– گؤیون هاراسینا سن باخسان، دیک اوردان بیر آی گؤیریر.
– گئنه باشلادین رومانتیک- رومانتیک دانیشماغا!
– سن باخاندا اولدوزلار آیلاشیر ائله‌بیل. گؤی اوزو دولو اولور آی‌نان. قورخورام…
– آیا باخسان قورخمازسان… من یانیندا اولسام دا، اولماسام دا سن همیشه آیا باخ!
سونرا کیشی گئدیب بیر آلایانمیش شام گتیردی. گولومسه‌یرک:
– بونو اوشاقلیغیمدا تاسوعا گونو مسجیددن اوغورلامیشام. شاه مسجیدیندن. نذیر شامی‌دی. تورشوموش قیزلارین نذیر شامی. اوشاقلیغیمدان ساخلادیغیم قیویر- زیویرلارین آراسینا آتمیشدیم قالمیشدی.
قادین قالخیب بیر لامپا گتیردی. شامی، لامپانین آلتینا یئرلشدیردی. شامین ایشیغی چوخالدی.
‌- هه، یاخشی اولدو. بئله‌سینه الیم ده قیزیشیر… سن هانسی یولدان گلیب چاتدین منیم چاتلاغیما؟
– بیلمیرم، منیم هوشوم باشیمدا دئییل کی… سووشدوغوم خیاوانلارین هئچ بیریسی‌نین آدینی اوخویا بیلمهدیم.
– هوشونون باشینا نه گلمیشدی کی بورا گلنده؟ کئشکه بیر- ایکیسینی اوخویا بیلسئیدین.
– دینمه! سس گلیر، گئنه ده ساچلارینی داریرسان؟
– سن گلنه کیمین هامیسی تؤکولدو. منیم ساچیم یوخدور کی.
– گئنه ده ال‌لرین اوشویور؟ ساچینی داراماغی‌نین سسی منی بوراجان چکیب گتیردی .
– آی آللاه… نه‌لره فیکیر وئره بیلیرسن گؤر. سن ایسته‌سن تزه‌دن گؤیرده بیلرم اونلاری. ‌گؤرورسن نئجه بوشالمیشام قورخولاریمدان… بیر سؤز دئسم گولمزسن؟
– گولسم جینله‌نرسن؟
– ایندی من اَته‌ییمی بو یاغان قارین آلتینا آچیب، اوندان بیر اتک توپلایاجام. اؤزون گؤره‌جکسن. اینانیرسان منه؟‌ – سن نییه بو قدر قادینسان. نئجه باجارا بیلیرسن بیر بئله قادینلیغی؟
– قادین قالماق چوخ گوج ایستیر. بونو سونرالار باشا دوشدوم. گؤردوم ایچیمده قورخولو درین چوخورلار وار، آما هردن دیکسینیرم ده. قورخورام قادینلیغیمی لاپدان دانالار. ده‌ییشکن بیر شئیدیر قادینلیق، حیات کیمیدی.
– بیز ایکیمیز ده بیر یانقی‌نین اورتاسیندا اَریییریک. ال‌‌لرین هله ده اوشور؟
– هارا گئدیرسن؟ گئتمه. بوردا قال، قوی بیرآز هده‌رن –پده‌رن دانیشاق. سفئه‌له‌یک. ‌
– هئچ یئره یول یوخدور. گئدیرم زئرزمیدن شاراب گتیرم بیرآز. آدامین اؤز ایچیندن باشقا، سیغیناجاق یئری یوخدور. بارداغیندا نه‌یین وار سنین؟
– من ده شاراب ایچیرم… ساغلیغینا! قورخورام بیر- بیریمیزین یانیندا دا اؤز ایچیمیزی تاپا بیلمه‌یک. الیم قیزیشسا گئده‌جکسن؟
– نوش اولسون… ایکی آغاج اکمک ایستیرم آدیمیزا عزیز. بیر- بیرینین یانیندا. هئچ کسیلمه‌یه‌جک اولان ایکی آغاج… دونیادا ان چوخ سئودیگین آغاج هانسی‌دیر؟
– من هر آخشام سسیمی گولداندا اَکیرم، هر آخشام. اؤزو ده کؤلگه ده. اؤزو ده یول یئرییه- یئرییه. من چوخ یول یئریمیشم. اما آخیردا گئنه باشلادیغیم یئره چاتمیشام. تؤوشولو تؤوشولو. چکیل بیرآز یان دور مندن. آیاغیم قانا باتیر. پالچیغا باتیر. کؤرپه‌یه باتیر. ال‌‌لریم کؤرپه‌یله دولودور. ال‌‌لریم کؤرپه تیخییلا دولودور. بیر توکانین بوتون صابونلارینی آلدیم، دوز بیرگون یاریم سوره‌سی حامامدا قالیب ال‌‌لریمی یودوم. ال‌‌لریمین قوخوسو گئنه چکیلمه‌دی. سونرا یوخودان آییلدیم. آما تک ایدیم. سن منده گیزلنمیشدین. سنی گیزلتمیشدیم.
– من اوشاقلیغیمدان بَری گئجه‌لر سنین یوخونو گؤروردوم.. ۹-۸ یاشلاریمدان بیر قادین یاشاردی منله. او سن ایدین. ایندی ده سنین یوخونو گؤرورم.
– هئچ بیلیرسن من نئچه قارین دوغموشام؟ بیلیرسن نئچه قارین، اوشاق زیان ائله‌میشم؟ بو شهرین مریضخانالاریندا هرگون دوغوب، هر گون زیان ائله‌میشم. الیمدن جانا گلیب شهرین بوتون ‌مریضخانالاری دا. هرگون منه بیر دار آغاجی قورولور. آسیلیرام هر گون… باغیشلا! بونلاری سنه نییه دانیشیرام آخی. منی یوخولاریندا نه جور گؤرورسن، هن؟ هئچ اولماسا بیریسینی دئه، تئز اول، تئز اول دئه!
– ایسته‌دیک‌لریمی آنجاق یوخودا سنه آچیقلییا بیللم. آما سن یوخولاریما گلیب گیزلنیرسن، اونا گؤره بیر- بیریمیزه تانینماز قالیریق. بارماقلاریوا باخ، بوز قندیلی کیمی آسلانیب. ‌
– گئنه تک قالاجام سن گئتسن. سن منه خییوو چایینین شوولوک‌لریسن. اؤزومو سندن کئچیرده بیلمیرم. سندن کئچه بیلمیرم. ‌
– یوخولاریمین بیرینده گؤردوم بیر دره ایچینده باغیریرسان. بدنی‌نین هریئریندن آچیلیب یومولان آغیزلار جوجرمیشدی. سن باغیردیقجا او آغیزلار یئره اله‌نیردی. سنی ساچلاریندان تانیدیم. یئره اَلنن آغیزلار آچیلیب یومولاندا، آچیلیب یومولان آیری آغیزلار ائشییه فانتاللیردی. دره‌نین ایچیندن بیر شهرجه آدامین باغیرتیسی گلیردی.
– یوخولارین چیندی. هه یادیمدا، یادیمدا! باغیریردیم او گون. اونلارین هامیسینی من امیزدیرملی ایدیم. سن ده گؤردون؟ ائشیتدون؟
– هه… سنی گؤروردوم. آما ها گوجنیردیم، ائشیدنمیردیم. سسینی آییرد ائدنمیردیم بیر شهرین باغیرتیسیندان. نفس کوشولتوسو، آت کیشنرتیسی، سئل کوکره‌مه‌سی، پارتلاییش، قان آخما سسی، ماشین قیژیلتیسی. سن اونلاردان نئجه قورخموردون؟ آیاغیوا ایلیشن جنازه لردن دیکسینمیردون به؟
– قورخونون اوزونه دورموشدوم او گونلر. آما اؤزوملوک دئییلدی کی. اؤزوم سئچمه‌میشدیم او وضعیتی. اونا گؤره ده شیشمه‌یه گلمز. هامی او گونه قالمیشدی یعنی. قنوولاردا لاخیم لاخیم قان. هئش کیم اؤز جانی‌نین هاییندا دئییلدی. هرکس او بیریسی‌نین هاییندایدی. دمیر سسی، ‌توستو اییسی گلیردی آغیزلاردان. آغیزلار ائله‌بیل بیر ماققاجلا آچیق ساخلانیلمیشدی، هامی دانیشیردی، هئچ کسین سسی ائشیدیلمیردی، گؤزلر ایسه یومولو قالدیقلاری یئرده دوندورولموشدو. ‌
– سورا سنی گلین آپاریردیلار قارقالار، هر آخشام اوستو. قیزلار ال- اله وئریب اوخوردولار. قارغالارین توشویلا قاچاقاچا لاپ قاباغدا اوچان قارغانی بیر بیرینه گؤرسه‌دیردیلر:
گلین او دی! … یوخ او بیریسی دی!… ‌بوداخا بوداخا گلین بودو، دئییردیلر.
– اصلینده من، هئچ گلین کؤچمه‌دیم کی. منی گلین کؤچورتمه‌دیلر. گلینلیک دونو گئیینمه‌دن منه گردَک اوتاغی بَزه‌دیلر. دَرزی‌‌لرین باش قاشیماغا ماجاللاری یوخ ایدی. هامیسی کفن بیچیردی. قوی گؤروم … یوخ! گردَک اوتاغیم دا اولمادی هئچ منیم. دئدیلر قان سو یئرینه آخیر. گلینلیک دونونون اته‌یی قانا باتار عاییب اولار. من ده اوتاندیم. اوتاندیغیمدان یاناقلاریم پؤرتدو. منی بَزه‌مه‌دیلر ده گلینلر کیمین. سونرا اؤز الیم‌له دوداغیما، یاناغیما قان چکیب قیزارتدیم. گؤزل اولدوم. دیرناقلاریمی دا خینا یئرینه قاننان بویادیم. آنام جئهیز صاندیغینی آچیب قیرمیزی یایلیق گتیردی. بئلیمی باغلاماغا قاینیمی چاغیردیلار. آچیلیب یومولان آغیزلارین آراسیندان آییرد ائدنمه‌دیلر اونو. آتامی فیرقه‌چیلیکده آسمیشدیلار. اونا گؤره بؤیوک قارداشیمی چاغیردیلار منه خئیر دوعاسی وئرمه‌یه، «او اؤزونو فلسطین مللتینه آداخلاییب گئدیب»، بویلو آروادی دئدی. اورتانجیل قارداشیمی چاغیردیلار «دوستاقدان بیر دسته چئریکنن قاچیب، نمی نیشانی یوخدو» دئدیلر. کیچیک قارداشیمی چاغیردیلار، «کوکتول مولوتوفنان اوینور»، دئدیلر. آتام ائویندن، خئیر دوعاسیز یولا سالیندیم. نیشانلیم، باشیمدان قیزیل آلما آتماغا داما چیخاندا، باشیندان گولله‌لندی. الینده-کی قیزیل آلما دیبیرلاندی دیبیرلاندی گئدیب گردک اوتاغیما چاتاندا پارتلادی. آنام دئدی: «سنه دئمه‌دیم قانا باتارسان؟» من اوتاندیم. ‌ ‌ ‌
– سن‌له من، آجی گرچک‌لر ییغینجاغیییق، ظالیمین قیزی! توک‌لریم بیز بیز اولور، دریم اولدوز اولدوز.
– قورخورام گرچکلیگیمیزدن…
– سنی آلماق ایستیرم.
– سن گلنه کیمی منی آلیب آپاردیلار. ساتیلدیم.
– ال‌‌لرین اَریییر شام تکی. اووجونون ایچی تَر مونجوغویلا دولودور.
۸۳/ تبریز