ایضاح: بو حئکایه تحکیه درنه‌یی‌نین حئکایه فئستیوالی‌نین سئچیلمیشی‌دیر
-دانیشکده‌نین قاباغیندا گودورم سنی.
فیکیره دالاراق تام بئش دقیقه‌ایدی آتدیغی مئساژا زیللنمیشدیم. موبایلیمین ایشیغی یانیب آدی یوخاری گلدییینده گؤزلریمه اینانما‌میشدیم.
هله ده چوخ قاریشیق‌ایدیم. بیر یانیم اولدوقجا حضورسوز و یورغون‌ایدی. او بیری یانیم ایسه اینانجینی قورویاراق اومیدینی ایتیرمیردی. بو ایکی حیسین آراسیندا آرادان گئدیردیم.
دیوارداکی ساعاتین گوجسوز و شوقسوز یوروشونه باخدیم. تیترک الیمی موبایلیمین صحیفه‌سی اوزه‌رینده ترپه‌دیب قیساجا،-کیلاسیم اوزویاجاق.-یازدیم.
بو گون‌لر حؤوصله‌مین قاچدیغی یئری گزیردیم بلکه تاپیب قایتارا بیله‌رم دئیه. اوغونارکن دوداق‌لاریمین بیر-بیریندن آرالانیب اوزومون قیریشدیغی گون‌لری آختاریردیم. من اؤزومو ایتیرمیشدیم. آنجاق خیاوان‌لارین، کوچه‌لرین، اولدوغوم یئردن مین‌لرجه کیلومتر اوزاق‌لاردا دئییل، من اؤز بئینیمین ایچینده دؤنوب دولاشان دوشونجه‌لرین آراسیندا ایتمیشدیم.
بیرآز آتدیغی مئساژا باخدیم؛ بیرآز دا دفعه‌لرله سیلیب یئنه یازدیغیم آدینا. نؤمره‌سینی دفعه‌لرله سیلمیشدیم آنجاق، داریخدیغیمدا اوره‌ییمه سؤز کئچیرده بیلمه‌ییب یئنه سئیو ائله‌میشدیم تلگرامداکی پروفایل شکیل‌لرینه قوربان گئتمک اوچون. ترله‌میش بارماغیم‌لا صفحه‌نی یوخاری‌دان آشاغی‌یا چکدیم. مئساژلاریمیزین آراسیندا بلکه گؤزل بیر سؤزه راستلاشیب ساکینله‌شرم دئیه گؤزومو گزدیردیم.
-تامام.-یازدی.
تامام یازماسینا پکر اولموش اولسام دا ان آزیندان بو قیلیقدا، بو سایاقدا گؤزونه گؤرونمک ایسته‌میردیم.
گؤزلریمی یومدوم گولوش‌لرینی خاطیرلاییم دئیه آنجاق، گؤزلریمی یومدوغومدا گؤزلرینی خاطیرلادیم. آچدیغیمدا همن اوتوز نفرله دولو جان‌سیخیجی کیلاسین اورتاسیندایدیم.
هر ایکی دیرسه‌ییمی نیمکته سؤیکرکن بایاقدان قارالادیغیم دفتر یئره دوشدو. اییلیب آچیق قالمیش دفتری یئردن گؤتوررکن جوربه‌جور فونت‌لارلا یازدیغیم آدیندا قالدی گؤزلریم. بو دفتر دولوایدی اؤزومدن ده داها یاخشی تانیدیغیمی ساندیغیم آدامین آدی ایله ده خاطیره‌لری‌له ده. ایندی او آدام دؤنموشدو. من گئتمه‌یینه قیزمادیم؛ البته کی ایسته‌مه‌ین آدام گئده بیلر. من سئومه‌میش کیمی چیرکین گئدیشینه قیزدیم.
دفترین خیشیلتیسینی آزالتماق اوچون ائهمالجا ورقلهیه-ورقلهیه یازدیغیم خاطیرهلرین اوزوندن کئچیردیم. بیر-بیریندن گؤزل آنی‌لاریمیزا گؤز گزدیررکن جوربه‌جور فیش‌لره گؤزوم ساتاشدی. گئتدیییمیز کافه‌لرده سیفاریش وئردیکلریمیزین فیش‌لرینی ساخلاییب بو دفتره یاپیشدیرمیشدیم. آرا-سیرا اونون آدی‌نین قیراغیندا گؤروشدویوموز گون‌لرین تاریخی ده گؤزومه دییردی.
بو کهنه دفتری بوگون تختین آلتیندان توز باسمیش خیریم-خیردا وساییلیمین ایچیندن تاپمیشدیم. ورقلهیه-ورقلهیه گؤزلریم دفترین باش اوجوندا چکدیییم سونسوز و اورک علامتینه ساتاشدی. سونرا آلت سطیرلرده یازدیغیم بیر یازی‌یا:
« بوگون سنی گؤرمه‌یه قرارسیزایدیم. آخی قرار قویموشدوق بیآرتییه مینیب یئنیجه اوخودوغوموز کیتاب باره‌ده دانیشا-دانیشا سون دوراغا قدر گئدک. یئنه او باشدان بیآرتییه مینیب هر دره‌دن دانیشا-دانیشا بو باشا قاییداق. شانسیمیزدان هاوا دا یاغیشلی ایدی. بی آرتی‌یه میندیییمیز آندان ترله‌میش شوشه‌سینده جوربه‌جور حیوان‌لار چکیب بعضیسینی دوست‌لاریمیزا، بعضیسینی ده اؤزوموزه بنزه‌دیب شاققیلتی‌لا گولوردوم. سن منه باخیب آغیر-اوغور گولوشون‌له قاققیلتی‌لاریما گؤزونو آغاردیردین سونرا بیزه باخان آدام‌لارا ایشاره ائدیردین. باشیمی اییب بیرآز سنه باخدیم سونرا اورک چکدیم یانیندا سونسوز علامتی‌له. چؤنوب گؤزلرینه باخدیم: بلکه سن منی اؤزونه یاراشدیرمیرسان آما من بیزی چوخ یاراشدیریرام.
سنی سئودیییمی، سندن اؤترو اؤلدویومو او قدر یاخشی بیلیردین کی …
بیرآز گؤزلریمه باخدین سونرا الیمی الینه آلیب اورک و سونسوز علامتی چکدیییم بارماغیمدان اؤپدون.
بونو هر گون اؤزومه تکرار ائدرکن دفتریمه ده یازیرام: سنی سئویرم جاواد»
دفتری باغلادیم. گؤزلریمی بیر آنلیق یوماراق دریندن کؤکس اؤتوردوم. او گونو ان اینجه دئتای‌لارینا قدر خاطیرلاییردیم.
یاشلی بیر قادین اتوبوسا مینینجه آیاغا قالخیب یئرینی او قادینا وئرمیشدی. اؤزو ایسه آیاق اوسته دوروب میله‌دن یاپیشمیشدی؛ سونرا اتوبوسون حرکتی‌له ییرغالانا-ییرغالانا گؤزلرینی مندن آییرمامیشدی. ائله محض بو ایشینه گؤره ده بیر داها قلبیمی چالمیشدی.
دوداقلاریمی ترپتمیشدیم: مندن گئتمه.
گؤزلری‌له،-سن ایسته‌مه‌دییین سوره گئتمه‌رم.-دئمیشدی. سونرا جولو بارماغینی گتیریب جولو بارماغیمی توتموشدو؛ دوداق‌لارینی آرالامیشدی: سؤز.
پنجره‌دن دیشارینی سوزدوم، بوگون ده یاغیشین اییی اؤزوندن قاباق گلیردی.
چؤنوب بارماغیمی دفترین آراسینا قویوب آرالادیم. یونگول یئل دفترین قیراق‌لارینی خیشیلدادیردی. بولد ائله‌دیییم آدینا زیلله‌ندیم. قلمی الیمه آلیب اونون اوچون یازدیم:
«سن گئتدیکدن سونرا یاغیشلی گون‌لرده، قرارلاشدیغیمیز ساعات‌‌دا یئنه همن پالتاریمی گئییب گئدیب بی‌آرتی دوراغیندا اؤزلرینی زورلا اتوبوسا دورتن اینسان‌لارا باخاراق چوخ گؤزله‌ییردیم سنی. آنجاق داها هفته‌نین هئچ بیر گونونده یوخ‌ایدین؛ شنبه، یکشنبه، …، جمعه، دوغوم گونومده، آغلادیغیمدا، داریخدیغمدا …
یاغیش یاغدی یوخ‌ایدین، قار قارلادی، فصیل دییشدی گلمه‌دین. یئنه یاغیش یاغدی سن گل دئیه … آمما … داها هئچ واخت یوخسان، گلمیرسن، وار اولمورسان. بیر-بیریمیزه وئردیییمیز بوتون او گؤزل و اینام دولو سؤزلردن سونرا منی اونودا بیله‌جه‌یینه هئچ زامان اینانمازدیم. بیز اونودولدوق … بیز … آیری آیری دئییل.»
کیفیمی گؤتوروب وایت بوردون اؤنونده درس وئرن اوستاددان ایذین آلمادان قاپیدان چیخدیم. بیرینجی قاتا ائنیب اؤزومو آیاق یولونا آتدیم. کیفیمدن داوالاریمی چیخاریب اووجوما ییغدیم. هامیسینی بیر سئری آتیب اییلیب اللریمی شیرین آلتیندا قوشالاییب سو ایچدیم. رژومو چیخاریب دوداق‌لاریما سورتدوم. سونرا لکه ایله دولو گوزگوده چوخ اوزاق‌لاردا دالغین حالدا یالنیزباشینا خیال‌لارینا ساریلمیش بیر قادینی گؤردوم. گؤزومو یوموب بیر ده آچدیم. بو سئری سول گؤزومون داها دا کیچیلدییینی گؤردوم. منی سارسیدان کدر گؤزه چارپاجاق درجه‌ده آرتمیشدی. اونا گؤره ده گؤزلریمده‌کی آجی بوتون اوزومه شؤگه سالیردی. گون کئچدیکجه ده اؤرت باسدیر اولونموش چیلغینلیقلاریم روحوما یانسیییردی. چونکو من اؤزومو، ایچیمی بوشالدا بیلمه‌میشدیم.
دانیشکده‌دن چیخیب تلسمه‌دن دانیشگاهین قاپیسی‌نا ساری یاواش-یاواش آددیملادیم.
سس‌سیزجه گئتدییی گوندن بری بیر دفعه بئله آرامامیشدی و بو منه حدسیز آغیر گلیردی. اؤزومه سؤز وئریردیم. هئچ بیر زامان اونوتمایاجاقدیم بو گون‌لریمی. آنجاق اونوتمامیشدیم سا ال‌لریم، اوره‌ییم ندن تیتره‌ییردی؟!
گله‌جه‌کدن اومیدیم یوخایدی او اوزدن کئچمیشده‌کی گؤزل آنی‌لاریمیزا توتونوردوم. بیر زامانلار سئومیشدیم دئییردیم اؤز-اؤزومه؛ دونیانین ان گؤزل سئوگی حئکایه‌سینی یاشادیغیمی سانمیش اولسام دا. یاشادیم و بیتدی. دئمک کی چیخیب گئدرکن او دا اونوتمامیش منی؛ بیر یئرده تاخیلمیشام عاغلینا کی بوگون گئری دونوب. بیزیم بیر گله‌جه‌ییمیز اولماسا دا بیرلیکده کئچیرتمیشیک دئمک اوچون اولدوقجا دولغون گون‌لریمیز وار و بو اولدوقجا منی ساکینلشدیریر.
اؤزل دوروشو ایله بیر الی جیبینده بیر الی قارا ساچینی تومارلایاراق قاپی‌نین او تاییندا دوران آدام آرخادان اونا چوخ بنزه‌ییردی. بؤیروندن سوووشسام دا گؤزومون اوجو ایله اونو گؤروردوم. کؤرپویه ساری یئریییب دیزلریم اسه-اسه بیربیر پیلله‌لری چیخدیم. آرخامدان قاچاراق منه یاخینلاشان آدامین آیاق سسلرینی دویدوقجا جانیمداکی تیتره‌ییش چوخالیب ضعف ائله‌ییردیم. آیاق سسلرینی بئله تانیییردیم. دمیر کؤرپو تاپپیلداییردی آیاقلاری آلتیندا.
آی‌لارایدی اوندان سس-سوراق یوخایدی. گؤره‌سن نئچه گون آغزی اوسته آج-سوسوز اوزانیب گؤزلریمی موبایلا زیلله‌میشدیم؟! اونون زنگینی، مئساژینی گؤزله‌میشدیم. آنجاق بیر آی‌دان سونرا تزه-تزه آنلامیشدیم کی باشی اوسته آغلادیغیم قبرین ایچینده اؤلو یوخدو.
قاباغیمی کسدی؛ بوینونو اییب گؤزلریمه باخارکن،-آددیملایاق؟.-سؤزو آغزیندا یاریمچیق قالدی.
من اؤزله‌دیم سنی آمما یازا بیلمه‌دیم. اؤزله‌دیم توخونا بیلمه‌دیم. اؤزله‌دیم قوووشا بیلمه‌دیم. بیر آنلیق آرخانا دؤنوب باخسایدین منی گؤرردین.
ان چتین گون‌لریمده یانیمدا اولماغینا سؤز وئرن آدام اؤزو ان چتین گون‌لریمی منیم اوچون سوندو.
قوربانین اولوم دئین آدامین قوربانی اولدوم من. سنه قییمارام دئین آدام منی هامیدان چوخ یارالایارکن دیدرگین و یانمیش اورک بوراخدی منه. گؤزل گولدویومو سؤیله‌ین آدام منی ان چوخ آغلادان آدام اولدو. او اوزدن داها سوسلو سؤزلره اینانمیردیم.
آی‌لارجا گؤزله‌دیکدن سونرا او گلمیشدی آددیملاماق اوچون، دانیشماق اوچون. گونلرجه خیالیمدا اونونلا اوز به اوز اوتوروب سؤزلریمی اؤلچوب-بیچه‌رک اوره‌ییمده‌کی‌لرله برابر اوزونه هایقیرمیشدیم. بیردن قاباغیما چیخسا اونا دئیه‌جه‌ییم سؤزلری گؤتور قوی ائتمیشدیم. نیهایت او گون گلمیشدی و او شاشقین گؤزلرینی ساریقلی و اوزو یوخاری بورنومدان آلا بیلمیردی. الینی چاشقینلیقدان یوخاری قالخمیش آلنینا آپاریب گیله‌لرینی بوتون اوزومده گزدیردی؛ بو سئری میکروبیلدینگ اولونموش قاشلاریما باخدی. مغنعه‌مدن چیخان ساچ‌لاریمین یئنی بویاسینی سوزدو، ساختا کیرپیکلرین اوجباتیندان آغیرلانمیش گؤز قاپاقلاریما باخدی. آمما ان چوخ اولدوقجا شیشمیش دوداق‌لاریمدا قالدی گؤزلری. سیماسیندان،-اؤزونو نه حالا سالیبسان؟! او اوزون باشینا نه اویون گتیریبسن؟!.-سورولاری فیشقیریردی.
منیم ایچیمده نیفرتدن باشقا هئچ نه قالمامیشدی. بو نیفرت ایچیمدن سیزیب اوز گؤزومه یانسیمیشدی. اونسوز دا بیلمیردیم گلسه سوسوم‌مو یوخسا ایچیمده اون سئری اؤلچوب بیر سئری بیچدیییم سؤزلری دال‌بادال یاغدیراراق پارتلاییم می؟!
ایکی قیرانلیغی دوشن آدام‌لار کیمی سوسوب اولانلاری اولدوغو کیمی قاوراماغا چالیشدی. قرارسیز باخیش‌لاریمی سئزمیشدی سانکی. بئلینی دوزلدیب الینی چیینیمه قویدو. بئلیمی ایدیم الی زویوب دوشدو. نفسلرینین سسینی دویدوم.
بیزی آیلار سونرا یانیانا گؤرن تانیش اؤیرنجیلر یانیمیزدان سوووشانادک تعجبلو باخیشلاری ایله تشویش دولو داورانیش‌لاریمیزی سوزوردولر.
کؤرپونون اوستونده گل-گئت چوخالمیشدی. بعضیسی باشلارینی قالدیریب اوزاقدا پارلایان گؤیدلنلره باخیردیلار بعضیسی ده جوربه‌جور ژست‌لر توتوب شکیل چکدیریردیلر. چوخلاری گؤزله‌نیلمز یاغیشدان دالدالانماق اوچون تله‌سیک کؤرپویه چیخیردیلار.
کیلاسیمین اوزویاجاغی حاقدا دئدیییم یالانی دا یئنی قیلیغیمی دا اوزومه وورمادی. گؤزلرینی مندن آلیب نفسینی دریندن اؤتوررکن بو سفر ائهمالجا سوروشدو:
-آددیملایاق؟
اوزومه تؤکولن تئل‌لریمی مغنعه‌مین آلتینا ییغارکن باشیمی یاواشجا ترپتدیم. سونوندا اوره‌ییمده ییغیشیب قالاقلانان سؤزلری دئمه‌یین واختی گلیب چاتمیشدی.
-او بویدا باشی ترپتمک دیلینی ترپتمکدن داها راحات گلیر سنه هه؟
سسینده‌کی تیترک گولوشونو حیس ائتدیم. سنه نجور قیریلدیغیمی آنلاتسام مندن نئجه عؤذور دیله‌یه‌جه‌یینی بیلمزسن.
دمیر کؤرپونون پیلله‌لریندن آیاغیم زویومه‌سین دئیه میله‌لردن یاپیشاراق ائهمالجا ائنیردیم. او ایسه پیلله‌لری سورعتله ائنیب آشاغیدا منیم دیک‌دابان آیاق‌قابیما تاسوف‌له باخا-باخا یولومو گؤزله‌ییردی.
-دوندورما یئمیسن؟.-اؤنومده باشینی بیرآز ایه‌رک گؤزلریمه باخا-باخا سوردو.
قاش‌لاریمی گؤیه دارتدیم. اونسوز دا بدنیم بوم-بوز ایدی. اوره‌ییم تیتره‌ییردی. دونیا باشیما چؤکموشدو. من بو کیشینی اولدوغو کیمی تانیمامیشدیم دئیه هر کسدن چوخ اؤزومه نیفرت دویوردوم.
-سنی هئچ واخت بئله سس‌سیز گؤرمه‌میشدیم.-باشدان-آیاغا منی سوزه‌رک ائهمالجا دئدی.
چیلدیرمیشجاسینا سئودیییم، سسینی دویمادان بیر دقیقه دورا بیلمه‌دیییم زامانلار بیر شئی ایتیردیییمی ساندیغیم، داواملی بیر فورصت تاپیب قاچیب اونو گؤرمک اوچون چابالادیغیم و گؤرمه‌دیییم زامانلار گونومون کئچمه‌مه‌سی، ایللرجه ائوله‌نه‌جه‌ییمیزی ساندیغیم، اورتادا هئچ بیر شئی یوخکن منی آلداتان و یاری یولدا یاریمجان قویوب گئدن آدامدیر بو کیشی. و او گوندن سونرا من همیشه،-بو آدام اورتادا او بویدا سئوگی وارکن بو پیسلییی منه ائلییه بیلدیسه هر کس منه هر شئی ائلییه بیلر.-دئیه دوشوندوم.
آنجاق بیر اوزونه ده باخاندا گؤروردوم هر ایکیمیزده ده یانلیشلیق‌لار وار؛ من یانلیش اینسانی سئومیشدیم او دا دوغرو قادینا یانلیش داورانمیشدی.
-دانیشمیسان اصلن! .-ساچ‌لارینی توتوب دارتدی. قرارسیزلیغی گئت-گئده داورانیش‌لارینا دا یانسیییردی.
بیردن سسیم تیتره‌ییب آغلارام دئیه هله‌لیک سوسوردوم. آمما دونیا دا ییغیشسایدی منیم سکوتومون ندنین بیلمزدی. ایچیمدن کئچه‌نی، نه یاشادیغیمی کیمسه آنلایا بیلمزدی، قاورایا بیلمزدی. ایچیمی بیلمک اوچون ایچیمده اولماقلاری گرکیردی. اوتوروب دئمک اوچون ده نه سؤزجوک‌لر یئتردی نه ده کی زامان. آنجاق او بیلیردی. او بیلیردی نه ائله‌ییب اونون اوچون ده بو قدر زامان سوسموشدو. آیریلماق ایسته‌دییینده اوز-اوزه دئییل بیر مئساژ بئله آتمامیشدی. آخی حاق‌سیز اینسانا بو ایکی یولون ایکیسی ده چتین گلر. ایندی دؤنوشونون ندنین باشا دوشموردوم؟! اؤزو ده بو قدر زاماندان سونرا!
ذاتن گئده‌جک‌دیرسه نییه گلیردی؟ گله‌جک‌دیرسه نییه گئدیردی؟!
گؤره‌سن بیر آن اولسون اؤزونو منیم یئریمه قویموشدو مو؟
ائله بیل هر شئی دونن اولموشدو. اوره‌ییمده‌کی سیزیلتی هله ده تزه ایدی.
-دییشیبسن!.-سسی اولدوقجا آلچاقایدی. سانکی اؤزلویونده دانیشیردی.
منیمله بئله دانیشمامالیسان! بو سؤزو بو شکیلده دئمه‌مه‌لیسن! اؤز داورانیشلارینین سونوجونو مندن سوروشمامالیسان. من دییشمیشم‌سه بیر سئری منه باخسان چؤنوب،-من بو قادینا نه‌لر ائله‌میشم.- دئیه یوز سئری اؤزونه باخاجاقسان. سن منه عایید اولان و گونده اللی سئری قوربان اولدوغوم گؤزلرله سئوگی دولو باخیشلار آتماسایدین اونا، سورکلی ایچ گؤزه‌للییی دئییل دیش گؤزه‌للییی دالیجا اولماسایدین من گونده اوچ سئری پالتار دییشمک اوچون گونوم بازارلاردا کئچمزدی. ساچیمی او قادینین ساچ رنگینه بویاماغی دوشونمزدیم. قاشیمی اونون قاشی کیمی دوزلتمزدیم. اؤزومو داواملی بیچاق آلتینا سوخمازدیم.
سن اونا باخدین من آینادا روژومو اونون روژو رنگده سورتدوم. اونون الینی توتوب تومارلادین من نییه اونون قدر گؤزل اولمادیغیم اوچون گؤزلریم دولدو. نییه اونون قدر آغ تنلی اولمادیغیم اوچون اؤزومه نیفرت ائله‌دیم. اونون قیریشسیز ایشیلدایان آلنینی گؤروب بو یاشدا قیریش دوشمه‌میش آلنیمی بوتاکس ائله‌دیم. دیرناق‌لاریمی اونون دیرناق‌لارینا بنزتمه‌یه چالیشدیم. اونون گئیدییی دیک‌دابان آیاق‌قابی‌لارینی، یئریشینی بئله سن منه گئری قاییت دئیه تقلید ائله‌دیم. منیم ایشیم گوجوم اونون نئجه دانیشدیغی، نه آلدیغی نه گئیدییی اولموشدو. من چوخ دیره‌ندیم آما یئنیلدیم.
مین ایل اوتوروب دوشونسم عاغلیما گلمه‌ین شئیلر باشیما گلدی.
بو سؤزلر دیلیمین اوجوناجاق گلسه ده سوسدوم. آه چکه‌رک گؤزلریمی نئچه دفعه یوموب آچدیم. او آن او وارکن بئله او قدر یالنیزایدیم کی گئتسه‌ایدی ده هئچ بیر شئی دییشمزدی.
-مننن دانیش … خواهیش ائله‌ییرم. سنی هئچ واخت بئله گؤرمه‌میشدیم.-بوغولا-بوغولا دئدی. نفسینی ایچینه چکمیشدی سانکی.
منی دیله توتاراق دانیشدیرماق ایسته‌ییردی؟ من ده سنی هئچ زامان بئله ال-آیاغینی داغیدان گؤرمه‌میشدیم دئیه دوشوندوم اؤز-اؤزومه.
من نه قدر دیدینسم دیدینیم، نه قدر اوغراشسام اوغراشیم قارشیمداکی آدامین آنلادیغی قدر ایدیم. ایندی اؤزومو اؤلدورسم ده اوندان آرتیق اولا بیلمزدیم. او زامانیندا منیم سؤزلریمی، اونو اینجیک سالماماق اوچون اونا گؤره ائله‌دیییم ایش‌لری آنلامادی. ایندی گؤزلریمده و دیلیمده‌کی معنا دولو سکوتو آنلاماسینی ایسته‌ییردیم! هئچ بو ساعاتدان سونرا دانیشماق نه ایشه یاراردی کی! اصلینده داها دانیشماغا دا بیر شئی قالمامیشدی. اونسوز دا منه دین دیمیشدی. بو آندا اونونلا دانیشماق دئییل کلمه بئله کسمک ایسته‌میردیم. او کی گرک بیله بیلیردی. یوخسا اؤزونو بیلمه‌مزلییه ووروب منیمله گیزلین پانچ اویناماق ایسته‌ییردی؟
یئرییه-یئرییه چؤنوب اوزونه باخدیم. بو آدام زامانیندا منیم دویغولاریما، دینجلیییمه اؤزن گؤسترن آدام ایدی. نسه دئمک ایسته‌ییردی؛ دیلچه‌یینده ایلیشیب قالمیش سؤزلری دانیشماق ایسته‌ییردی آنجاق اورک ائله‌میردی.
-سن دینمه‌دیکجه منیم اوره‌ییم کیچیلیر.-دئییب اودقوندو. سونرا پاریلدایان گؤزلری‌له گؤی اوزونه باخدی.
من آلداتیلان بیر قادین ایدیم. اؤزو ده ان ایناندیغیم یئردن وورولموشدوم و ان بؤیوک آجینی دا ان سئودیییم آدام منه یاشاتمیشدی. یاغیش دریمدن کئچیب ساچلاریمدان اوزومه آخدی و گؤز یاشلاریما قاریشدی. حئکایه‌میز بیتمیش اولسا دا منیم اسارتیم بیتمک بیلمیردی چونکو او هله ده منیم گیزلیجه آخیتدیغیم گؤز یاشلاریمدا یاشاییردی.
گؤزومون اوجو ایله بؤیرومده آددیم‌لارینی منیمله بیرلیکده آتان آداما باخدیم. بیر سؤز دئمیردی، درینه کئچمیردی. آنجاق سانکی او حیس ائدیردی. بیلدیییمی، گؤردویومو سئزیردی. سوچلو اولماسایدی سوسمازدی.
قارا ساچ‌لاری بیرآز ایسلانیب آلنینا دوغرو اییلمیشدی. بورنونون اوجو قیزاریب گیله‌لری شئح باغلامیشدی. بو کیشی‌نین گؤزلرینه باخاندا ایچدن اریییردیم من. آنجاق قرار دئییلدی بو گؤزلر مندن باشقاسینا ائله گؤزل و درین-درین باخا.
یئنه اوزونه باخدیم. آریقلامیش و سولموش اوزو اوره‌ییمی پارچالاییردی. من قافامدا هر شئیی بیتیرمیش اولسام دا سنی باغیشلاماماغا مین سئری آند ایچسم ده قلبیم اؤزله‌یه‌رک دویغولاریمی اله آلدیغیندا سنی باغیشلاماق اوچون ندن گزیرم. تک بیر ندن …
نملی هاوانی ایچیمه چکیب اللریمی اسپورت یاشیل کاپشئنیمین جیب‌لرینه سوخدوم. بو خیاوانی ایلک زامانلاردا بئله چوخ آددیملاردیق؛ هارداسا هر گون. تزه‌جه یاغیش یاغدیغیندان هر یئر تر-تمیز ایدی. گؤزومو ایسلانمیش دؤردبوجاقلی دؤشه‌مه‌لردن آلیب سویوقدان قیزارمیش اللرینه باخدیم. آنجاق او زامان اوره‌ییمیز ده ایستی اولاردی ال‌لریمیز ده. ال‌لریمیز بیر-بیریندن آیریلمازدی هئچ زامان. آخی نه اولدو دا بیر گونون ایچینده هر شئیی اونودوب گؤزلرینی قاپایاراق بو قدر راحات منی آرخاندا قویوب گئتدین؟! کی من ده بو قدر راحات سندن واز کئچم.
بایاقدان الینده داشیدیغی یاغمورلوغونو گئییب اوست دویمه‌لرینی ده باغلادی. اونو ایلک گؤردویومده همن یاغمورلوغو اینینده‌ایدی.
ایلک تانیشماغیمیز بیلیم یوردوندا «آذربایجان تانیتیم اوجاغینین» امه‌یی ایله کئچیریلن تورکجه کتاب سرگیسینده اولموشدو. اونون نئچه نفری باشینا ییغیب « اورمو گؤلو» باره‌ده دانیشدیغی حرارت‌لی سؤزلر منی اؤزونه ساری چکمیشدی.
اونلارا ساری یئریییب یانلاریندا دورموشدوم. دئدییی سؤزلری ایلک دفعه بیریندن ائشیتدیییمه شاشیرمیشدیم. او قونودا بیر ایکی سورو سوردوغومدا جوابیمی متانتله وئرمیشدی. سونرالار اونو گؤرمک اوچون یا همیشه گولرک دئدییی کیمی اؤزومو اونون گؤزونه سوخماق اوچون یولومو سورکلی آذربایجان تانیتیم اوجاغینا سالیردیم. هر گون اونو گؤرمه‌لی ایدیم. من سئومیشدیم اونو و من یانیلمیشدیم اونونلا ایلگیلی فیکیرلریمده؛ بو فیکیردن بیر آن اؤنجه داشینمالی ایدیم.
اوندان چوخ شئیلر اؤیرنمیشدیم. اصلینده من هر شئیی اونونلا اؤیرنمیشدیم؛ محبت ائله‌مه‌یی بئله. ایلک زامانلار دانیشدیغیمیز جومله‌لرین آراسیندا اونا محبتلی سؤزلر قوللانمادیغیمدان گیلئیلیک ائله‌یه‌رک راحاتسیز اولدوغونو بیلدیرردی آنجاق، منی تانیدیقجا محبتی اوندان اسیرگه‌دیییمدن دئییل اصلینده باشارمادیغیمدان آسیلی اولدوغونو آنلادی.
اونون خاراکترینه یاخیندان بلد اولدوقجا گون‌به‌گون اونا قارشی دویدوغوم فخر حیسی ده آرتیردی. آرامیزداکی سایقی‌یا و پرده‌نین گؤتورولمه‌مه‌سینه او قدر اؤنم وئریردی کی؛ همیشه او قدر ادبلی و جانایاتیم ایدی کی اونو سئومه‌مک مومکونمو ایدی؟ ادب قایدالاری‌نین پوزولماماسی اونون اوچون اؤن سیرالاردا اولدوغو اوچون هم ده باغیشلانمازلار لیسته‌سینده‌ایدی. آنجاق بعضن دجل اوشاق اولوب بیلرکدن جیزگی‌لرینی کئچیردیم. منیم ادبسیزلیییمه گولوب،-اینصافن گؤر نه قدر اوز وئرمیشم سنه! باخ ائله بوردان منیم سئوگیمی آنلامالیسیز خانیم صادیقی.-دئیردی.
منیم قیشقیرتیمی چیخارتماق اوچون اؤز فامیلی‌له سسلردی. سونرا ساکیتجه گؤزلریمه باخارکن،-الله سنی هانسی یاخجی ایشیمین قارشیلیغیندا منه گؤندریب؟ برابرلییمیزین مدتی آز دا اولسا سانکی ایل‌لردی سنی تانییرام. ایلک گؤروشده بونو حیس ائله‌میشدیم. ایلک گون سرگی‌ده منه آتدیغین گؤزل باخیش‌لاریندان باشلادی هر شئی.-دئیردی.
سون سؤزونو دئیرکن گؤزلرینی یوموب سانکی ایلک گونو خاطیرلاییرمیش کیمی دوداق‌لارینا گولوش قوناردی.
اؤنجه اؤزل قوخوسونو سونرا یاغمورلوغونو چیینیمده حیس ائتدیییم آن سانکی منی گؤزل خاطیرهلرین ایچیندن چکیب چیخارتدی و آتدی همن سویوق و چیسکینلی خیاوانا. بیرآز اطرافیما باخدیم.
پیادا یولوندا یئریین اینسان‌لارا، بؤیرومدن کئچن کیشی‌لره، قادین‌لارا باخدیم. گؤزل، چیرکین قادین‌لارا، یاراشیقلی کیشی‌لره. دیش گؤرونوش‌لرینه، رنگ به رنگ پالتارلاری‌نا باخدیم. پالتارلار یئرییردی‌لر. قاچیردی‌لار، دانیشیردی‌لار. عاشیق اولوردولار، بیر-بیری‌نین گؤزونون ایچینه باخا-باخا یالان دانیشردی‌لار. هانسی پالتارلارین ایچینده دوغرودان دا آدام وارایدی گؤره‌سن؟!
ائللیگه گؤزل پالتارین، سؤزلرین دالیندا گیزلنمیشدیک. دوغرودان دا دیش گؤرونوشون اوزی‌ایله اینسان‌لارین شعورونو، ایچینی، آنلاییشینی، قاناجاغینی آنلاماق اولمورموش. اؤرنک اوچون بیر قادین اولاراق بو چاغدا گؤزه گلمک اوچون بیر یئرین دیک و یا شیش اولمالی‌دیر.
اللریمی کاپشئنیمین جیبینه سالدیم. نه‌سه الیمین آلتیندا خیشیلدادی. تعجب‌له اووجوما آلیب جیبیمدن چیخارارکن اونون یاغمورلوغونون جیبی اولدوغونو آنلادیم. گؤزلریم اووجومدا دیکیلیب قالدی. دوداق‌لاریما شیرین بیر گولوش قوندو. ان آزی آنی‌لاریمیزا ال اوزادا بیلمه‌میشدی.
-یادیندا؟!.-سسینده‌کی هیجان سورویوب او گونه آپاردی منی.
او گون چوخ چتین سیناوی وارایدی. گئجه یاتمادان اؤنجه مئساژلاشارکن چوخ دئیینیب سیزیلدامیشدی. حاقلی ساییلیردی دا؛ چونکو ترم بویونجا کیتاب‌لاریمیزین اوزونو بئله آچمازدیق. سیناو گئجه‌لری ده همیشه آغلاشاردیق. اونو یالنیز قویماییم دئیه موبایلیمی سحر تئزدنه قوروب اویانمیشدیم. اؤزومه بیرآز یئتیشیب یولا دوشموشدوم. یاتاق‌خاندان دانیشگاها بیر یول یوخ ایدی. دانیشگاهین قاپیسی‌نا یاخینلاشارکن مغنعه‌می بیرآز قاباغا چکمیشدیم. گیریش قاپیسینی آرخامدا قویوب هر ایکی سمتی یاشیل آغاج‌لارلا بورونموش خیاوانی آددیملاییب دانیشکده‌لرینه یئتیشمیشدیم. اؤزومو ایمتحان کئچیریلن کیلاسین پنجره‌سینه یئتیریب اؤیرنجی‌لری سوزموشدوم. او اورتا سیرادا اوتوروب سول الینی آلنینا دایامیشدی. گؤزونو ورقه‌یه زیلله‌ییب خودکاری بارماق‌لاری آراسیندا فیرلادیردی. اوره‌ییمده قاداسین بالاسین آلیب اوزومو چئویرمیشدیم. اؤنجه بوفه‌یه ساری قاچیب چای ایله های‌بای(بیسگه‌وئت) آلمیشدیم. سونرا کیفیمدن دفتریمی چیخاریب بیر ورق قوپاردیب ماژیکیم‌له یازمیشدیم.
یئنه پنجره‌یه یاخینلاشیب کاغیذی یاپیشدیرمیشدیم. بیر آندا باشینی قالدیریب اؤنجه منی سونرا کاغیذین اوستونه یازدیغیم جومله‌نی اوخوموشدو: ایمتحانی بوشلا …چیخ چؤله سنه چای ایله های‌بای آلمیشام … ایلن سنه چای دئمیشم?
رنگی قاچمیش دوداق‌لارینا گولوش قونارکن بئلینی ده اوتوراجاغینا سؤیکه‌میشدی. نفسینی راحاتجاسینا اؤتوروب بوش ورقه‌نی الی‌له قالدیریب آیاغا قالخمیشدی.
یانیمدا سکی‌ده اوتوروب چایینی الیمدن آلارکن گؤزلرینی گؤزلریمه دیکمیشدی: سن اولماسایدین من نه ائلردیم؟ سن چوخ فرقلیسن … بام باشقاسان … هئچ کیمه بنزه‌میرسن،-چاییندان بیر قورتوم ایچیب.-منی همیشه بئله جاندان-باشدان سئو.-دئمیشدی.
نئجه ده قریب گلیردی او گون‌لر. چوخ چوخ اوزاق‌لاردا ال‌چاتماز بیر رؤیا کیمی …
بیز بئله سئوگی دولو گون‌لردن گلیب چاتمیشیق بورا. ایکی یابانجی ایکی اؤزگه اولموشوق. سانکی سئوگی دولو گون‌لر یاشانماییب و یا چوخ اوزاق‌لاردا یاشانیب بیتمیش کیمی گلیر.
دوست‌لاریم باغیرلاری چاتلایا-چاتلایا،- سن سئوگی‌نین ده محبتین ده شورونو چیخاردیبسان. گئتدیکجه اونو باشووا چیخاردیسان لاپ. بیرآز سیاستین اولسون. یوخودان اویانجاق موبایلی گؤتوروب اونا مئساژ آتما. ان آزیندان سئوگینی بئبئله بللی ائتمه.-دئییردی‌لر. من ده،-بیر ایلیشکیده کی من اؤزوم اولا بیلمییه‌جم، اوره‌ییم ایسته‌دییی کیمی داورانماق یئرینه سیاست‌لی داورانماغین قورال‌لارینی دوشونه‌جم او ایلیشکی منیم نه دردیمه دیر! و یا نئچه واخت اوجور یاپمالیق داورانیش‌لارا دؤزه بیله‌رم کی؟! او ایلیشکینی سیز دئدییینیز ساختا حرکت‌لرنن نئچه گون و یا آی سوردوره بیله‌رم کی؟!.-دئییردیم.
گئده‌جک دئدی‌لر گئتمز دئدیم. آلداداجاق دئدی‌لر آلداتماز دئدیم. منه یاپماز دئدیم. آمما من اونو سئوینجه داها دا یالنیز اولدوم.
آنجاق او اؤز رنگینی منه گؤرستمیشدی. نییه تزه‌دن اونو بویاماق ایسته‌دیم؟! گونوز-گون‌اورتا چاغی آغ یالانینا ایناندیم! گؤز گؤره-گؤره آلداندیم! منیمله سندن واز کئچه‌جک قدر نه ائله‌دین کی بوتون خوش آن‌لارین، اسکی آنی‌لاریمیزین، کؤک سالمیش سئوگیمیزین اوستوندن کئچیب کئشکه حیاتیما گیرمه‌یه‌یدین دئدیم؟
بیز هئچ زامان ائولیلیکدن دانیشمادیق. من قادین اولدوغوم اوچون و ان اؤنملیسی اوتاندیغیم اوچون هئچ زامان ائولیلیک سؤزونو آچمادیم او دا دانیشمادی بو باره‌ده. بیزیمکی اوغلان ائوینده خبر یوخ قیز ائوینده تاپپاتوپ کیمی بیر شئی‌ایدی.
من یوکسک لیسانس دالیجا گئتدیم او دا اؤزو دئمیشکن ایکی تومن پول قازانماق اوچون ایش دالینجا. شهرین ان شلوغ خیاوانیندا یاخین دوستو ایله شریکلی بر-بزک توکانی آچدی. او گوندن سونرا موشتری چوخلوغوندان و اؤزو دئمیشکن آشیری یورغونلوقدان گئت به گئت آرامالاری، مئساژلاری آزالدی. نئچه آی سونرا منیم سسیم چیخینجا بیر قادین اونلارا یاردیم ائتمک اوچون یانلاریندا چالیشماغا گلدی. بو سفر جاوادین آرامالاری تمامن سئیره‌لمه‌یه باشلادی. بلکه ده ائله او گوندن بیزیم اوزاقلاشماغیمیز، بیر-بیریمیزدن سویوماغیمیز، گؤروشمهلریمیزین آزالماسی و منیم سونرالار دوغرو اولدوغونو آنلادیغیم قیسقانجلیقلاریم باشلادی. منیم داریخماق‌لاریم و اعتراضیم یوکسلدیکدن سونرا سؤزوموز ترس گلینجه بیر-بیریمیزه گیرمه‌یه و تیکان کیمی بیر-بیریمیزی دالاماغا باشلادیق. سانکی آرامیزداکی او بؤیوک سئوگی بیر گونده اورلانمیشدی. دئمه گؤزدن اوزاق اولان کؤنولدن ده اوزاق اولارمیش.
او قادینی ایلک گلدییی گون بیر نئچه آنلیق آرخادان گؤرموشدوم؛ شالیندان چؤله تؤکولموش ساپ-ساری ساچ‌لارینی، گوده مانتوسونو، توپوغونداکی کپه‌نک دؤیمه‌نی، دیک‌دابان آیاق‌قابیسی‌لا تیق-تیق یئریشینی، عیشوه‌سینی …
چؤنوب فیکیرلی اوزونو سوزدوم …
یوخ من سنه آغلامادیم. من مندن گئدن کیشی‌یه آغلامادیم؛ من ایناندیغیم سئوگی دولو گون‌لره آغلادیم. بیرلیکده یاراتدیغیمیز بیر-بیریندن گؤزل آنی‌لارا، آنلاشماغیمیزی، حیس‌لریمیزین، دوشونجه‌لریمیزین اولدوقجا اویوملو اولدوغونو خاطیرلادیقجا آغلاییب سیتقادیم.
آددیملاریمی یاواشیتدیم. مندن ایره‌لییه دوشدو. اؤزونده اولمادیغی اوچون فرقینده دئییلدی. آرخادان باخدیم اوزون و یاراشیقلی بویونا. بو آدام مندن گئتمیش اولسایدی دا هر آن منیمله ایدی؛ هر گون گؤزل آنی-لاریمیزی آندیغیمدا آجی چکرمیش کیمی اوز-گؤزومو بوزوب خاطیرلاماماق اوچون هر ایکی الیمله اوزومو قاپاتدیغیمدا، قیرپدیغیم کیرپیک‌لریمین آرخاسیندا، خاطیره‌لرده، بو خیاوانلاردا، اتوبوس دوراق‌لاریندا ….
دایانیب بؤیرونه باخدی. سانکی اونونلا یئریمه‌مه‌ییمی سئزمیشدی. منی گؤرمه‌یینجه تله‌سیک چؤنوب آرخایا باخدی. منی گؤرونجه هر ایکی الی ایله اوزونو قاپادی. سونرا یاواش-یاواش منه ساری گلدی. من ده اونا ساری یئریدیم. اونا یئتیشدیییمده بؤیروندن سوووشوب یولوما داوام ائتدیم. او دا گئری قاییتدی، آددیم‌لارینی منیمله اویغونلاشدیردی.
او قادینین گلدیییندن نئچه گون سونرا اونون بیر قادینلا صمیمیتینی، مازاقلاشمالارینی ائشیدیردیم. آرا-سیرا دوستلاریمیزین آتماجالاری قولاغیما دییردی. آنجاق من اونا او قدر چوخ گووه‌نیردیم کی؛ ایستر دانیشیغی‌لا، اوتوروب دورماغی‌لا، چوخ‌لارینا عاغیل وئرمه‌یی‌له او قدر گؤروب-گؤتورموش بیرینه اوخشاییردی کی و اونون منه یانلیش یاپمایاجاغیندان او قدر امین ایدیم کی راحاتجا اوتوروب قیچیمی قیچیمین اوستونه آشیریب قولاغیما گلیب چاتان بوش سؤزلره سادهجه گولوردوم. اونون لاپ گؤیدن‌دوشموش کیمی قاباغیما چیخدیغینی دوشونوردوم.
-بیآرتییه مینک؟!.-سانکی سورو سورمادی خواهیش ائله‌دی.
اتوبوس‌لار خیاوانین هر ایکی طرفیندن سورعتله کئچرکن بیریکمیش سولاری اطرافا سیچرادیردی‌لار.
من ائلییه بیلیردیم اوره‌ییم جیزز ائلییه-ائلییه هئچ نه اولمامیش کیمی داورانام آنجاق منی شاشیردان اونون دا هئچ نه اولمامیش کیمی، منی اوزمه‌میش کیمی داورانماغی‌ایدی.
هئچ زامان اونوتمادیغیم او گون یاخین دوست‌لاریمین بیری‌نین گؤزله‌نیلمز زنگی‌له اؤزومه گلدیم. منی یامانا، سؤیوشه باساراق جاوادین او قادینین ال‌لرینی تومارلادیغینی سانکی گؤزومه تپدی؛ بیر یاندان دا اوره‌یی سویومامیش کیمی منیم ساده‌لیییمی باشیما قاخاراق نئجه اوزومه چیرپدی‌سا بیر آندا سانکی باشیما قاینار سو تؤکدولر. یئریمده بوتون بدنیمدن گیزیلتی کئچدی. شالیمی مانتومو نئجه گئیدیییمی و نئجه اؤزومو اورا چاتدیردیغیمی خاطیرلامیردیم. سادهجه او قادینین گؤزلریندن بیر یوخ نئچه داملا بیردن آخدیغینی خاطیرلاییردیم. چنه‌سی اسه-اسه بویالی دوداق‌لارینی ترپه‌دیب نسه تعریفله‌ییردی. اؤزومو تارازلایا بیلمیردیم؛ آیاق‌لاریمین اوزه‌رینده دورا بیلمیردیم. اونلار منی فرق ائده‌نه قدر گئدیب او دونیانی گؤروب گلدیم. جاواد او قادینین اؤنونده دیزی اوسته اوتوروب ال‌لرینی تومارلاییردی. باشینی اییب اونونلا گؤز-گؤزه دانیشاراق توختاقلیق وئریر اونو گولدورمه‌یه چالیشیردی.
قادین منی گؤرونجه چکینگن بیر داورانیشلا ال-آیاغینی ایتیره‌رک عوذر ایسته‌ییب اؤزونو دیشاری آتدی.
او آن بئینیمه ایذینسیز دولان مین‌لرجه سؤز آراسیندا اونون سون گون‌لرده گؤروش‌لریمیزین ارته‌له‌دییی‌نین، دانیشمالاریمیزی دالا آتماغی‌نین، یورغونلوغونون و عایله سورون‌لاری‌نین ماهنا و یالان اولدوغونو آنلاییردیم آرتیق. دئمک هر شئی‌یین سببی، سویوق داورانیشلارینین ندنی بو قادین‌دیر دئیه دوشونه‌رک سون زامان‌لارداکی بوتون کور دویون‌لر آچیلیردی.
چیلغین ساکیتلیک چؤکموشدو آرامیزا. نه او دانیشدی نه من. اونا باخمادان قاپینی چیرپیب دیشاری چیخدیم. حیرصیم، اؤفکم سویوموردو.
آرخامدان گلیب نئچه سئری آدیمی چاغیردی. قولاق آسمایینجا اؤزونون سوی آدیلا چاغیرماغا باشلادی. سوندا قولومدان توتاراق قاباغیمی کسدی: اولماسا ننه‌م یئرینده اولان آروادا دا قیسقانارسان منی.-دئدی.
دئدییی سؤز اوره‌ییمه سینمه‌سه ده بیلمیرم او جومله‌ده نه وارایدی کی درحال ساکیتلشدیم. بلکه ده بیله-بیله سئودیییم اینسانین یالانینا اینانماق ایسته‌دیم. چونکو من اینانماق ایسته‌ییردیم. چونکو من اونون مندن باشقاسینی سئومه‌یینی هئچ جوره سیندیره بیلمیردیم.
سونراکی گون‌لرده بیر ده او قادینین سؤزونو آچماسام دا او اولای اوردا بیتمه‌دی و منیم یئرلی و یئرسیز قیسقانجلیقلاریم باشلادی. داها آلدیغی هاوایا دا قیسقانیردیم اونو. حدسیز بیر گوون توز اولوب گؤیه اوچموشدو، سونسوز بیر اومید توکنمیشدی ایچیمده، اینانجیم زده‌لنمیشدی. او گوندن سونرا اوره‌ییم دؤزمه‌یه‌رک گونده اؤزومو اونون توکانیندا بولوردوم. داها اونلاری بیر آن بئله تک قویماغا اورک ائله‌میردیم. کیلاس‌لاریما گئتمیردیم؛ اوستادلاریمین اعتراض‌لارینی قولاق آردینا ووروردوم. دوست‌لاریمین اؤیودلرینی بیر قولاقدان آلیب او بیری قولاقدان اؤتوروردوم. آنجاق من بیر شئیی بیلمیردیم؛ منیم اولانی کیمسه مندن آلا بیلمزدی. منیم اولمایانی ایسه بوتون دونیا دا ییغیشسایدی منیم ائلییه بیلمزدی. من برک قورخموشدوم؛ اونو ایتیرمکدن چوخ قورخموشدوم. اونا گؤره ده او زامانکی قافاملا اوجور دبریردیم.
صاندیق دالیندا متحرک صندلی‌نین اوزرینده اوتورموشدوم. ییرغالانا-ییرغالانا اونون ایلک گؤروشومزده منه هدیه ائتدییی «جنس دوم» کیتابینی اوخویوردوم. باشیمی چئویریب جاوادا باخدیغیمدا اونون ایکی داش آراسیندا بیر آلیجی‌ایله دئییب گولن همن قادینا باخدیغینی گؤردوم. قادین اوزونو یانا چئویردییینده بورنونواکی او پاریلدایان مونجوق گؤزلریمی قاماشدیرارکن یئنه گیله‌لریمی ترپه‌دیب جاوادا باخدیم. اونون توپوغونداکی دؤیمه‌یه، قصورسوز اندامینا نئجه آجگؤزلوکله باخدیغینی اؤز گؤزلریمله گؤردوم. او باخیشلاری ایله منی آیاقلاری آلتیندا تاپدالاییب ازیشدیردی اوف دا دئمه‌دی. سانکی منی آلچالتماق اوچون دری‌دن قابیقدان چیخماغا آند ایچمیشدی.
قادینین سیناقلی ایری گؤزلری جاوادین پاریلدایان گؤزلری‌له اوست-اوسته دوشوب ایشیلدادی.
اونلارین آراسیندا بیر باغلیلیق عمله گلیردی و بو دانیلماز بیر حال آلمیشدی. گئت-گئده آرالارینداکی رغبت چوخالیردی.
قادین منیم باخیشیمی سئزینجه چؤنوب نئجه جاوادا باخدی‌سا او دا چؤنوب بیر آنلیق منه باخدی سونرا هئچ نه اولمامیش کیمی گئدیب موشتری‌له ایلگیلندی.
بیر ده چؤنوب قادینین گؤز اوخشایان اندامینا باخدیم. هامی بو اندامدا اولوردو یئنیجه. من ندن اولماییم کی؟ دئیه اؤزلویومده دوشوندوم او گون. فلاکت زامانی ان کیچیک احتمال بئله اینسانین خیالیندا مین اومید اویادیر. دئییردیم به قصورسوز اولسام منه قاییدار، منی یئنه سئور. بئله شئ‌لره ایلک دفعه او گونو باش قوشموشدوم. آنجاق بو بویوتلارا گلدییی هئچ واخت عاغلیما گلمزدی. اؤنجه ساچ‌لاریمین رنگینی دییشدیم، سونرا قاشیمی قورتدالادیم. کپه‌نک دؤیمه ده توپوموغومدا اؤز یئرینده اوتوردو. اونلاری کافهده باش-باشا گؤردوکدن سونرا ایسه اؤنجه دوداق‌لاریما ژل ووردوردوم سونرا بورنوما ال آپارماق اوچون دوختوردان واخت آلدیم. اسپورت باشماق‌لاریمین یئرینی دیک‌دابان آیاق‌قابی‌لار دولدوردو. یانیلمایین، بونلاری قاپی قونشوموزدا محبت دوعاسی ایله ارینی اؤزونده ساخلایا بیله‌جه‌یینی دوشونن زرین‌تاج کیمی خانیم‌لار دوشونموردو. بونلاری من دوشونوردوم. یوکسک‌لیسانسیمی اوخویوردوم، ان آزی یوز جیلد کیتاب اوخوموشدوم و جنس دوم کیتابینی الیمده ورقله‌یه‌رک لذت آلا-آلا اوخویوردوم.
آنجاق من بونلاری ائلرکن او چوخدان سس‌سیزجه یوخا چیخمیشدی. من تام دا سون آندا اوندان الیمی یودوغوم زامان تختدن یئره دوشوب اندامیمی عمل ائله‌مکدن واز کئچمیشدیم.
داها بیر دنه ده ائفئکتسیز شکیلیم یوخدو. گالریمده نه قدر گزسم ده اؤزومو، اؤز قیافه‌می تاپا بیلمیردیم. من اؤزوم اولماقدان قورخموشدوم و قورخوردوم. اؤزومو تاپا بیلسم کئشکه، اؤزومو سئوه بیلسم کئشکه، اؤزوم‌له باریشا بیلسم کئشکه. بو قارماقاریشیقلیغین ایچینه کئچمه‌مه‌یین تک یولو اؤزومو اولدوغوم کیمی سئومک ایدی؛ چونکو سورون منیم قیافه‌مده دئییل اونون بئینینده و روحوندا ایدی.
گون‌لرین بیر گونونده کئفیمیز گؤی‌لرده اولان زامانلاردا،-منیم نه‌ییمی سئودین؟.-کیمی بیر سورو سورموشدوم اونا. گوله‌رک،-ایچینده‌کی او دجل، سیرتیق، سؤزه باخمایان، عئینی حالدا آتیلیب دوشه‌رک قهقهه چکن اوشاغی سئودیم.-دئمیشدی. و من سون دفعه اونو کافهده او قادینلا برابر گؤردویوم آن بیر شئی اؤلموشدو ایچیمده؛ همن چوخ سئودییی او اوشاغین قهقهه‌لری. جاواد او دجل اوشاغی مندن آلدی. هابئله ایچی اوشاق قاریشیقلی صاف و ساده گولوش‌لریمی.
اؤزه‌للیک‌له او گون منیم عؤمرومدن ساییلمامالی‌دیر. او گونو اونوتماق، سیلمک ایسته‌ییرم بئینیمدن ده حیاتیمدان دا روحومدان دا.
چؤنوب اوزونه باخدیم. ویجدانین دینج‌دیر می؟
-گه ماشیندا اوتوراق … دئیه‌سن یئنه یاغاجاق.
بو کیشی یئری گلدییینده دونیانین ان مغرور آدامی اولوردو. بو گون منی دانیشدیرماق اوچون جیزگی‌لرینی سوووشوردو. غرورونو گؤرمزدن گلیردی؛ هئچه ساییردی.
باشیمی قالدیریب اوزاق‌لاری سوزدوم. قارا بولودلار یئنه گؤی اوزونو جایناغینا آلیردی. چؤنوب بیر آنلیق کدرلی اوزونو سوزدوم.
همن بو آدام همیشه سؤزلری‌له، یئرلی و یئرسیز محبتیله او قدر گؤیلومو توخ توتوردو کی هئچ نه‌یه و هئچ کسه فیکیرلشمیردیم. او وارکن منیم هئچ بیر کسه احتیاجیم اولموردو. هم دوستوم‌ایدی، هم سیرداشیم، غم‌داشیم، هر شئییم. او زامانلار نه گؤزل‌دیر بیر نفر اولا و هامی‌نین یئرینی سنه دولدورا دئیه دوشونوردوم آنجاق من بیلمه‌دیم بو آدام سورکلی منیم گؤزه‌للییمدن دانیشیرسا صاباح مندن گؤزل بیریسینی گؤرونجه گؤزلرینی آلا بیلمه‌یه‌جک. بیز قادین‌لارین دیری گؤزه‌للیییمیزله اؤلچولور هر زامان.
گؤزلریمی قارالمیش بولودلاردان آلیب اونون قارالمیش گؤزلرینه باخدیم. گؤزلرینده همن یانبیزی دیک قادینی گؤردوم.
ماشینا میندیییمیزده آرخاداکی اوتوراجاقدا گول دسته‌سینی گؤرونجه گؤزل قوخوسو بورنوما دولدو. اؤنجه گؤی اوزو ایشیقلانیب سونرا گورولدایاراق یاغماغا باشلادی. پونجو یاندیریب منه ساری توتدو سونرا بیر نئچه کاغیذ دستمال گؤتوروب آلنینی، اوزونو سیلدی.
ضبطی یاندیردی؛ بیر ایکی ماهنینی آدلاییب ایسته‌دییی ماهنیدا دایاندیریب خودونو آزالتدی.
او بیرآز آرخا طرفه اییلیب دسته گولو گؤتوردو. دسته گولون دؤورهسینه دولانمیش رنگلی نایلون خیشیلدادی. گؤزومون اؤنونو بیر دسته گولون یئرینه بیر پاکت سیقار توتدو. گؤزلریمی سیقار پاکتیندن آلیب یاواشجا یوخاری‌یا قالدیریب اوتانجاق گؤزلرینه باخدیم.
آما سن منه سؤز وئرمیشدین!
باخیشیمی گؤرونجه سیقار پاکئتینی گئری چکیب اؤزونه بیرین چیخارتدی. سیقاری سوموردو؛ بیر ایکی سئری بوغوق-بوغوق اؤسکوردو؛ ماشینین شوشه‌سینی ائندیریب توستونو چؤله اوفوردو. باخیشیمی حیس ائتدی.
سیقارینی داماغیندان گؤتوررک چؤنوب گؤزلریمه زیلله‌ندی.
گئری چکیلمیش گؤز یاشی نم ببک‌لرینی پاریلدادیب کیرپیک‌لری‌نین دیبینده تیتره‌شیردی.
نه دوشونموشدوسه دسته گولو وئرمکدن واز کئچمیشدی.
الیمی قالدیریب شئح باسمیش شوشه‌ده نه‌لرسه چکدیم. بیرآزدان شوشه آغلادی؛ منیم ایچیم کیمی …
من بوتون دونیادان کوسموشدوم. سئودیییم یام-یاشیل آغاج‌لاردان، بیر آندا پیررر ائله‌ییب گؤیه قالخان قوش‌لاردان، تورپاغی، دامی، دیواری یووان یاغیشدان، اؤزومدن؛ هر شئی‌دن کوسموشدوم… من یاغیشین تورپاغا دین آن بورنومو دولدوران نم قوخوسوندان کئفله‌نن بیر قادین ایدیم.
باشقا بیر سیقار گؤتوروب بیتمیش سیقارین کؤتویونه جالایاراق یاندیردی. الیمی دویمه‌یه باسیب اؤز طرفیمین شوشه‌سینی ائندیردیم. سویوق یئل اوزومو سیغاللایارکن نارین چیسک ده اوز گؤزومده اوتوردو. ماشینین کیچیک آیناسینا گؤزوم ساتاشدی. گوزگویه هر باخدیغیمدا اوزاق‌لاردا نیسگیل‌لرینه ساریلان یالنیز بیر قادینی گؤروردوم. جاوادین ترپنمه‌یی‌له اؤزومه گلدیم. آدامایوووشاراق منه ساری چؤنموشدو:
-اوشویورسن هه؟ چای ایچک؟.-سسی داها چوخ توتولموشدو. نفسی سیقار قوخولو‌ایدی.
من سنین باشقا قادینا آتدیغین باخیشلاری گؤردویوم آندان اوشویورم. بو یارا راحاتلیق‌لا بیتیشمیر. بوردا اورک سیزیلداییر.
من اونونلا برابر اولدوغوم هر گونو، هر آنی خاطیرلاییردیم. یاخجی گون‌لریمیزی ده دادسیز-دوزسوز گون‌لریمیزی ده. آنجاق یاخجی گون‌لریمیز داها آغیر باسیردی.
گؤی نئجه گورولداییب ماشینین سقفینه دولو نئجه چیرپیلیب شاقشاراق سالدیسا سسینه دیک آتیلدیم. دولو ضربله اؤنجه ماشینا سونرا یئره تؤکوله‌رک دیغیرلانیب اورا-بورا سیچراییردی. آغاجلار، یارپاقلار چیرپینیب خیشیلداییردی. گؤزلریمی نئچه آنلیق یومدوم. سس اوجالداندان حزین-حزین ماهنی سسی گلیردی:
آغلا بولوت سن آغلا
اوره‌ییم‌له تن آغلا
یاغدیر غملی یاغیشی … ۱
دولونون شیشه‌لری، تاوانی دؤیجه‌له‌مه‌سینی دینله‌یه-دینله‌یه بئش ایل اؤنجه‌یه گئتمیشدیم.
او گون ده هاوا تام بئله‌ایدی. بولودلاری خاطیرلادیم؛ قارا کؤلگه‌لی بولودلاری. سونرا تاواندا باشلایان شاققاشاق سسی. گؤزلریمی یوموب نئجه ده لذت آلمیشدیم. تاوانی ساخسیدان اولان بیر کافهده دولودان دالدالانمیشدیق. تئز پنجره‌نین اؤنونده دوروب یئره سیچرایان دولولارا باخاراق لذت آلمیشدیم. شئعیر اوخویان کیم، ساز چالیب تورکولر سؤیله‌ین کیم. او گون اونلارین جمعینده من ده وارایدیم.
او هر شئی باره‌ده بیلگی صاحیبی‌ایدی و بیلیجی دانیشیغی ایله سانکی هر شئیی هر کسدن یاخجی بیلیردی. منیم نظریمده اونون دئدییی هر سؤز و ائله‌دییی هر ایش دوغرو ایدی. کؤهنه دوشونجه‌لری بالتالاییب یئنیلشمه‌یه، گلیشمه‌یه یول آچیردی. هامیمیزین گؤزلرینه باخا-باخا یول گؤرسه‌درک بئش قیرانا دیمز فیکیرلردن یاخانیزی قورتارین دئییردی. بایاغیلاشان سؤزلردن، دوشونجه‌لردن اوزاق دورماغیمیزی، بئینیمیزده یئنی و دیرلی دوشونجه‌لر بئجرتمه‌ییمیزی خواهیش ائدیردی. قادین‌لارین حقوقوندان دیفاع ائتدییی زامان بؤیرومده‌کی قیزدان اونون کیم اولدوغونو سوروشموشدوم. او دا دوز-عمللی تانیمادیغینی آنجاق آدی‌نین جاواد اولدوغونو، بتر دوشمان گؤزو چیخاردان اولدوغونو، وضعی خوش بیر بابانین اوغلو اولدوغونو سؤیله‌یه‌رک بیر گؤز ووروب،-هله اوسته‌لیک روشنفکردی ده … یانی تام آزادلیق ده … آمما اینصافن بتر قوناق قاباغینا چیخارتمالیدی.-دئمیشدی.
-آمما منجه دوغرو بیر اینسانین اؤزه‌للییی اونون دوشمان گؤزو چیخاردان اولماغینا یوخ، عابربانک اولماغینا یوخ، عایله‌نین کهنه فیکیرلریندن قاچاراق اونا سیغیناجاق کیمی باخا بیله‌جه‌ییمیزدن یوخ، اونون دوشونجه‌سی‌له، ایچی ایله اؤلچولمه‌لی‌دیر یوخسا یاغیشدان قاچارکن دولویا توتولماق اولاسیلیغی اولا بیلر.-دئمیشدیم. آمما گؤروردوم من ده یانیلمیشام چونکو او اینسان سادهجه سنین ایچینده‌کی اوشاغی اؤلدورمه‌ین بیر آدام اولمالی‌دیر.
او گونون سونوندا جاواد اؤزو قاباغیمی کسیب،-منی اؤزومدن سوروش. من هامی‌یا عئینی آدام دییرم.-دئییب سوووشوب گئتمیشدی.
گون به گون اونا اولان گووه‌نیم، اینانجیم داها دا آرتیردی. منیم آیاغیم یئره دیمیردی؛ گؤی‌لرده گزیردیم. بئله بیر اینسان‌لا برابر اولدوغوم اوچون اؤزومو چوخ شانسلی حیس ائدیردیم. هر قونودا آلت قات‌لاری دیقته آلدیغیندا، درین-درین دوشونوب ان اینجه دئتای‌لارا بئله اؤزن گؤستردییینده و بئله‌جه هامی‌نین طرفیندن آلقیش‌لاری قازاندیغیندا منیم اولدوغو اوچون دفعه‌لرله شوکر ائدیردیم، کؤکسوم قاباریردی. اونون اوستونده زاغ زاغ اسیردیم. اونا بیر شئی اولماسین دئیه هر شئییمدن کئچیردیم؛ قیرمیزی جیزگی‌لریمدن ده، اینانج‌لاریمدان دا. اؤزومو تمامن قاپدیرمیشدیم.
هله ده ایناناسیم گلمیردی، من هئچ کسه باخماق بئله ایسته‌مزکن سن …
بیر گون اؤزومه گلدیم و گؤردوم بوتون حیاتیمی اونا گؤره قورموشام، اونونلا قورموشام. دونیانین سونونا قدر بیرلیکده اولاجاغیمیزی، نه اولورسا اولسون هئچ بیر زامان آیریلمایاجاغیمیزی سانمیشام. من بیر گونده، بیر آنین ایچینده گوپبولتی‌له یئره دیدیم؛ شاشدیم. یوخودان اویاندیم. گؤزل و سونو گؤرونمه‌ین بیر ناغیلین ایچیندن منی چؤله فیرلاتدی‌لار. هله ده اؤزومه گله بیلمیردیم. او آدامین گئدیشی چوخلو سؤزجوک‌لرین و دویغولارین گئدیشی دئمک‌ایدی. گوون، اینانج، سئوگی، محبت، راحاتلیق. دوزدو، من یانلیش آدامی سئومیشدیم آمما دوغرو دویغولارلا سئومیشدیم.
بارماق‌لارینی فرمانا دؤیوردو. سارالمیش اوزوندن و داورانیش‌لاریندان اونون حیرص ودرین بیر ایضطیراب ایچینده چیرپیندیغینی گؤروردوم. من اوندان داها چوخ اوزگون اولدوغوم زامانلار دا اونو اوووندورماغا چالیشیردیم. آنجاق منی پریشان، دارماداغین قویوب گئتدییی زامان الیمی هارا آتسام بوشلوغا دوشدو. من بوگون اؤزوم‌له اوزله‌شیردیم. بوگون یا اویانلیق اولمالی‌ایدی یا بویانلیق.
یئرینده بیرآز قورجالاندی. گؤزاوجو سیماسینی نظردن کئچیرتدیم. سنه بنزه‌مه‌ین، سنین اولمادیغین هئچ بیر شئیه توتونا بیلمه‌دیم من.
تمامن چؤنوب منه ساری اوتوردو: من سنی چوخ سئویرم.
دوداق‌لاریمدا یارانان تمسخور دولو گولوشومو گؤرونجه اللری فرمانی سیخیب یومروقلادی. اوزونو دؤنده‌ریب بئلینی دوزلتدی. نفسی‌نین سسینی دویوردوم. ساکین اولماغا چالیشیردی.
منجه سن نه ایسته‌دییینی بیلمه‌ین بیر اینسانسان. نه گئتمه‌یی باشاریرسان نه قالماغی نه سئومه‌یی. جوربه جور ماسکه‌لر تاخیرسان. توتمایاجاغین، یئرینه یئتیرمه‌یه‌جه‌یین سؤزلر وئریرسن. سئویردین‌سه نییه یوخا چیخدین؟! منه دئدییین سؤزلری او قادینا دا دئدین؟! سنی سئویرم دئدین؟! سندن گئتمه‌یه‌جم دئدین؟! اونا دا سؤز وئریب سؤزونون اوستونده دورماغینا سؤز وئردین؟! باش آچمیرام بو دنگه‌سیزلیکدن. اؤزونده دییرسن سن. بلکه کیم اولدوغونو بئله بیلمیرسن. یورولدوم بو بلیرسیزلیکدن.
آلنینی یاواشجادان ماشینین فرمانینا چیرپدی. او گونو اونلاری کافهده ائله صمیمی گؤردویومده الیم اوزومده قالیب قوروموشدوم. اوره‌ییم آغزیمدان گلمیشدی. قاپی آغزیندا دیزی اوسته دوشموشدوم. سسیم ده چیخمامیشدی. اولماسا منی ننه‌م یاشدا قادینا دا قیسقانارسان دئین آدام چیینینده همن قادینین ساچینی تومارلاییردی … گؤردویومده ایچیمی چکمیشدیم. چیین‌لریم قالخیب-ائنمیشدی، بوتون بدنیم تیتره‌میشدی. آغلامامیشدیم آنجاق؛ ایچریدن قوپان نریلتینی بوغماق ایسته‌دیکجه تیتره‌ییب چالخالانمیشدیم. لال باخیش‌لاریم‌لا اونا نسه دئمک ایسته‌میشدیم. ائوه گلینجه باشیمی دیوارا چیرپمیشدیم. ال‌لریم بوشالیب یانیما دوشه‌نه‌دک اؤزومو تاپدامیشدیم. آنجاق ایچیمده‌کی آجی فیرتینا ساکینلشمه‌میشدی.
من او قادینی قیسقانمامیشدیم. سنین اونا قارشی آتدیغین محبت و سئوگی دولو باخیشلاری قیسقانمیشدیم. او قدر گؤزل باخیردین کی گؤزلرینه، کئشکه بیری ده منی بئله سئویب بئله قورویوردو، اوستومده تیتره-ییردی دئیه حسرت چکمیشدیم. من بیر آنلیق سنین اونو ائله سئومه‌یینی سئومیشدیم، خوش حیس آلمیشدیم.
الیمله آلنیمی اؤوکه‌له‌دیم. آنیندا الینی ماشینین توتاجاغینا آپاردی: تئزچای آلیم گلیم. باش آغرینی توختادار.
نسه ایستی بیر شئی جانیما یاییلدی. باشیم آغریدیغی زامان چای ایچدیییمی اونوتمامیشدی. گؤزلریمین دولماسینی گؤرمه‌سین دئیه اوزومو چئویریب چؤله باخدیم. دئشدییین یارانی داها چوخ آچما. بوراخ توختاسین. اونسوز دا منه اولان اولموشدو.
اوره‌ییمده کئچن هر شئیی بیت به بیت دیله گتیرمک او قدر چتین گلیردی کی. بلکه ده محض بونا گؤره درین-درین آه چکمهلر، گؤز یاش‌لاری، ال‌لرین تیتره‌مه‌یی و بوز کیمی باخیشلار، گولوش‌لر یارانمیشدی.
من آغلاماماق اوچون دانیشمیردیم. چونکو منیم گؤردوک‌لریم منه یئتیردی، خاطیرلادیقجا بوغازیم دویومله‌نیردی و عؤمروم بویو گؤزلریمین اؤنوندن چکیلمه‌یه‌جکدی. دؤنوب کدرلی اوزونه باخدیم؛ او قدر منیمسه‌میشدیم کی اونو.
اللریمی پونجون اؤنونه توتوب بیربیرینه سورتدوم. ایچیم ایچیمی یئسه ده ال‌لریم بوم-بوز ایدی. هئچ زامان دا قیزمایاجاقدی.
-یاغیش یاواشیدی … آددیملایاق یوخسا ائله بوردا دانیشاق؟
قارا بولودلار بیر آندا باشیمیزین اوستوندن اؤتوب گئتمیشدی.
سسینده‌کی تیتره‌ییش و سس‌سیزلیک‌له دولو قورخونو هر دانیشدیغیندا بوتون حوجئیره‌لریم‌له حیس ائدیردیم. او برک قورخموشدو. من ده اونلاری کافهده گؤردویوم گونو اونو الدن وئرمک حیسینی یاشارکن بئله‌جه چوخ قورخموشدوم.
هاوا یاواش-یاواش قارالیردی. آغ-آپباق لامپالارین ایچینه گیریردی آلا-قارانلیق شه‌هر. تۆکان‌لارین شوشه قاپی‌لاری خیابان لامپالاری‌نین ایشیغینی عکس ائتدیریب پاریلداییردی. آیاق قابیسی‌نین قیجیرتیسیندان باشیمی قالدیریب اوزونه زیلله‌ندیم.
گؤزلرینه باخدیم. گیله‌لری پاریلداییردی. سویوقدان ایدی یوخسا گؤز یاشیندان؟
آما سن منه سؤز وئرمیشدین. منی تک قویماماغینا سؤز وئرمیشدین.
گؤزونون پاریلتیسی یاناغینا آخدی.
بئش ایلین بیرلیکده‌لییی‌نین، خاطیره‌لری‌نین اوستونه بیر گؤز قیرپیمیندا آیاق باسیب گئدن اینسان ذاتن منی سئومه‌میش کی. من اؤز-اؤزومه اوینامیشام دئمه. سنه بو قدر گووندیییم، ایناندیغیم اوچون، سنی حیاتیما سوخدوغوم اوچون، منی یارالاماغینا ایذین وئردیییم اوچون اؤزومه او قدر قیزقینام کی.
من آنلاتا بیلمه‌دیم. ایچیمده بیریکتیردیییم، بوغازیمدا دویوم-دویوم اولان هئچ بیر شئییی هئچ کیمسه‌یه آنلاتا بیلمه‌دیم. اوتاغیما سیغمادیم، گئجه‌لری اویویا بیلمه‌دیم. نفس بئله آلا بیلمه‌دیم بعضن. چونکو ایلیک‌لریمه قدر آجی ایله دولوایدیم.
-من دانیشماغا گلمیشم آمما سن سوسوران فقط … منی قورخوتما …
سندن او قدر شئی اؤیرندیم کی؛ اؤزونه شعار دا اولموش اولسا من چوخ شئی اؤیرندیم. ایندی بو گون سوساراق، آلتدان آلاراق چکیب گئدیرم‌سه لال اولدوغومدان دئییل. بیر زامانلار منه اؤیرتدییین سایغی دئیه دئییلن بیر شئی‌یین آرادان گؤتورولمه‌مه‌سی اوچون‌دور. کئشکه بیر اینسان حاققیندا اولان یاخشی فیکیرلریمیز هئچ واخت آرادان گئتمه‌سین.
بلکه هئچ ایندی ده آنلایا بیلمیردیم. منیم بئینیم دولو ایدی بؤیوک و بؤلوک-بؤلوک سورو ایشارت‌لری ایله. نییه؟ نجور؟ ندن؟! آخی اولار؟ او بویدا سئوگی‌یه نه گلدی؟!
من بیر دفعه بالاجا اولاندا آناملا بازارا آلیش-وئریشه گئدرکن ایتمیشدیم. قورخاراق آغلاسام دا او قدر اوردا اوتورموشدوم کی آتام گلیب منی تاپمیشدی. من آتامین منی تاپاجاغینا اینانیردیم، امین‌ایدیم. نه دئمک ایسته‌دیییمی آنلادینیز می؟! اونونلا برابرکن ده بئله بیر حیسیم وارایدی. بلکه ده ان اؤنملی دویغو اینانجدیر. اینانماق چوخ اؤنملی دیر. ایناندیغین یئردن یارالانینجا و یا ایناندیغین یئردن قیریلینجا اینسان بیر ده آیاغا قالخا بیلمیر.
همیشه گئتدیییمیز کافه‌نین اؤنونده دایاندی. تر باسمیش شوشه‌سیندن ایچرینی گؤره بیلمه‌دیم. کئشکه ان آزی بورانی ایکیمیزه ساخلایا بیلسه‌ایدی.
بیر آن اوزوکسوز بارماغیما باخیب گؤزلرینی بو سفر بوینومدا گزدیردی. آنجاق اوردا دا هئچ بیر شئی قالمامیشدی.
-من داها راحات یاشایا بیلمیرم … هارا گئدیرم سن وارسان … چای ایچمک ایسته‌ییرم سن یادیما دوشورسن … دوندورما آدی گلیر گلیب دوروسان گؤزومون قاباغیندا … آددیملاییرام یئنه سن … بو سفر گؤزلریمی یومورام گؤزل اوزونو خاطیرلاییرام … قولاق‌لاریمی قاپاییرام اوشاق‌یانا گولوش‌لرینی ائشیدیرم … سئوگی دولو باخیش‌لارینی اونودا بیلمیرم … یادیندا تهمینه زائورا نه دئییردی؟ یقین کی قاباغینا باشقا قادین‌لار دا چیخاجاق آنجاق سن منه اینان هئچ کس‌نن بوجور اولمایاجاق. آخی اولماز کی هر شئی بئله‌جه تکرار اولسون.
بیلمه‌ین ده مننن ساری اؤلور ساناجاقدی! او پیس زاماندا قاییتمیشدی. منیم حیسیم تمامن آرادان گئتدییی زاماندا.
دئمه بؤیوک عشق‌لر هئچ اوممادیغیمیز زاماندا بیترمیش. موتلولوغو هر کسدن چوخ حاق ائدن اینسان‌لار ایسه هر کسدن اؤنجه او موتلولوغو ایتیررمیش‌لر.
الینی جیبیندن چیخارتدی؛ اللریمی توتماق ایسته‌دی. باشیمی آشاغی سالیب اللریمی قوینوما آلدیم؛ اللری یومروقلاندی. دامارلاری قارا توک‌لری‌نین آراسیندان چیخدی. او اللری، اوووجلاری چوخ اؤپموشدوم؛ خیالیمدا بئله. اونلار سادهجه منی قوجاقلاماق، منیم اللریمی توتوب ایسیتمک اوچون ایدی.
بیر کیشی سوسورسا سنی ایتیرمه‌مک اوچون سوسور. آنجاق بیر قادین سوسورسا سندن نئجه آیریلا بیله‌جه‌یی‌نین یوللارینی دوشونور دئمک‌دیر. من ده سوسوردوم او دا. بو سون یورویوشوموز ایدی می؟!
بیر آددیم یاخینلاشدی. قاپینی آچدی. الینی منه ساری اوزاتدی. اودقونماغینی گؤردوم. گؤزلریم یاخاسیندان بیرآز یوخاری بوینوندا دیکیلیب قالمیشدی.
بلکه ده بیر ایلیشکیده‌کی ان بؤیوک آجی بلیرسیزلیک‌دیر. سئوگیمیزی قانیتلاماق اوچون قالماق یوخسا وارلیغی‌میزین دیرینی بیلدیرمک اوچون گئتمه‌یی سئچه بیلمک. من بونلارین هئچ بیرینی باشارا بیلمه‌میشدیم. نه قالان کیمی قالمیشدیم نه ده کی گئدن کیمی گئتمیشدیم. آیلار اؤنجه هاردایدیم‌سا یئنه اوردایدیم. آنجاق اونون هاردا و نئجه اولدوغو بللی دئییلدی. منیم گئتمه‌ییم واجیب‌کن او گئتمیشدی. منیم گؤردوک‌لریمی او گؤرسه‌ایدی نئجه داوراناردی گؤره‌سن؟
اونا یاخینلاشیب یاغمورلوغونو چیینیمدن گؤتوروب قوجاغینا قویدوم. ایلک اؤنجه اییلیب دیک‌دابان باشماغیمی آیاغیمدان چیخاریب جوبون ایچینه توللادیم.
الیمی قالدیریب ساختا کیرپیک‌لریمی قوپارتدیم، روژومو سیلدیم. قراریمی وئرمیشدیم من. ساچیمی دا یئنی‌دن اؤز رنگینه بویاماغی دوشونوردوم. توپوغومداکی دؤیمه‌نی سیلدیرمک فیکرینده‌ایدیم. الیمده اولسایدی بورنومو دا اسکی حالینا قایتاراردیم. قیساجاسی تمامی‌له گئری دونوش فیکرینده‌ایدیم. من کیمسه اولمامالی‌ایدیم. اؤزوم اولمالی‌ایدیم سادهجه.
یانیندان اؤترکن قولومدان یاپیشدی: دوغرودان گئدیسن؟ … قاچماق یولو دییر.
خفیف بیر آلچالدیجی گولوش آنیندا دوداقلاریمی بزه‌دی. قالان کیمی ده قالا بیلمه‌دین آخی!
هله ده اؤزونه قویولمامیشدی. گئدن من دئییلدیم. سن باشقاسینی تاپیب گئتدین من ده قالیب گؤردویون کیمی اؤزومو تاپدیم.
قولومو دارتدیم. چانتام ضربله یئره دوشوب جینگیلده‌دی. چانتامین ایچینده اونون منه آلدیغی عطیرلرین بوش قاب‌لاری وارایدی. آلدیغی عطیرلرین بوش شوشه‌لرینی ده ساخلامیشدیم.
من اونونلا ایلگیلی اولان هر شئیی، اونو منه آنیمساتان ان خیردا شئیلری بئله ساخلامیشدیم. بیرلیکده آلدیغیمیز ایلک ساققیز هله ده کیتابخانامدا اونون منه هدیه ائتدییی کیتابلارین دالیندا دوروردو. دوشوندوکجه گؤروردوم نئجه ده گؤزل سئومیشم اونو.
اوزومو اونا ساری چئویریب گؤزلرینه باخدیم.
– سن منه باخارکن من اؤزومو دونیانین ان گؤزل قادینی کیمی حیس ائدیردیم. گوونده، دیرلی. سؤزلرین‌له منی گؤی‌لره چیخاریردین. هئچ بیر یئرده، هئچ بیر شئی‌ده گؤرمه‌دییم بیر شئیی سنین سئوگی دولو گؤزلرینده، محبتلی ال‌لرینده گؤروب حیس ائتمک نه دئمکدی بیلیرسن سن؟ بیر نفر ایدین آما بوتون دونیامی گؤزللشدیرمیشدین. من قیشین اورتاسیندا دوندورما یئییردیم‌سه اوره‌ییم، ال‌لریم ایستی ایدی. ایندی بو هاوادا چای بئله ایسیتمیر جانیمی. آرامیزداکی سئوگی ساندیغیم شئی نه‌ایمیش کی؟ نئچه گون، نئچه آی، نئچه فصیل سوردو کی؟! خبرسیز گئتدییین گوندن مریضم من. ایلک گون‌لر اؤزومده بئله اولموردوم. او قدر قیشقیریردیم قولاقلاریم توتولوردو. هئچ زامان اوزومده آچدیغیم شیریملاری گؤرمه-دین سن. روانشناس قاپی‌لارین دؤیمه‌لی اولدوم. منیم بئینیمی، روحومو داوا ایله دولدوردولار آنجاق گئنه سنی اونوتمادیم. سنین یوخلوغون گونلرجه منی خیلخالاییردی. بوتون بدنیمین دانیشاجاق‌لاری وار ایدی سانکی. اصلینده بلکه توختایا بیلردیم ده آنجاق، سانکی اؤزوم اؤزومدن اؤج آلیردیم. توختاماق ایسته‌میردیم. حئیران-حئیران باخدیغین، الینی توتوب بو خیاواندا ال-اله گزدییین، مکانیمیزا آپاردیغین و بو ایشلرینله آرامیزا سوخدوغون قادینین ساچی‌نین رنگینه دؤنوشدو ساچ‌لاریم. سن سئوگی دولو گؤزلرین‌له منه باخدیغین کیمی اونا باخدین من دوداقلاریمی، بورنومو اونون دوداق‌لارینا، بورنونا بنزتدیم. سن اونون ال‌لرینی توتدون منیم قاشیم اونون قاش مودئلینه چئوریلدی. سن الینی اونون اینجه بئلینه دولادین من بیچاق آلتینا آپارماق ایسته‌دیم بوتون اندامیمی. اونو ایکیمیزین، بیزیم اولان یئرلره آپاردین منیم قیرمیزی روژوم اونون قیرمیزی روژو کیمی دوداغیمدان هئچ اکسیک اولمادی. من تمامن اؤزومو اونا بنزتمک ایسته‌سم ده اونون قدر سیز کیشیلر دئمیشکن لوند اولمادیغیم اوچون منی گؤرمه‌دین. دوداق‌لاریم، قاشلاریم دیل اولوب دیله گلسه‌لر کئشگه. سن گئدندن سونرا ایچیمده نم نه بویدا بوشلوق یاراندی. اصلینده چکیب گئتمه‌سه‌یدین بلکه باغیشلاردیم، اییله‌شردیم ده. آنجاق خبرسیز گئتمه‌یین، بو قدر زاماندان سونرا گلمه‌یین … سن گئتدین و بوتون سؤز صحبتلرین، لاغ-لاغالارین قارشیسیندا من دوردوم. دؤنوب دولاشیب،-سنینکی ده گؤیچک بیر شوگرمامیله دییشدی سنی …اؤزوندن اون ایل یئکه قادینلا … گؤر نه قدر یئترسیز، لوزومسوزایمیشین کی …-دئدی‌لر. اونلارین آشاغیلاییجی گولوش‌لری قولاق‌لاریمی کیپاکیپ دولدوروب.
من قورخورام. آرتیق سندن یاشجا بؤیوک اولان قادینلاردان بئله قورخورام … سن آغینا بوزونا باخمیرمیشسان ائله بیل … هر گؤزل قادینی گؤرونجه قلبیم تیتره‌یه‌جک. هر ایکی نفر ال-اله گؤرونجه سن‌سن ظن ائده‌جم. اؤزون دئمیشگن ائبئله منی سئورکن باشقاسینا باخا بیلدینسه، الیندن توتوب ایکیمیزین همیشه گئتدیییمیز کافهیه آپاردین‌سا گئنه اولا بیلر، گئنه ائلرسن. منیم اوستومده اسرکن، منه اؤلرکن باشقاسینا باخماغا، الینی توتماغا گؤنلون راضی اولدوسا گئنه اولار. باشقا قادینین باشینی چیینینه قویوب سیغاللاماغی اؤزونه سیغیشدیرا بیلدینسه …
کیرپیک‌لریمی قیرپدیم. دیب‌لری گؤینه‌ییردی. گؤزلری هله ده اینتیظاردا ایدی. بو سؤزلر اوره‌ییمده بورولغان کیمی دولانسا دا دوداقلاریمی آرالامادیم. سانکی بورولغانلی گؤزلریمدن، سوسقون دوشموش دوداقلاریمدان هر شئیی آنلادی. منه ساری بیر آددیم آتیب بیراز اییلدی. بیلیردیم اونوتماق بو راحاتلیغا اولمایاجاقدی؛ بئش ایل بیرلیکده‌لیک آغیزدان گلیب گئدیردی. باشقا هر کس اولسایدی گوردوکلریندن سونرا بلکه آنیندا اونودوب آرخاسینا بئله باخمادان چکیب گئدردی آنجاق، من چوخ گووندیییم اوچون بئله-جه چؤکموشدوم، ییخیلمیشدیم.
-من سنی سئویرم … او گؤردویون و یا ائشیتدییین شئی بیر آنلیق هیجان دالیجان گئتمک کیمی بیر شئی‌دی .. بیر جور آنلیق توتقو … اصلینده کیشیلر …-باخیشیمی گؤرونجه سوسدو.
باشدان آیاغا سوزدوم اونو. بیر زامانلار سؤزلری‌له، گؤردویو ایش‌لرله منی گؤی اوزونه چیخاردان آدام، بیزی تکجه اؤلوم آییرا بیلر دئین آدام، سونرالار بیردن-بیره باشقا بیر قادینین دالینجا گئدن آدام، آی‌لارجا آراییب سورمایان، ایکی سطیر بئله یازمایان آدام بیر آندا قارشیما کئچیب گولونج دولو سؤزلرله باشقا قادین‌لارا دویدوغو هیجاندان دانیشیردی. یاناق‌لاریمدا یارانان یومشاق قیزارتینی حیس ائتدیم. اونون یئرینه من اوتانمیشدیم.
کئشکه بویونون-پوسونون یئرینه دوغرودان دا بؤیوک اوره‌یی و درده دین دوشونجه‌سی اولوردو. کئشکه گؤزل گؤرونمک اوچون بازارلاردا، گؤزه‌للیک مرکزلرینده هامارا آتدیغیم او زامان‌لاری اؤزومون ده اوره‌ییمی بولاندیران کیف توتموش دوشونجه‌می گلیشتیرمه‌یه قوللانیردیم. بلکه بو گون باشقا بیر آدامین یانلیش داورانیشی‌نین آجیغینی من اؤزومدن چیخمامیش اولاردیم. من اؤزومه بورجلوایدیم؛ یاتا بیلمه‌دیییم گئجه‌لر اوچون. یوخوسوز قالان گؤزلریمدن، باریشا بیلمه‌دیییم گئجه‌لردن شرمنده‌ایدیم.
بو سؤزلری ائشیتدیکدن سونرا سادهجه اوزولدوم. بیر آندا تکجه اؤزومه دئییل بوندان سونرا قارشیسی‌نا چیخان بوتون قادین‌لارا اوره‌ییم یاندی. بو قدر سیر-صفتیمه ال آپاردیغیم اوچون، قورتدالادیغیم اوچون هم اؤزومه هم بوتون قادین‌لارین دایاز دوشونجه‌لرینه دریندن اوزولدوم. بیز قادین‌لار بورنوموزو، اورامیزی بورامیزی دییشدیرمک دئییل بو کیمی اینسان‌لار دوشونجه‌لرینی، اؤزلرینی دییشدیرمه‌لی‌ایدی‌لر.
-من ایسته‌ییرم صمیمی دانیشام … من شهریستان اوشاغی‌ایدیم … قیز گؤرمه‌میشدیم … بیلمیردیم قیز ندی … قارشی جینس ندی … بیرینجی ایلگی گؤردویوم قیزا وورولماق، باغلانماق سنه ده یانلیش گلمیر؟! منده یارانان او احتیراصین، توتقونون، جوشقونون قاباغینی آلا بیلمه‌دیم. آما من قاییتدیم. سن‌سیز قالا بیلمه‌دیم.
سادهجه اوزونه باخدیم. گئتدیکجه داها دا بارا وئریردی. منی سئویردی دوزدو آنجاق، باشقالارینی دیندیقلاماغی دا چوخ سئویردی. ائله بیل بو کیشی‌نین اوزو اوزلر گؤرموشدو. سن ده منیم ایلکیم ایدین. من نییه بئله دوشونمه‌دیم؟! من سئوگینی سنین‌له اؤیرندیم؛ عؤمرومون ان دولغون گون‌لرینی سنین‌له یاشادیم، سنین اولدوم. بیرباشقاسینی اؤلسم ده دوشونه بیلمه‌رم. بونلاری مندن آلمامالی‌ایدین. اؤزونو مندن اسیرگه‌مه‌مه‌لی‌ایدین.
اوزومو چئویردیم. گؤی اوزونه باخدیم. سسی قولاغیمدا جینگیلده‌ییردی: سن چوخ فرقلیسن … سن چوخ باشقاسان … مرسی منیمسن … مندن هئچ واخت گئتمه، نه اولورسا اولسون …
کافه‌نین قاپیسی آچیلدی. ال-اله توتوشان ایکی نفر بیر-بیرینه قیسیلیب پیچیلداشاراق یانیمدان اؤتدولر. گولوشلرینین سسینی ائشیدیردیم. ایچریدن جانلی موزیک سسی بیر آنلیق دیشارینی چولغالادی.
-یوخلوغونون عذابی
ائوی جهنم ائدیب
جیسمیم بوردا قالیبدی
روحوم سنین‌له گئدیب
…۲
بلکه ده بو اورتادا کیمسه سوچلو دئییلدی. اولانلار سادهجه حیاتین بیر پارچاسی ایدی.
-سون زامانلاردا منی چوخ سیخیردین … قیسقانیردین … همیشه وارایدین … منسیز بیر دیقه بئله کئچیره بیلمیردین … بیز کیشیلر بئله قادینلاردان قاچاق دوشه‌ریک …
سن اؤز یانلیشین‌لا اوزلشه بیلمه‌دییین اوچون، اورتادا بیر سوچلو آرادیغین اوچون یانلیشینی منیم اوستومه آتاراق چکدییین ویجدان عذابیندان قورتولماق ایسته‌ییرسن.
من بو تفککورده، بو دوشونجه‌ده اولان بیر آدامی سئودیییمه چوخ پئشمان اولموشدوم. ان آزیندان ایلک باشدا اؤزونو باشقا بیریسی کیمی گؤرستمه‌یه‌جکدی، اولمادیغی بیری کیمی دانیشمایاجاقدی. کیتاب‌لاردان، اوردان بوردان اؤیرندیک‌لرینه، اؤزو بئله ایچدن اینانمادیغی سؤزلری شعار اولاراق قوللانمایاجاقدی. آرتیق سئوگیمدن اؤلسه‌یدیم ده گئری دؤنوش یوخ ایدی.
هله ده بیلمیرم اولانلار و بو سون یوروش یوخو ایدی یوخسا گرچک آنجاق او یئنه یوخایدی …
آرخامی چئویریب دومان قاپسامیش یولدا آددیملاییرام …
اللریمله اؤزومو قوجاقلاییرام. گؤی اوزونه باخیرام. کیمه‌سه پیچیلداییرام: قیز اولسا یاغمور … اوغلان اولسا،- بوغازیم دویومله‌نیر.- آدلارینی دا سئچمیشدیک. بیلمیرم هئچ خاطیرلاییر یوخسا یوخ …
۱. رؤیا آیخان خانیم‌ین «آغلا» آدلی ماهنیسی.
۲.مهرداد کسانی جناب‌لاری‌نین «یاغیش» آدلی ماهنیسی.
3 پاسخ
گینه ایشیغی دولاندیرانلار اویونبازلیقلارین باشلاییب منیم باخیشلازیمی گولونج مسخره در دست بررسی لرینده دوستاقلایببلار..یازیقلار اولسون سیز کیمی قورخاق ادبیاتچیلارا…ییغیشیدیرین بو محافظه کار قورخاق سیته ییزین پسه پوسه سینی.چوخ اوتاندیریجی..دیر..بو اوشاق یانا داورانیشلارینیز…بوندان سونرا بو سایتین اوزونه بئله باخماغا واختیمی ایتیرمرم…بو ایرنج فله ای یازلارلا دولو …فقط تعصب اوزوندن کوهنه سولچولارین بایات شعاری یازیلاریلا دولو…یادا
چوخ گوزل بیرحکایه. قلمینیزه ساغلیق❤❤??
چوخ گؤزل. قلمینیزه ساغلیق…???