بیلیرم
قورخارسان یالقیزلیغی‌نین یاز نفسیندن،
پاییزلیغی‌نین پارام- پارچا هوسیندن.

بوغازیمدان بوغاز ایدین منه،
اوره‌ک دوغاجاقدین سئوینه- سئوینه؛
منسه
اوره‌ییمی یونوب، قلم ائدیب
وئردیم ال‌لرینه؛
آیاق‌لارینا
قیشغیران دامارلاریمی باغیشلادیم؛
گؤزلرینه
گله‌جه‌ییمدن اوزوک تاخدیم؛
دیللرینده
اومیدلریمی دیلیم – دیلیم ائدیب دیللندیردیم.

منکی، سسیمی
سره بیلمه‌دیم سنین سرینلییینه؛
پولیسه یاخالانمیشدی آغ جییارلاریم
هانسی مقبرلرده اوره‌ییمی آختاریم،
هانسی حبسخانالاردا بارماق‌لاریمی تاپیم؟
بوغازیم هاردادیر هاردا،
ایندی
حبسخانا جیزگیسین اوتخونور یوخسا؟

اؤگدوگوم بیر آخشام اوستو
توتوشموش بیر توتغون چرچیوه‌لرده
ایچیم،
سنین اؤنونده گوللـه‌لندی؛
چؤلوم،
قزئت‌لرین باش یازیسی اولدو.

سنی گؤرورم
قورخورسان یالقیزلیغیندان، پاییزلیغیندان.
باخ،
اورا باخ،
یازیلارا سوخولموش او شورگؤز کولک‌لر
ساچیندا لام سودولار.
آخیرلار آخیرا قده‌ر
باخیرلار باتلاق‌لارا قده‌ر
باتیرلار باتی‌یا قده‌ر.

ایندی‌دن اوره‌یینی قیبلایا چئویرمه!
سنین
قادینلیغا بورونموش آغاجلیغین
آغاجلیغا بورونموش قادینلیغین وار.
آییرتلا ایچینی،
یویوندور گؤوده‌نی گؤزلریمدن.
بیلیرم
قورخورسان یالقیزلیغیندان، پاییزلیغیندان.