سون واختلاردا چوخ تصادفی اولاراق سوسیال شبکه‌لرین بیرینده منیم دکتر ساعدی‌نین ترجمه ائتدیییم «توپ» رومانی‌نین «ایلقار» نشریاتی طرفیندن دؤردونجو چاپ اولاراق نشر و ساتیش خبرینین یاییلماسینی گؤردوم. طبیعی کی، بو خبردن اولدوقجا تعجب‌لندیم چونکو من هر شئیدن خبرسیزدیم، بو اوزدن ایلقار نشریاتی‌نین مدیری اولان جناب «بابک مینقی»یه تلفن آچیب و اعتراضیمی بیلدیردیم، او جناب ایسه دیلینی دولاشدیریب و شنبه گونو (۳-۴ گون سونراسی) من‌له گؤروشوب هر شئیی آچیقلایاجاغینا سؤز وئردی. ایندی او گوندن بلکه ده ۱۰ شنبه اؤتوب کئچمیش، آنجاق جناب مینقی‌دن خبر چیخمامیش و بو مدت‌ده آچدیغیم تلفن‌لارا دا جاواب وئرمه‌میش. بلکه جناب مینقی‌دن بیر خبر چیخسین دئیه، بو گونه کیمی گؤزله‌دیم، آنجاق خبر چیخمادی.
بئلنچی چیرکینلیک‌لر افشا اولونمازسا، گئت-گئده اونون چوخالیشی و نهایت بیر عادی حالا گلیشینه شاهد اولاجاییق. باشقالاری‌نین امه‌یی حسابینا اؤز مالی منفعت‌ینی قووماق ایسته‌ین بو آدامین بو چیرکین ایشی هله بیر یانا دورسون، هر شئیدن اؤنجه قلم و قلم صاحیبی‌نین دَیری و حؤرمتینی گؤرمزدن اونو گؤزدن سالماق ادبیات آلانیندا داها بیر پیسلیک‌دیر.
