سون دؤنه‌دن بیر اؤنجه‌کی دؤنه ایدی، دئیه‌سن
گؤزلریم گؤزه گلمیشدی آغلایا بیلمیردی خیاباندا
شعریمیزین تاریخی هئی تکرارلانیر
و تاریخی شعرلر زیرزمیلرده یازیلیردی
نئچه سطیر آشاغیلیق عاشقانه شعرلری باسدیریردیق
کیم بیلیر دئمیشدیلر،
اولمایا کلمه‌لر قوجا بیر سیرره دؤنوشوب گناهلاریمیزین یوخاری سطیرلرینده یازیلاجاق
کیم بیلیر،
اولمایا سون دؤنه‌دن بیر اؤنجه‌کی دؤنه‌لریمیزین بیری یئنه سورمه اولوب گؤزوموزه میل چکیله‌جک
یئنه من کلمه‌لردن اوتانمیشدیم
یئنه تاریخی شعر یازماغیم ویرگوللرین آلتیندا یوبانمیشدی
و عاشقانه شعرلریم سطیرلره تامارزی
یئنه سون دؤنه‌دن بیر اؤنجه‌کی دؤنه ایدی
چیینیمیزی ستارخانین قوچاق حماییلینده توفنگه تؤکموشدوک،
خشابلی بئلیمیز تاریخی شکیللرین یاراشیقلی منظره‌سی اولموشدو
یوللار قاچ ها قاچدا، خیابانلار، دالانلار تلسمکده
تکرلی خایین‌لر هر یانیمیزدا گازا باسیر، اوستوموزه سورمکده
کلمه‌لر خیانتلرین بلگه‌سینه تئز-تئز سانجاقلانیردی
من‌سه هئی چئریلنیردیم، چئریلنیردیم گؤزللشمک یولوندا ایریلنیردیم
قدم قدم یول چکیلیردیم گؤزلریمین خیابانینداکی آزادیستانا
و بارماقلاریم نیشان اوزویومه دار آغاجی قورولوردو
و هر زامان دؤردیوللارین بوغازیندا بوغولان قیرمیزی اؤرپک مندن اوغورلانیردی
تاریخسیز شعریمیز درین بیر وجدان عذابیندا سانجیلانماغا باشلامیشدی
و بیز یئنه باشقا بیر دؤردیولون اورتاسیندا
بیر یول دئییل، اونبیر یول دئییل، ایییرمیبیر، یوز بیر یول
بو یولدان اوسانیب او یولا تؤکولوردوک
دوکانلاردا شعار ساتیردیلار
شعارلارین آغزی دولو کؤپوک
کؤپوکلر قورباغا قورباغا قاپیلارا ساری ایمکله‌ییردی
یئنه سون دؤنه‌دن بیر اؤنجه‌کی دؤنه، باشقا بیر سطیرین باشیندا دورموشدوم
کلمه‌لردن اوتانا – اوتانا شعریمه قارغیش یاغدیرمیشدیم
سویوقلامیشام، قولاغیم سؤیله‌میشدی، خیابانلاردا ائشیدنمیرم
خیابانلاردا آغلایا بیلمیرم، گؤزلریم باغیرمیشدی
و بوتون سطیرلرین باشیندا بؤیوین گؤزلریم
کؤرپه‌سینی دوغورماقدا اولان آسلان تک بؤیوره-بؤیوره قالمیشدی.
