سنی سئورکن
اؤلدورورسن آدامی.
منی سئون اؤله‌جک دئیه-
کوچه‌لر، مچیدلر و ائولر
سندن قوجاق
سندن اؤپوش چالیرلار آخشاملار.
الی خینالی شعیرلر
الی اللردن اوزولموش دانیشیقلار
اؤزگورجه‌سینه،
الی آغزینا چاتمایان یازیق گونلر
دوداقلارینا وورغوندولار.
سوسقون آغاجلار-
تانیقلیغینی دانمیرلار،
یارپاقلارین سنینله اؤپوشرکن
پاییزین بورنوندان قان آخدیغینی.
جان وئرن بوداقلارین
سون باخیشینا باخان داغلار
بیر خارابالیقدا آغلاییرلار.
دئسم قیرمیزی بویا
یاراشمیر سنه،
سؤزومو گئری آلیرام.
قیرمیزی اؤرتوک
آغ اوزونه باداقلیدیر
اوزوندن یول آچان
دیرناقلارین جیزگیسیندن.
گولوستان پارکیندا
آیاق توتوب یئریین پیچیلتیلار،
شه‌هرده روحلارین قوماریندان سؤز آچیرلار.
گاه اودوروق، گاه اودوزوروق
بوگون سنین دوغوم گونون
موتلولوقلار.
بوگون سنین اؤلوم گونون
قالانلارا باش ساغلیغی.
گئجه لر چورویور ایچیم
گونوزلر یئنی‌دن اؤزومو دوغورام.
اؤزوم اؤزومه
یاس توتورام
توی توتورام
آذر آییندا.
