؤروشریک. من خودافیظ».
گؤرونوردو کی داغچی‌لارین گؤزل روحیه‌سی ذولفقار کیشی‌یه‌ده اؤز تاثیرینی قویوبدور. ائله صمیمی دانیشدی کی محبتی اوره‌ییمیزه یاتدی. بیزیمله وداعلاشیب کنده دوغرو یولا دوشدو.
سو قابیندا سو آزیدی، بوشالتدیق سماوارا. قوه چراغی ایله گئتدیگ بولاقدان سو دولدوروب گتیردیک. یاخشی کره ایله بیر املت بیشیردیک. سماوارین ایستی سویو ایله ده باش گؤزوموزو یودوق. چای ایچیب یاتدیق. ایکی ساعات یوخوش یولو آغیر کوله ایله چیخماق یورموشدو بیزی. شیرین یوخویا گئتدیک. سحر ائرکن اویانیب صبحانه یئییردیک کی ذولفقار کیشی گلدی. بیزدن پذیرالیق ائده بیلمه‌دیگی اوچون صمیمیتله عذر ایسته‌دی. بیز بوتون یئمک- ایچمک و یاتاق وسایلی اوچون اونا پول وئرمک ایسته‌دیک. چوخ چتینلیک‌له آز مقداردا قبول ائله‌دی. سانکی اوزون مدت تانیش‌لار کیمی ذولفقار کیشی‌له قوجاقلاشیب، بابک قالاسینا دوغرو یوللاندیق…
ایندی او قفه‌خانین و قفه‌چی ذولفقار کیشی‌نین نئجه اولدوغونو بیلمیرم. سونرالار اورالیغا ماشین یولو چکیلدی؛ هتل تیکیلدی؛ آنجاق منیم حیات دفتریمده اؤز صمیمیتی و کیشیلیگی ایله ایز بوراخان «قفه‌چی ذولفقار» و شجاع‌آبادداکی «بابک قفه‌خاناسی» اونودولماز قالدی…
