دیب‌سیز اوچوروم
سولماز جمالی
خیاباندان کئچرک اللرین اؤلچور؛ قیریق- قیریق گولور:
– اشی اولار آیاق آلتداکی تؤر- تؤکونتولردی!
آغ اوزونو نظردن کئچیردیرم؛ اوجادان گولورم:
– هه…او اصلی آدامی دئ با! اونو دا تانیسان.
یئنه ده گولور. گؤزلری پاریلداییب قیغیلجیم تؤکور. ائله گولور کی چیین‌لری اسیر. «گاهن ایچیمیزده قارانلیق بیر شئی وار، آنجاق اونون دا ایچینده یاشام پاریلداییر…»دئیه دوشونورم. الی‌نین آرخاسی‌ایله گؤزلرینین آلتین سیلیر:
– گؤزومون قاراسی یاییلمئییب؟!
باشیمی ائهمالجا آرخایا ترپه‌دیرم. «دایان!»- دئدی- «بو شالوارلارا باخیم!». ا‌ییلیب یئرده ساتیلان شالوارلارا باخیر. دیزلری اوسته اوتوروب چؤمبه‌لیر. قیمتلرین سوروشوب یئنه پال- پالتاری آلت- اوست ائدیر. ایسته‌دییین تاپا بیلمه‌دییینده آیاغا قالخیر. آل- وئرچی دیلی آلتدا دئیینیر:
– دؤرد ساعاتدی منی اسیر ائلئییبسن، آخیردا دا اوزو چؤور گئت.
دالینا باخمادان الین قالخیزیب سیلکه‌له‌ییر:
– سئومه‌دییین آداملا نییه ائوله‌نیبسن؟
زورلا اینسانلارین آراسیندان یول تاپیب آددیملاییریق. بیر- بیریمیزی چتینلیکله ائشیدیریک:
– من ایستئییردیم اؤلکه‌دن چیخام، باخدیم گؤردوم ان راحات یول بودو. یا گرک سئییرجی اولوردوم یا عمله کئچیردیم.
بیر نئچه آنلیق سوسور:
– منیم آماجیم باشقئیدی. من گئدننن سورا هر شئی جهنمه، نه اولور اولسون!
– آدینی دئمه‌دییین‌نن گؤروشوسن هله ده؟
قاشلارین چاتیر، ساری ساچلاریما زیلله‌نیر: «یوخ، آیریلدیق»- دئدی. «عورضه‌سی اولمادی منی ساخلییا.»
گؤزلرینه باخیرام. شاققیلداییب گولور. سانکی گولوش دئییلدی، دیب‌سیز بیر قویودان گلن عکس- صدا ایدی. «هه…»- دئدی. «اؤزوم ده بیلیرم چوخ یالان دانیشیرام.»
گؤز وورور منه. کسیک آغاجلارا، چیلپاق بوداقلارا باخیب دریندن نفس آلیرام. له‌چر قادینین باشیندان زویوب دوشن لئچه‌یینین آلتیندا هانسی آنلامسیز ،سارساق دوشونجه‌لر جوجه‌ریر؟!
– آیاق اوسته دانیشاجوخ؟
دوشونجه‌مین ساپی قیریلیر. «گئدک بی یئرده اوتوراق، سونرا گؤزوم اوسته سورولارینی جوابلییاجام»- دئدی. «او قدر اؤزلرین آداما سورتورلر کی… اصلا راحات ده‌ییرم.»
گؤز اوجو ایله اوتانقاج باخیشیمی، پؤرتموش اوزومو گؤروب گولور. یئنه عارسیزجاسینا داوام ائدیر:
– فقط قلیانی زادی اولسون هااا.
قلیانین توستوسون بورونوندان چیخاریر:
– من همیشه ایستردیم آزاد اولام، آزاد یاشییام. کیمسییه حساب وئرمه‌دن.
باشدان آیاغا سوزور منی:
– هله ده بیلمیسن دونیادا نه لذت‌لر وار.
دوداقلاریمی بیر- بیرینه قیسیرام. آنلاشیلماز بیر سویوق تیترتمه بدنیمی بورویور. قادین‌لارین بزه‌ک ائوینده بیر- بیری‌له دانیشدیقلاری سؤزو خاطیرلاییرام. اونلارین قورو، کسیک-کسیک گولوشلری قولاقلاریمدا ایدی:
– بیری اولا دیز- دیزه اوتوروب دانیشدیغیندا بئله اوره‌یین قاناد آچیب اوچا. بونو سن فقط بیر نفرله یاشایارسان…
یئنه سوسور. گولوشلری قولاغیمدا سسله‌نیر. گؤزلری‌له چاینیکی، ایستکانلاری قاباغیمیزا دوزن گارسونو سوزور:
– بلکه ده هئچ تاپمایاسان!
نه‌سه خاطیرلاییر. گؤزلری دولور. بیرآز گؤزلرین بره‌لدیب اویان بویانا باخیر:
– اؤزگورلویو ایسته‌دییین کیمی سرگیلئییرسن.
گولور، یئنه گؤز وورور:
– بلی جان دوست زمانه دولاندی و ده‌ییرمان ترسه‌سینه چئوریلدی.
ساچلاریمی، دیرناقلاریمی گؤزدن کئچیریب داوام ائدیر:
– بیز قادینلار، چوخ شاشیردیجی عادتیمیز وار. زمانه، حیاتی بیزه چتین توتاندا، دیرناقلاریمیز، ساچلاریمیز، سؤزلریمیز و ایلیشکیلریمیزی قیسالتماغا باشلاییریق.
نئچه بر- بزه‌کلی جاوان اوغلان گولرک های- کوی‌له ایچری گیریرلر. قلیاندان چیخان قاتی توستو بورولا_بورولا هاوایا قالخیر. «بیری گله‌جک او قدررر سنی سئوه‌جک اؤزون ده ایستییه‌جکسن»-دئدی. «او زامان منه بئله باخمییاجاقسان»
– منی سئوه‌جک؟
– هم سنی هم ایلیشکینیزی.
ردیفله دوزولموش دیشلرین یئنه آغاردیر عارسیزجاسینا؛ باخیرام اوزونه؛ گؤزلرینده‌کی پاریلتی روحون نیفرت دولو قیغیلجیملارینین سایریشماسی‌ایدی. سانکی داها هئچ بیر قونو اونو اوزه بیلمیردی. «حیاتیمیزی بوروین تئللر باری اوره‌ییمیزی باداقلاماسین»- دئدی. «اوره‌ییمیز، آیاقلاریمیز تیر- تیر اسمه‌سین.»:
– ائلچین‌ین دوستلاریندان بیری سنی گؤروب بیه‌نمیشدی، اما داها ائوله‌نیبسن.
بیر- بیریندن آزجا آرالی، دولو دوداقلاری واردی. اوزونده کی کدرلی سئوینج اونون آی اوزونو دومان کیمی بوروموشدو. ائله بیل دیشلرینی آغاردا- آغاردا منه گولوردو.
– پولو وار؟
یئنه اوزونده دونوب قالمیش باخیشمی سایمیر. چایدان ایستکانلارا سوزور. قولباقلاری بیر- بیرینه ده‌ییب جینگیلدهییر. – پولو وارسا وارام.
آلنیمدا مونجوق_مونجوق پوچورلانان تری حیس ائدیرم. اوزومه، گؤزلریمه دیققتله باخیر، بئینیمدن کئچنلری آنلاماق ایسته‌ییر. ایلیق، قلیان قوخولو نفسینی اۆزۆمده دویورام. سس‌سیز گولوشو یاواش یاواش دییشیر، تام باشقا جور اولور. بیزیم آرامیزدا، نه قدر ده یاخین اولدوغوموزا باخمایاراق، دیب‌سیز اوچوروم اولدوغونو بو قورخویا بورونموش، نیفرت دولو گؤزلر آنلادیر. اوزونده ایستم‌سیز بیر گولوش دونوب قالمیشدی. سانکی بیرینی خاطیرلامیشدی.
– اما بو ایکی «من»آراسیندا هئچ بیر فرق یوخدور.
سؤزلرینین گئرچک اولوب اولمادیغینی آوارا بیلمیرم. گوجومو توپلاییرام. سؤزجوک‌لر یویوروب دیلیمدن تؤکولور:
– منیم، سننن داها بیر باغلیلیغیم اولا بیلمز.
چایدان بیر قورتوم ایچیر. قیریق- قیریق گولور. بو چیلغینلیغین سسی‌ایدی. تاواندا سایریشان ایشیقلارا زیلله‌نیر:
– بیر گون، اؤلوم حالیندا اولدوغونو سانیرسان. ائرته‌سی گون آنلاییرسان کی، تک گؤره‌جه‌یین ایش نئچه پیلله آشاغی ائنیب یاندیرماق اوچون بیر ایشیق تاپماغین‌ایمیش. هر شئیی داها آیدین گؤرمک اوچون…
گؤز اوجوایله بیر باخیش آتیر منه ساری. دوداقلارینین قیراغیندا کینایه‌لی گولوشو د‌ییر گؤزومه. سارساقلیغینا چوخ اوزولورم. اشیالار، انسانلار، زامان، کئچمیش، گله‌جک، اورا، بورا…منه هئچ‌بیر رئاللیق یوخدور. توکومو اورپه‌دن او غریبه گولوش منه ساغالماز یارا وورور. بنزرسیز بیر سارسینتی یاشاییردیم.
توستو قفه‌خانانی بورویوب. گؤزدن، کؤنولدن اوزاق بیر یئرایدی. قفیلدن هرنه دومان ایچینده اریییب یوخ اولور. اشیالارین، اینسانلارین جیزگیلری پوزولور. یان دؤوره‌مه باخیرام. رنگ‌لر سولوب. اطرافیمدا گؤزه ده‌یه‌سی هئچ نه یوخدور؛ یان دؤوره‌م خارابالیق‌دیر. چیی کرپیجدن تیکیلمیش لال دووارلارین قالیقلاری گؤزه ده‌ییر. قوپ_قورو اوتلار، زیر- زیبیل قالاقلارینی اییله‌ییب ایچینده ائشه‌له‌نن ایتدن، یانیمدا اولان کؤلگه‌مدن ساوایی هئچنه یوخدور. ائله‌بیل قفه خانا یئرلی- دیبلی یوخ‌ایمیش.
هاوا توتقوندور. گؤی یئنه خیردا یاغیش چیسه‌له‌‌ییر. دؤرد یانیم سیخ دومانا بورونور. بئینیمه یاواش- یاواش نملی دومان هوپور. بئلی بوکولموش کؤلگه‌می گؤرورم؛ دومانین ایچیندن چیخیر. اورکک، سولغون اوزونو آواریرام. آغیر نفس آلا- آلا یئریندن ترپه‌نیب بوم- بوز بدنی‌له منی قوجاقلاییب ایچینه سومورماق ایسته‌ییر. باشیمداکی توکلر قاباریر. اوره‌ییم دایانیر، نفسیمی ایچیمه قیسیرام. اؤزومو اؤزومده گیزله‌دیرم. آغاجلارین کسیک کؤتوکلرینده، چیلپاق بوداقلاریندا گیزلنمک ایسته‌ییرم.
کؤلگه‌م ده اریییب یوخ اولور. ایزی- توزو قالمیر. چیی کرپیجدن تیکیلمیش ا‌‌یری- اویرو ائولرین تکه- توک تیتر‌ه‌ک ایشیقلاری اوزاقلاردان سایریشیر. قولاغیما ضعیف سس‌لر ده‌ییر. سانکی قان دامجی‌لارینین تورپاق اوسته گیله- گیله سوزولن سسی‌ایدی. میلچک‌لرین ویزیلتی‌‌لارینی دویوردوم. بو واهیمه‌لی سسین اوزاق عکس- صداسی بئینیمدن کئچیب منی داها دا اوشودور.
آددیملاریمی قیوراق آتیرام. تپه‌جیک‌دن، کله- کؤتورلو، کول- کوس‌لا بورونموش اوزو قارا یولدان کئچیرم. آیاقلاریمین عکس- صداسینی ائشیدیرم. یول قاتی دومان ایچینده، نه قدر یئیین یئریسم ده قاتی سیلکه‌لنمیر. پاریلدایان ایشیقلارا چاتماق ایسته‌ییرم. انسانلارین سس- کویو، قالما- قاللاریندان خبر یوخدور. سانکی بورالاردا هئچ بیر زامان کیمسه یاشاماییب.
چاتلاق- چاتلاق دووارلارین، باجاسیز- قاپیسیز سس‌سیز ائولرین رنگی گؤزلریمه داغیلیر. هئچ بیر زامان گؤرمه‌دیییم اوزاق، پوزوق- بولانیق بیر یئر. کؤلگه‌م دووارلار آرخاسیندا بیر بوجاقدا باجادان بویلانیب تام گیله‌لریمه زیلله‌نیر؛ سس‌سیز_سمیرسیز باخیشی کؤکسومده د‌‌رین گرگینلیک بسله‌ییر؛ منی ایچینه چکمه‌یه چالیشان کؤلگه‌م. بیر هئچلییه، بیر یوخلوغا چئوریلیرم. سانکی ائله بو آن من ده اریییب پوزولاجام، یوخ اولاجام.
گئجه اوغرون- اوغرون سیویشیب آرادان چیخیر. حیاتیمی سارمیش سیخینتیلی، قورخو دولو بیر گئجه‌ده هئچ بیر ایزی جیغیری تانیمادیغیم بیر یولدا گؤزو یومولو ایره‌لیله‌ییرم. گئجه‌نین اومیدسیزلییینه هوپورام. منیم حیاتیم گئجه‌لرین آجیماسیزلیغینا گؤمولموشدو.
گؤزلری منده پرچیمله‌نیب. او گؤزلر منی ایلیییمه، قلبیمه کیمی اوشودور. لاختالانمیش قانی، دلیک- دئشیک اولموش چیلپاق بدنینی، ایچینه چؤکموش دلمه- دئشیک دووارلاردان گؤرورم. قوللاریندان گیله- گیله قان سوزولوب تورپاق اوسته دوشور. دیزلری تیر- تیر اسیر. یئکه میلچک‌لر لاختالانمیش قانین اییسینه ویزیلتییلا هرله‌نیر. قانداللارینین سسی نملی هاوادا جینگیلدهییر. کینایه‌لی گولوشو هله ده دوداقلاریندان چکیلمه‌میشدی. قوروموش بوغازیمدان دامجی- دامجی زهر تؤکولور.
