تکی سن یاشا ای منیم آنادیلیم
آنامین سودویله جانیما سیزان نیسگیلیم
آتامین چؤره‌ییله قانیما هوپان سئوگیلیم
ساوالانین سازاغییلا منی دیندیرن دیلیم
تکی سن یاشا، سن دیلیم!
آخی سنینله انسانی اؤیرندیم
سنینله سئوگیلیمی سئودیم
سنینله کؤرپه‌می دیندیردیم، یوروتدوم،
سنینله آددیمینی یئره اکیب، تورپاغی سئویندیردیم
چؤره‌یی، سویو سنینله تامسیندیم
سنینله سئوگی‌یه دالیب دوروخسوندوم
اته‌ییندن الیمی نئجه اوزه بیلَرم
باشیما دوغان بو آی دا، بو گونش ده سنینله دوغور
انسانا آییلدیغیم یئرده نئجه سن کیمی شیرینیم‌دن، بالیم‌دان آیریلا بیلَرم
ای منیم سو دیلیم، سوساماق دیلیم، سوسماق بیلمه‌ین سوسوز دیلیم!
مینلر من کیمی یولوندا دؤیولسه ده، دؤزه‌جک
مینلر من کیمی گلیب سنی سئویب کؤچوب گئده‌جک،
سن آنجاق یئنه یئنه یئنه یاشایاجاقسان
منی سن، تورک انسانینی سن، آنجاق سن یاشاداجاقسان!
سن ده غم یئمه قلمیم،
بو دیل سنین و منیم،
هله کی، ساوالانین باشی آیاز،
هئچ ده سارسیلما، سوسما،
دیک توت باشینی یورولمادان یاز!
بو تورک انسانینی آنجاق سن، یئنه‌ده سن
یاشاداجاقسان!
۱۴۰۲/ مرداد ۲۸ / تبریز
