یاغیش گونو
اسماعیل خرمی
(فهله‌لر گونو مناسبتینه)
دردلی بیر آدامین گیزلی – گیزلی، خیسین – خیسین آغلادیغی کیمی، بولوتلاردان آیاغی سوروشوب ییخیلان یاغیش گیله‌لری یاواش – یاواش، قاپ – باجانی دؤیوردو. ائله سیسقین – سیسقین یاغیردی کی، بو یاغیشدا ایسلانان‌لارین خوروشونو چکیردیم. ایشیمه گؤره، نئچه واخت گؤزله‌دییم خوش بیر گون گلیب چاتمیشدی. تلم – تله‌سیگ حاضیرلاشیب، یولا دوشدوم. یول اوستو دایاز چوخورلاردا، دورموش سولار ایچره، یاری ایسلانمیش قورو یارپاقلار، قاییق کیمی اوزمه‌یه باشلامیش‌دیلار. آغاجلار پالتارلارینی بیر- بیر سویونوب، یاغیشدا چینمک ایسته‌ییردیلر. بوز نیمداش پئنجه‌ییمین دویمه‌سینی باغلاییب، قارا بؤرکومو باشیم ایسلانماسین دئیه، آلنیم ایتینجه آشاغی چکمیشدیم. آغاجلارین بو گؤرونتوسو سول آیاغیمین باش بارماغی و ساغ آیاغیمین دابان حیسسه‌سینه تانیش ایدی. آنجاق او قدر بو یاغیشدان دادلانیردیم کی، عؤمرومده بئله داد آلمامیشدیم.
بیر ایله یاخین ایدی ایشدن آلینمیشدیم. آلتی آی، آیلیغیم و باشقا ایش حاقلاریم وئریلمه‌میشدی. نئچه واخت اولاردی، امک بوروسونا، شکایت ائتمیشدیم. بوگون واخت گلیب چاتمیشدی. اونلارین یاردیملاری ایله، ایسته‌دییمه چاتا بیلدییمه آرخایین ایدیم. خانیمین بؤیلولوغو سککیز آیین ایچینده ایدی. دوکتورلادان اوغلان اولدوغونو اؤرگنمیشدیک. هر گون الیمی خانیمین قارنینا چکیب اونون تپیک آتماغینی دویوردوم. خانیما دئییردیم:
– گؤرورسن ظالیم اوغلو، ایندیدن آیاغین الیمه چیرپیرکی؛ گئت دوغوم گونونه حاضیرلیق ائله.
پوللاری آلدیقدا، دوغوم خرجلرینی بیر یئره توپلاییب، اونا ان سئودییم گئییملری آلمالی ایدیم. آیاغیما سوواشان پالچیقلاری دوشونموردوم. یولو الیمه آلیب امک بوروسونا دوغرو گؤتورولموشدوم. یولدا گئده – گئده اوغلومو ذهنیمده گئیندیریردیم. ماوی گئییم‌لر ظالیم اوغلونا یامان یاراشیردی. آغ بؤرکده باشیندا اولاندا دهشت اولوردو. بارماغیمی یاواشجاسینا بورنونا سورتنده اؤردک کیمی قیغیلداییردی. سوت قوخوسو آدامی کئفلندیریردی. آناسی نازلانا – نازلانا دئییردی:
– کیشی اوشاغی اینجیتمه. قوی اوشاق یاتسین.
ایندی اؤزومون حیاتیمی و هله دوغولمایان کؤرپه‌مین، گئییم‌لرینی ایش بوروسو رئییسی‌نین الینده گؤروردوم. منیم بوتون ایستکلریمی یئرینه یئتیریب، ذهنیمدن کئچن ماوی گئییملری و آغ بؤرکو پای اولاراق اوغلوما وئردیین دوشونوردوم. البته‌ده بئله اولمالی ایدی. انسانلیغین یاریسی اؤلسه‌ده، یاریسی دیری قالمالیدی. اگر انسانلیق بوتولوکده اؤلوبسه، بیز بو دونیادا نه سوله‌نیریک. بو قدر قانونلار و مدنی ایستکلر نه اوچوندور؟ بورا اؤز آرامیزدی الیمیزدن بیر یانلیش ایش گلنده، قونوم قونشودان توت، امنیتی اداره‌لره‌دک آدامین دده‌سین یاندیراردیلار. بونا گؤره ده، دوشونوردوم هامیمیز بیر- بیریمیزین فیکرینده‌ییک. انسانلیغین یاری قالان جانینا ایناناراق آددیم‌لاریمی ایش بوروسونا دوغرو، داها سرت گؤتوروردوم.
ایش بوروسونا چاتمیشدیم. ایش صاحیبی‌مین قاپیدا تانکا اوخشار پرادو ماشینی دورموشدو. مودورون قاپیسینی تانییردیم. بیریندن سوروشمادان قاپینی دؤیوب ایچه‌ری گیردیم. ایش بوروسو مودوروایله، بیزیم مودور باش – باشا وئریب خیسین‌لاشیردیلار. منی گؤردوکده بیر- بیریندن آیریلدیلار. سلاملاشاندان سونرا، بؤیوک، یوموشاق و قهوه‌ای، مبلون اوستونده ایلشمه‌یه یئر گؤستردیلر. بیزیم مودور منی گؤرنده گولومسه‌دی. ندنسه بیرآز ایچیم توخدادی. بیر باشقا آدام‌دا، قاباغیندا نئچه – نئچه، دفتر- دستکله اوتورموشدو. باشی یازماغا قاریشیق ایدی. امک بوروسونون مودورو دورمادان دانیشیغا باشلادی:
– دفعه قبل من جنابوزون خدمتینه عرض ائله‌دیم؛ تمام تلاشیمی ائده‌جم تا حق – حقوق‌لارینی، بو کیشیدن آلام. اما متاسفانه آقا ورشکست دوشوب و دییه‌سن جنابعالی‌دن شرمنده اولاجام.
باشیما بیر قازان، قاینار قیر تؤکدولر. منی تر سوپوردو باسدی. چوخ چتین‌لیکله اوتغونا بیلدیم.
– نئ نئ نئجه یا یا یانی ورشکست دوشوب؟ به م م م م م نیم ایشده دددددددددیم نه اولدو؟
– آقای محترم وقتی من دئییرم ورشکست یعنی ورشکست. یعنی آغانین سنه وئرمه‌یه پولو یوخدو. قوی سنی باشا سالیم.
بیر ساعاتا یاخین دانیشیقدان سونرا ورشکست سؤزجویونون نه اولدوغونو، چوخدا گؤزل باشا سالدیلار. ایش صاحیبی‌مین یاخشیلیغیندان دا او قدر دانیشدیلار؛ آز قالدیم اوندان عوذور ده ایسته‌یم. کیشی، الله آدامی ایمیش. من آخماقدا، یازیغدان، تانیمادان شکایت ائتمیشم. شرکتده نماز واختی قولون چیرماییب نمازخانایا قدر گئتمه‌یین گؤرموشدوم. حتی آدینا آخشاملار ایشچی‌لره ایشدن چیخان واختلار، جومعه نمازینا، گلمه‌یی تاپشیراردی. هله اونون خئیریه ایشلریندن او قدر سایدیلار، دوغروسو اؤزومدن اوتاندیم. نئچه یئرده مچید تیکدیردیی، موختلف اداره‌لره، لازیمی قدر یاردیمی، مین‌لر نفره احسان وئردیی، و حتی باشقا مملکت‌لرده‌کی موسلمان باجی قارداش‌لاریمیزا دویونجان امگی کئچمیش‌میش.
اؤزومو توپارلاییب یاواش – یاواش اوتاقدان چیخدیم. مودور ده مندن بیرآز سونرا چیخدی. مودورون گؤزلرینین ایچی گولوردو. ماشینا چاتدیقدا منه آشاغیدان یوخاری باخدی:
– اوستو باشین پالچیق اولماسایدی مسیرینه آپاراردیم.
اؤزومده اوستومه باخدیم. گلنده نئجه گلیرمیشم، هاردان کئچیرمیشم، آنلادیم. ایندی بولود هؤنکور – هؤنکور آغلاییردی. بؤرک مئیدانی دئییلدی. بولودون گؤز یاشلارینین نه اولدوغونو جانیم آنلاییردی. آنجاق او ظالیم اوغلونون ماوی گئییمی و آغ بؤرکو گؤزومدن اوزاقلاشمیردی. ائوه گئتمک ایسته‌سمده، ایسته‌مه‌سمده، آیاقلاریم منیم دئییلدی…
