هئچ کیم خانیم!
رقیه کبیری
گئنه سس، داش کیمی باشینا دوشور. باشیندان چیینلرینه، قوللارینا، جانینا آغیرلیق ائدیر. گئت- گئده ازیلیر، کیچیلیر، اوتاغین بیر بوجاغینا سیغیشیب، یوماقلانیر. دیزلرینی قوجاقلاییب، باشینی دیزینه قویور. مِشلی، ساری ساچلاری شلاله تک دیزلریندن آیاقلارینا دوغرو آخینیر.
تنه بیدن گلن زیل، شارقی سسینه دایانا بیلمیر. دیشینی دوداغینا سیخیر. اوره یی دولو دَیمیش آلما کیمی زده‌لنیر. زَده لرین آلتیندا قوردلار قیمیلداییر. ایچی قارالیر. سسی ائشیتمهسین دئیه، اللرینی قولاقلارینا سیخیر. قولاقلاری کولک کیمی کوفولداسا بئله، تنهبیدن گلن زیل سس هنیر- هنیر گؤیدن باشینا تؤکولور. قولاغینین پردهسینی اودلاندیریر. بئینینی قیزیشدیریر.
نشادور اوستونده اوتوران آدام کیمی بیر دن بیره یئریندن دیک داشلانیر. قالخیر: « گئدیب کنتروللاری باشینا چیرپاجاغام» اؤزویله دئییر. توویلا قاپیا ساری گئدیر. تنهبییه گیرهلی، آددیملارینی یاواشلادیر. کیشینین جورابلارینین تایلارینی موبیل اوستوندن گؤتوروب، ایچ- ایچه کئچیردیب، یوماقلاییر. کیشیایسه موخدهنین اؤنونده یاسدیغینا سؤیکهنیب، گؤزونو تئلویزیونا زیللهییب. الیندهکی سیقارانین توستو حالقالاری تاوانا ساری بورولور. بیر آن جوراب یوماغینی وار گوجویله توپ کیمی کیشینین باشینا چیرپماغی گلیر. دوردوغو یئردن تئلویزیونداکی شارقیچییا باخیر. پار- پار پاریلدایان پیلکلی، قیرمیزی دونون یاخاسیندان پیرتلایان آغ مرمرلری گؤردوکده، یوماغی اووجوندا سیخیر. بارماقلاری اینجیییر. اؤز بلوزونون کیپ یاخاسینا، بارماقلارینین اوجونا قدر یئتیشن چینلی قارا اتک‌لییینه باخیر. سسسیزجه جوراب یوماغینی موبیلیانین اوزهرینه تولازلاییر. شارقیچینین زیل سسی مته کیمی بئینینی قازیر.
میطباخا ساری گئدیر. الینده توز دسمالی گئری دؤنور. تلویزیونون یانیندا دایانیر. تئلویزیونون اوستونده‌کی ساعاتی گؤتوروب توزون آلدیقدا کیشینین سسی گلیر:« گئنه کی صفحهنی قارالتدین! چکیل قیراغا! باخیرام آخی…!»
دؤنوب ترسه- ترسه کیشییه باخیر. کیشیایسه:« هه…؟ نه وار؟ دئییرسن به زئرزَمیده یوسوف اوتوروب، قولاقلارین قیسیب اوتوروب؟ کوپ دئییل هاااا…تئلویزیونا باخان آدام دی…گؤزو وار…»
قادین الینده دسمال، دینمز- سؤیلهمز سویو سوزولموش کیمی تنهبیدن اوتاغا دوغرو گئدیر. پنجرهنین اؤنونده دایانیر. حیهطه باخیر. آغاجدا قار- قار قاریلدایان قارقالارین سسی شارقیچینین زیل سسینه قاریشیر:
« قار…قار…قار…»
« بو دئویرده کیمسه شاه دئییل، پادیشاه دئییل…»۱
« قار…قار…قار…»
پنجرهنی آچیر. هاوانین شاختاسینی کؤکسونه چکیر. هئرهده قارین اوزه‌رینده سئرچهلرین جایناقلارینین ایزینه باخیر. سحر تؤکدویو چؤرک خیردالارینین بیر دانهسی بئله قالمیر. کَردیده ال دَییلمهمیش قارین اوزه‌رینده سئرچرلرله قارقالارین جایناق ایزلری کسیشیب، بیر- بیرینه قاریشیبلار. پیشیکین آیاق ایزلری قارین اوزرینده گیرده- گیرده دئشیک آچیب. تام شارقیچینین زیل سسیندن دولایی بئینینین کاساسیندا آچیلان دئشیک لر کیمی….
« بو دئویرده کیمسه شاه دئییل، پادیشاه دئییل…»
« قار…قار…قار…قار…قار…قار…»
یئددی قونشو اویانلیق ائشیدسین دئیه، باغیرماغی گلدی. سسسیز- سمیرسیز اؤفکهسینی الیندهکی توز دسمالینا تؤکودو. وار- گوجویله دسمالی پیشییین آیاق ایزلرینین اوزهرینه آتدی…
پنجرهنی قاپادیب، بیر شئی اولمامیش کیمی اوتاغا قاییتدی. کیشی پادیشاه کیمی یاسدیغینا دایانیب، سیقاراسینی کؤکسونه چکیردی. سیقارانین کؤزو شارقیچینین پالتارینین رنگینه دؤنموشدو. کنتروللار کیشینین دیرسهیینین آلتیندا تیکان کیمی گؤزونه باتدی. تووالته ساری یؤنلدی. تئلویزیونون اؤنوندن گئچدیکده، آددیملارینی لاپ یاواشلاتدی. تووالتده شیری آچیب، سو بوش- بوشونا آخدی، آینانین اؤنونده دوردو. الینی قارا قاش- گؤزونده، دولما دوداقلاریندا، مِشلی ساچلاریندا دولاندیراراق دوشوندو:« من کی چیرکین دئییلم!»
بوغولماق اوزره‌یدی. سانکی تووالتده بیر چکیم نفس اوچون بئله، هاوا یوخ ایدو. بولوزونون یوخاری دویمهسینی آچدی. دریندن کؤکسونو چکدی. الینی بویون- بوغازینا گزدیردی. کؤکسوندن قارنینا ساری؛ الی اتکلییینین اوستوندن، کیتاب کیمی صام- صاف قارنینین اوزه‌رینده قالدی:« بلکه بیر قیزیم- اوغلوم اولسایدی…»
گؤزلری دولوخدو. شیری بوردو. سو کسیلدیکده، شارقیچینین زیل سسی تووالتده قولاقلارینی آزارلادی:
« آنلادیم
شیمدی دونیانین رنگی
سنسیز سولوق
سنسیز دونوق…» ۲
تنهبییه گئری دؤندو. تئلویزیونون اؤنوندن کئچدیکده، شارقیچینین سسی اورهیینی آغریتدی. کیشی ایسه بیر داها سسلندی:« داغدان گلیر بانو خانیم!….گؤرموسن باخیرام؟ آز تلویزیونون قاباغیندا ویرنیخ گؤراخ دی …»
قادین گؤز آلتی تئلویزیونا باخدی. شارقیچی پالتارلارین دئییشمیشدی. قارا دونونون یاخاسیندان گؤرونن ایکی مرجان ایینه کیمی گؤزلرینی دَلدی…
سامانا اود دوشن کیمی قیسقانجلیق جانینا دولدو. پالتار کومودونون اؤنونده دایاندی. ایکی جوت بیر تک، توی پالتارلارینا باخدی. نخودو رنگلی، زَرلی، مینجیقلی توی دونونو اَینینه گئیدی. اوز- گؤزونو بَزه‌دی. مشلی ساچلاری دونونون رنگیندهایدی. تنهبییه گئدیب، کیشینین اؤنونده دایاندی. کیشیایسه اونو گؤرجک، جین گؤرموش کیمی یئریندن داشلاندی. قالخیب اوتوردو:« بو نه اویون بازلیخ دی؟ بو نه دی گئیدین؟»
قادین اوزونه گولدو. کیشی ایسه یئریندن قالخدی:« منه مهمهلی خاتین اویونونو چیخارتما هااااا….قوی گئت اَیین- باشینا آدام کیمی پالتار گئی!»
شارقیچینین زیل سسی داش کیمی باشینا دوشدو:
«سن له بانا،
بن له سانا،
بیر گون داها قالمادی
یا گئدیرسین،
یا قالیرسین،
یا سوسارسین…» ۳
اوتاغا دوغرو قاچدی. پنجرهنی آچیب، هاوانین شاختاسینی کؤکسونه چکدی. قارقالارلا سس بیر اولدو:
قار…قار…قار…
۱-۲-۳ تورک بیر شارقیچینین شارقیلاریندان بیر پارچا
۲۳ دی – ۱۳۹۰
یک پاسخ
ساغ اولون .سوزسوز کی بو نوع گوزل صمیمی و اورک یازیلاری انسان حاقلاری قورونماسینداچوخ درین تاثیری اولا بیلر.بو یازی بیرنمونه اولاراق مین لردن اوزویله سایسیز سوز داشییر.اولسون کی بئیین لره باتسین.