یاساق بیر آلماایدی ساچلارین،
باخان جنت‌دن آتیلاردی؛
اونو هؤره‌ن ال‌لره مفتیللر توخوناردی.
قورخا – قورخا،
سورونه – سورونه
یانیندان یان کئچردی گؤزلر.
دیل توپوق وورادی،
آدینی آغزینا گتیردیکده.

بیزه بئله دئمیشدیلر،
بیزی بئله اؤیرتمیشدیلر:
سنی گیزلتدیکجه جنته یاخینلاشیریق.
آمما سن ائی ساری ساچلی قیز!
ساچلارینی گونشه هؤره‌ن،
تئللرینی یئللره وئره‌ن
صاباحی هر گون یوخودا گؤره‌ن!
گؤرورم سنی،
ساچلاریندان یاپیشیب آیاغا دورورسان؛
یاساقلاری باشیندان آچیب
اودلارا آتیرسان؛
زنجیرلرین پاخلالارینی
گؤرونن تئل‌لرین داغیدیر؛
تئللرین داغیلدیقجا
قارانلیلیق،
اؤنونده دیز چؤکور.

مرمی‌لری آغلادیرسان
ییخیلیرسان، دورورسان،
گؤزونو قیرپمادان
اسگی‌لره، جنت یوخولارینی-
زورلا گؤزوموزه سوخانلارین-
یوخوسونو پوزورسان.

سن ای گونش ساچلی قیز
گؤرورم سنی!
هؤرویونده قرنفیل آچیر،
آی باتیر،
گونش چیخیر
گؤزلریمیزه نور ساچیر؛
ساچلارین الیمیزدن یاپیشیب آیاغا قالدیریر؛
بیزی آیاغا قالدیریر
یوخودان اویادیر.

تئلیندن هره‌میزه بیر پای وئر
کوچه – کوچه گزدیرک،
شهر- شهر اوچورداق
سن ائی ساری ساچلی قیز!